မလေးရှားကို ခိုးဝင်မည့် မြန်မာ ၅၀ ကျော် လိုက်ပါလာသော ကုန်ကားက လမ်းဘေးဓာတ်တိုင်ကိုဝင်တိုက်မိ၍ အားလုံး အဖမ်းခံရမှု ထိုင်းတောင်ပိုင်းတွင် ဖြစ်ပွား

ဖေဖော်ဝါရီ ၂

မလေးရှားနိုင်ငံကို ခိုးဝင်မည့် မြန်မာ ၅၀ ကျော် လိုက်ပါလာသော ၆ ဘီး ကုန်တင်ကားက လမ်းဘေးဓာတ်တိုင်ကို ဝင်တိုက်မိရာမှ အားလုံးအဖမ်းခံရမှု ထိုင်းနိုင်ငံတောင်ပိုင်းတွင် ဖြစ်ပွားခဲ့ကြောင်း သိရသည်။

ဇန်နဝါရီလ ၃၁ ရက်က ထိုင်းနိုင်ငံတောင်ပိုင်း၊ နခွန်စီထမရတ်ခရိုင်တွင် ကားတိုက်မှုဖြစ်ပွား၍ ကုန်ကားတစ်စီး လမ်းဘေးထိုးကျနေကြောင်း သက်ဆိုင်ရာက သတင်းအရ သွားရောက်စစ်ဆေးစဉ် အထက်ပါအတိုင်း ဖမ်းမိခဲ့ခြင်း ဖြစ်ကြောင်း သိရသည်။

စစ်ဆေးချက်များအရ အဆိုပါကုန်ကားမှာ နဘွန်းဒေသ အမြန်လမ်းမကြီးတွင် အရှိန်မထိန်းနိုင်ဘဲ လမ်းဘေးမီးတိုင်ကို ဝင်တိုက်မိခဲ့ခြင်း ဖြစ်ကြောင်း၊ တာပေါ်လင်များဖုံးအုပ်ထားသည့် ကားနောက်ဘက်တွင် မြန်မာနိုင်ငံသား အမျိုးသား၊ အမျိုးသမီး ၅၃ ဦး လိုက် ပါလာကြောင်းနှင့်ယင်းတို့ထဲတွင် တစ်ဦးမှာ ဦးခေါင်းကွဲဒဏ်ရာရကာ ကျန်သူများမှာ ထိခိုက်ဒဏ်ရာ အနည်းငယ်စီ ရရှိခဲ့ကြကြောင်းလည်း သိရသည်။

ကားပေါ်ပါသူအားလုံးမှာ ထိုင်းဘာသာစကားမပြောတတ်သောကြောင့် ကြောက်လန့်နေကြကြောင်း၊ မလေးရှားနိုင်ငံသို့သွားရောက်အလုပ်လုပ်ရန် ပွဲစားကို တစ်ဦးလျှင် ထိုင်းဘတ် ၅၀၀၀၀ စီ ပေးခဲ့ရကြောင်း သက်ဆိုင်ရာက စကားပြန်ဖြင့် တစ်ဆင့်ခံစစ်ဆေးမှုအရ သိရကြောင်း ဒေသတွင်း သတင်းများအရ သိရသည်။

အဖမ်းခံရသူများအား ထိုင်းနိုင်ငံဥပဒေအရ အရေးယူသည့်လုပ်ငန်းစဉ်အတိုင်းလုပ်ဆောင်ပြီးပါက အစိုးရ ချင်းချိတ်ဆက်၍ မြန်မာနိုင်ငံသို့ ပြန်လည်ပို့ဆောင်မည် ဖြစ်ကြောင်း သိရသည်။

Credit - Myanmar Transparency News Agency

#သတင်းဟင်းလေးအိုးကြီး