ထိုင်းနိုင်ငံသို့ နယ်စပ်ဖြတ်ကျော် ဝင်ရောက်လာသည့် တရားမဝင် မြန်မာ ၁၃၀ ကျော်ကို ဖမ်းဆီးပြီး နေရပ်သို့ ချက်ချင်းပြန်ပို့ရန် စီစဉ်နေ

ဇန်နဝါရီ ၃၁

ထိုင်းနိုင်ငံသို့ နယ်စပ်ဖြတ်ကျော်လာသည့် တရားမဝင် မြန်မာ ၁၃၀ ကျော်ကို ဖမ်းဆီးပြီး နေရပ်သို့ ချက်ချင်းပြန်ပို့ရန် စီစဉ်နေကြောင်း ဒေသတွင်း သတင်းများအရ သိရသည်။

ယမန်နေ့ ဇန်နဝါရီလ ၂၉ ရက် နံနက်က ထိုင်းနိုင်ငံ ကန်ချနဘူရီခရိုင်၊ ထောင်ဖာဖှုန်မြို့နယ်၊ အမှတ် (၁)၊ ထာ့ခနွန် ကျေးရွာအနီးတွင် အဆိုပါ တရားမဝင် မြန်မာများအား မော်တော်ယာဉ်ငါးစီးဖြင့် တင်ဆောင်လာစဉ် ဖမ်းမိခဲ့ခြင်းဖြစ်ကြောင်း သိရသည်။

အဖမ်းခံရသော မြန်မာများမှာ အမျိုးသား ၇၀ ဦး ၊ အမျိုးသမီး ၄၀ ဦးဖြစ်ပြီး ၎င်းတို့ကို မော်တော်ယာဉ်ဖြင့် တင်လာသော ထိုင်းနိုင်ငံသား ကားသမား ၅ ဦးနှင့် မြန်မာအလုပ်သမားအချို့ ထွက်ပြေးလွတ်မြောက် သွားကြောင်း သိရသည်။

ထိုင်းနိုင်ငံ ထောင်ဖာဖှုန်ရဲတပ်ဖွဲ့နှင့် ပူးပေါင်းအဖွဲ့က သတင်းအရ သွားရောက်စောင့်ဆိုင်းဖမ်းဆီးခဲ့ခြင်း ဖြစ်ပြီး မကြာမီ နေရပ်ပြန်ပို့ရန် စီစဉ်နေကြောင်းလည်း အဆိုပါ သတင်းများအရ သိရသည်။

ယင်းတို့အနေဖြင့် ထိုင်းနိုင်ငံအတွင်းအလုပ်လုပ်ရန် တစ်ဦးလျှင် ပွဲစားခ ဘတ် ၁၀၀၀၀ မှ ၂၀၀၀၀ ထိ ပေးချေခဲ့ရကြောင်းလည်း ဝန်ခံထွက်ဆိုကြကြောင်း သိရသည်။

အလားတူ ယမန်နေ့ ဇန်နဝါရီလ ၂၉ ရက် ည ၁၀ နာရီခန့်က ပြောင်းဆံအိတ်များတင်ဆောင်လာသော မော်တော်ယာဉ် (တွဲကား) ပေါ် ပုန်းအောင်းလိုက်ပါလာသော မြန်မာနိုင်ငံသား ၂၆ ဦးကို တက်ခ်ခရိုင်၊ မဲဆောက်မြို့နယ်၊ ဟွေ့ဟင်ဖွန်စစ်ဆေးရေးဂိတ်တွင် ထပ်မံဖမ်းဆီးရမိခဲ့ကြောင်း သိရသည်။

အဆိုပါ ဂိတ်တွင် အဖမ်းဆီးခံရသူများမှာ ကရင် ပြည်နယ်၊ မြဝတီမြို့မှ ထိုင်းနိုင်ငံ၊ တက်ခ်ခရိုင်၊ မဲဆောက်ဘက်ကို တရားမဝင်လမ်းက ဝင်ရောက်လာသူများ ဖြစ်ပြီး မဲဆောက်မြို့ကတစ်ဆင့် ဘန်ကောက်မြို့ကို သွားရောက်အလုပ်လုပ်ကိုင်ကြမည့်သူများဖြစ်ကြောင်းလည်း သိရသည်။

လက်ရှိတွင်ဖမ်းဆီးရမိသူများအား ထောင်ဖာဖှုန်ရဲစခန်းနှင့် မဲဆောက်ရဲစခန်းတို့တွင် ထိန်းသိမ်းထားပြီး ထိုင်းနိုင်ငံ ဥပဒေအရ အရေးယူဆောင်ရွက်ကာ မကြာမီ နှစ်နိုင်ငံ အစိုးရချင်း ချိတ်ဆက်၍ ပြန်ပို့မည် ဖြစ်ကြောင်းလည်း သိရသည်။

#centralnewsnaypyitaw