ယခုဘဏ္ဍာနှစ်တွင် လမ်းကြောင်း(၃)ခုမှ တင်ပို့နေသည့် မြန်မာ့ရေထွက်ကုန်များမှ အမေရိကန်ဒေါ်လာသန်း (၇၀ဝ)ကျော်ရရှိရန် မျှော်မှန်းထားကြောင်း မြန်မာနိုင်ငံငါးလုပ်ငန်းအဖွဲ့ချုပ်နှင့် ရေထွက်ပစ္စည်းပို့ကုန် လုပ်ငန်းရှင်များ အသင်းထံမှ သိရသည်။
(၂၀၂၄-၂၀၂၅) ဘဏ္ဍာနှစ် ဧပြီလမှ ဒီဇင်ဘာလအထိ ငါး၊ ပုစွန်နှင့် ရေထွက်ကုန်တင်ပို့မှုမှ အမေရိကန်ဒေါ်လာ သန်း(၅၂၁)သန်းရရှိခဲ့ကြောင်း သိရသည်။
မြန်မာနိုင်ငံငါးလုပ်ငန်းအဖွဲ့ချုပ်နှင့် ရေထွက်ပစ္စည်းပို့ကုန်လုပ်ငန်းရှင်များအသင်းအနေဖြင့် ယခုဘဏ္ဍာ နှစ်တွင် ရေထွက်ပစ္စည်းတင်ပို့မှုမှ အမေရိကန်ဒေါ်လာသန်း(၇၀ဝ)ကျော်ရရှိရန် မျှော် မှန်းထားကြောင်း သိရသည်။
‘‘အသင်းအနေနဲ့ ဒီနှစ်မှာဆိုရင် (၇၃၅)သန်းပို့နိုင်မယ်လို့ နိုင်ငံတော်ကိုတင်ပြထားတယ်။ ရမရတော့ မမှန်းနိုင် သေးဘူး။ အခုချိန်ထိက (၅၂၁)သန်းပဲရသေးတော့ ကျန်တဲ့(၃)လမှာ သန်း(၂၀ဝ)လောက်ကလိုနေတယ်။ တစ်လကို ပျမ်းမျှက (၆၅)သန်းလောက်တော့ရတယ်။ မှန်းချက်ကတော့ နည်းနည်းလေးလျော့မယ်လို့တော့ထင်တယ်။ ဘယ်လို လာဦးမလဲတော့ မသိသေးဘူးပေါ့”ဟု MPEA မှ တာဝန်ရှိသူတစ်ဦးက ပြောသည်။
မြန်မာနိုင်ငံမှ ရေထွက်ကုန်ပစ္စည်းများကို ရေလမ်းကြောင်းအပါအဝင် လမ်းကြောင်း(၃)ခုဖြင့် နိုင်ငံပေါင်း(၄၀) ကျော်သို့ တင်ပို့လျက်ရှိကြောင်း သိရသည်။ “ပို့တဲ့နေရာမှာတော့ အဓိက အများဆုံးကတော့ သင်္ဘောနဲ့ပို့တယ်၊ နံပါတ်(၂)ကတော့ လေကြောင်းလိုင်းနဲ့လည်းပို့တယ်၊ နယ်စပ် ကနေလည်းပို့တယ် နေရာ(၃)နေရာကနေပို့ပါတယ်။ နယ်စပ်နဲ့ပို့တာကတော့ ကော့သောင်း-ရနောင်းပို့ တယ်၊ မြဝတီဘက်ကနေလည်းပို့တယ်။ လေကြောင်း လိုင်းနဲ့ကတော့ တရုတ်ကိုပို့တာများတယ်။ ငါးရှဉ့်၊ ကဏန်းတို့ပို့တယ်။ နယ်စပ်ကနေပို့တာကတော့ လက်ရှိအချိန်အထိတော့ ပြဿနာမရှိသေးပါဘူး။ ပို့နေပါတယ်” ဟု ၎င်းက ဆက်လက်ပြောသည်။
ထို့ပြင် ပြီးခဲ့သည့် (၂၀၂၃- ၂၀၂၄) ဘဏ္ဍာ နှစ်တွင် ဧပြီလမှ ဒီဇင်ဘာလအထိ ငါး၊ ပုစွန်နှင့် ရေထွက်ကုန်တင်ပို့မှုမှ အမေရိကန်ဒေါ်လာ(၅၁၈)သန်းရရှိခဲ့ကြောင်း သိရသည်။
မြန်မာ့ရေထွက်ကုန်များကို အဓိကအားဖြင့် တရုတ်၊ ထိုင်း၊ အိမ်နီးချင်းနိုင်ငံများ အပါအဝင် ဂျပန်နှင့် ဥရောပ နိုင်ငံများသို့လည်း တင်ပို့လျက်ရှိကြောင်း သိရသည်။
NP News
