#ပြည်တွင်းသတင်း
◾️ ရန်ကုန်၌ ယမန်နေ့နံနက်ပိုင်းနှင့်နေ့လယ်ပိုင်းတို့တွင် သုံးနေရာမီးလောင်
ရန်ကုန်တိုင်းအတွင်း ယမန်နေ့(ဖေဖော်ဝါရီ ၁၀ ရက်) နံနက်ပိုင်းနှင့်နေ့လယ်ပိုင်းတို့တွင် နေရာသုံးနေရာ၌ မီးလောင်မှုများဖြစ်ပေါ်ခဲ့ကြောင်း မြန်မာနိုင်ငံမီးသတ်ဦးစီးဌာန၏ ထုတ်ပြန်ချက်များအရသိရသည်။
ရန်ကုန်တိုင်း၊ အင်းစိန်မြို့နယ်၊ ဖော့ကန်ရပ်ကွက်၊ အောက်မင်္ဂလာဒုံလမ်းရှိ နေအိမ်တစ်အိမ်၌ ယမန်နေ့ နံနက် ၁၁ နာရီ ၅၄ မိနစ်တွင်မီးလောင်မှုဖြစ်ပွားခဲ့ပြီး မွန်းလွဲ ၂ နာရီ ၅၂ မိနစ်တွင် အင်းစိန်မြို့နယ်၊ တောင်သူကုန်းရပ်ကွက်၊ ဦးထွန်းရှိန်(၃)လမ်းတွင် မီးလောင်မှုများဖြစ်ပေါ်ခဲ့သည်။
ယမန်နေ့မွန်းလွဲ ၁၂ နာရီ ၃၅ မိနစ်တွင်လည်းကျောက်တံတားမြို့နယ်၊ (၁)ရပ်ကွက်၊ ဆူးလေဘုရား လမ်းနှင့် အနော်ရထာလမ်းထောင့်၌ မီးလောင်မှုဖြစ်ပွားခဲ့ပြီး မွန်းလွဲ ၁၂ နာရီ ၄၀ မိနစ်တွင်မီးငြိမ်း ခဲ့ကြောင်းသိရသည်။
ထို့ပြင် ယမန်နေ့မွန်းလွဲ ၁ နာရီ ၂၅ မိနစ်တွင် မန္တလေးတိုင်း၊ ပုသိမ်ကြီးမြို့နယ်၊ လက်သစ်ကျေးရွာ၌ နေအိမ်မီးလောင်မှုဖြစ်ပွားခဲ့ပြီး မွန်းလွဲ ၁ နာရီ ၅၂ မိနစ်တွင်မီးငြိမ်းခဲ့သည်ဟု မြန်မာနိုင်ငံမီးသတ် ဦးစီးဌာနကထုတ်ပြန်သည်
ဖေဖော်ဝါရီ ၉ ရက်တွင်လည်း ရန်ကုန်တိုင်းအတွင်းရှိ မှော်ဘီမြို့နယ်၊ တပ်ကြီးကုန်း ကျေးရွာ၊ လေထီး ၁၆ လမ်းနှင့် အင်းစိန်မြို့နယ်၊ ကမ်းနားအလယ်ရပ်ကွက်၊ လှိုင်မြစ်လမ်းတွင် မီးလောင်မှုဖြစ်ပွားခဲ့သကဲ့သို့ မကွေးတိုင်း၊ မင်းဘူးမြို့၊ အမှတ်(၄)ရပ်ကွက်၊ မန်ကျီးကျောင်းရပ်တို့ တွင်လည်း မီးလောင်မှုများဖြစ်ပွားခဲ့သည်။
ယခုရက်ပိုင်းအတွင်း ရန်ကုန်အပါအဝင် အခြားတိုင်းနှင့်ပြည်နယ်များ၌ မကြာခဏမီးလောင်မှုများ ဖြစ်ပေါ်နေသောကြောင့် လျှပ်စစ်မီးပြတ်တောက်ချိန်တွင် ဖယောင်းတိုင်မီး၊ ဂတ်စ်မီးဖိုနှင့် မီးစက်မောင်းခြင်း၊ စသည့်မီးလောင်မှုဖြစ်ပေါ်စေနိုင်သည့် ကိစ္စရပ်များကိုသတိပြုဆင်ခြင်ကြရန် လိုအပ်ကြောင်း လူမှုကူညီရေးဆောင်ရွက်နေသည့်အဖွဲ့များက သုံးသပ်ပြောဆိုထားသည်။
