ပြင်ဦးလွင်-မန္တလေးအဆင်းလမ်းတွင် ပြောင်းဆံတင်လာသော ၁၂ ဘီးယာဉ် ဘရိတ်ပေါက်၍ တိမ်းမှောက်ရာမှ ယာဉ်နောက်လိုက်သေဆုံး
ဖေဖော်ဝါရီ ၃
မန္တလေးတိုင်းဒေသကြီး၊ ပြင်ဦးလွင်မြို့နယ်၊ ပြင်ဦးလွင် – မန္တလေး အဆင်းလမ်း၊ မိုင်တိုင် ၂၆ မိုင်တွင် ဖေဖော်ဝါရီလ ၂ ရက် ညနေ ၅နာရီ ၅၀ မိနစ်ခန့်က ပြောင်းဆံများတင်လာသော ၁၂ ဘီးယာဉ် ဘရိတ်ပေါက်၍ တိမ်းမှောက်ရာမှ ယာဉ်နောက်လိုက်တစ်ဦး သေဆုံးခဲ့ကြောင်း ကယ်ဆယ်ရေးဆောင်ရွက်သူများထံမှ သိရသည်။
နောင်မွန်မှ မန္တလေးသို့ ပြောင်းဆံများ တင်ဆောင်မောင်းနှင်လာသော Nissan အမျိုးအစား ၁၂ ဘီး မော်တော်ယာဉ်မှာ ဘရိတ်ပေါက်၍ အရှိန်မထိန်းနိုင်ဘဲ တိမ်းမှောက်ခဲ့ခြင်းဖြစ်သည်။
ယာဉ်တိမ်းမှောက်မှုကြောင့် ယာဉ်မောင်းမှာ ထိခိုက်ဒဏ်ရာ မရရှိခဲ့သော်လည်း ယာဥ်နောက်လိုက် အသက် ၅၈ နှစ်အရွယ် ဦးခင်မောင်ဆွေမှာ ညာဘက်ဦးခေါင်း သွေးထွက်ဒဏ်ရာနှင့် ဘယ်ဘက်ခြေထောက်ပြတ်ရှ ဒဏ်ရာဖြင့် သေဆုံးခဲ့ကြောင်း သိရသည်။
“ယာဥ်နောက်လိုက်နဲ့ ယာဉ်မောင်းက သာစည်မြို့နယ်ကပါပဲ။ မောင်းလာတုန်း ဘရိတ်ပေါက်ပြီး ကားရဲ့အရှိန်ကို မထိန်းနိုင်တော့ဘဲ လမ်းရဲ့ ညာဘက်ခြမ်းကို မှောက်သွားတာ။ ယာဥ်နောက်လိုက်ကတော့ နေရာမှာတင် ဆုံးသွားတယ်”ဟု ကယ်ဆယ်ရေးဆောင်ရွက်သူ တစ်ဦးက ပြောသည်။
ယာဉ်တိမ်းမှောက်မှုဖြစ်ပွားရာနေရာသို့ ပြင်ဦးလွင်မြို့နယ် မီးသတ်စခန်းအုပ်ချုပ်မှုယာဉ် ၁ စီးနှင့် ရတနာပုံမြို့သစ်နယ်မြေမီးသတ်စခန်းမှ မီးငြှိမ်းသတ်ယာဉ် ၁ စီးဖြင့် မီးသတ်တပ်ဖွဲ့ဝင်များက ကယ်ဆယ်ရေးလုပ်ငန်းများ ဆောင်ရွက်ပေးခဲ့ကြသည်။
သေဆုံးသူ ယာဉ်နောက်လိုက် အမျိုးသား၏ ရုပ်အလောင်းကို ရွှေမြင်သာ လူမှုကူညီရေးအသင်း၏ သူနာတင်ယာဉ်ဖြင့် ပြင်ဦးလွင်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
ယာဥ်တိမ်းမှောက်ကာ လူသေဆုံးမှုကြောင့် အသက် ၃၃ နှစ်အရွယ် ယာဉ်မောင်းဖြစ်သူ ဦးရဲခိုင်ဦးကို ရာဇသတ်ကြီးပုဒ်မ ၃၀၄(က)၊ ၃၃၈တို့ဖြင့် ပြင်စာနယ်မြေရဲစခန်းမှ အမှုဖွင့်အရေးယူထားကြောင်း သိရသည်။
(Photo -May Myo Fire Station)
#သတင်းဟင်းလေးအိုးကြီး
