ထရမ့်ရဲ့ကုန်သွယ်ရေးအခွန်တိုးမြှင့်ခြင်းဇာတ်လမ်းစပါပြီ။
--------------------------------------------------------------
အမေရိကန်သမ္မတထရမ့်က ကိုလံဘီယာနိုင်ငံအပေါ် ကုန်သွယ်ရေးအခွန်တိုးမြှင့်ခြင်းနဲ့ ဒဏ်ခတ်အရေးယူခြင်းပြုလုပ်ဖို့ အမိန့်ပေးလိုက်ပါတယ်။
ရွှေ့ပြောင်းနေထိုင်သူတွေကို ကိုလံဘီယာဆီပြန်ပို့ဖို့ အမေရိကန်ကနေ ကိုလံဘီယာဆီ ပျံသန်းလာတဲ့ လေယာဉ် (၂) စင်းကို ကိုလံဘီယာသမ္မတက ဆင်းသက်ခွင့်မပြုခဲ့ဘူးလို့ ဆိုပါတယ်။
ကိုလံဘီယာဟာ လက်တင်အမေရိကနိုင်ငံတွေထဲမှာ အမေရိကန်နဲ့ကုန်သွယ်မှု တတိယအများဆုံးနိုင်ငံဖြစ်ပါတယ်။
ကိုလံဘီယာကနေ အမေရိကန်ကို ရေနံစိမ်း၊ ရွှေ၊ ကော်ဖီနဲ့ နှင်းဆီပန်းတွေတင်သွင်းပါတယ်။
အမေရိကန်ကနေ ကိုလံဘီယာဆီပြန်ရောင်းတာက ပြောင်း၊ soybean ပဲ၊ ဓာတ်ဆီစတဲ့ ရေနံကုန်ချောပစ္စည်းများ၊ ရေနံစိမ်းနဲ့ လေယာဉ်တွေ ပြန်ရောင်းတာဖြစ်ပါတယ်။
(ရေနံစိမ်းကဘာလို့ နှစ်ဖက်ပါနေတယ်ဆိုတာမသိပါ။ တင်ပို့ချိန်မှာ ဈေးကွာလို့လို့ ယူဆရပါတယ်။)
အမေရိကန်ဘက်ကအပြောကတော့ ကိုလံဘီယာက ပြန်ပို့တာကိုလက်ခံမယ်ပြောပြီးမှ လေယာဉ်တွေကိုဆင်းသက်ခွင့်မပြုလို့ အခုလိုဒဏ်ခတ်တာလို့ ဆိုပါတယ်။
▪️ကိုလံဘီယာကနေ အမေရိကန်ကိုတင်သွင်းတဲ့ပစ္စည်းတွေကို အခွန်နှုန်း ၂၅ ရာနှုန်းချမှတ်လိုက်တယ်၊ တစ်ပတ်အတွင်း ၅၀ ရာနှုန်းအထိတိုးမြှင့်သွားမယ်။
▪️ကိုလံဘီယာအစိုးရအရာရှိတွေကို အမေရိကန်ကို ခရီးသွားခွင့်ဘန်းတယ်၊ ဗီဇာပြန်ရုပ်သိမ်းတယ်။
▪️ဘဏ္ဍာရေးဆိုင်ရာ၊ ငွေကြေးနဲ့ ဘဏ်လုပ်ငန်းဆိုင်ရာ ပြစ်ဒဏ်ခတ်ခြင်းတွေလုပ်မယ်။
ကိုလံဘီယာဘက်ကလည်း အမေရိကန်သွင်းကုန်တွေကို တန်ပြန် ၂၅ ရာနှုန်းတိုးလိုက်ပါပြီ။ ၅၀ ရာနှုန်းအထိတိုးမယ်လို့ ခြိမ်းခြောက်ထားပါတယ်။
ကိုလံဘီယာက သူ့နိုင်ငံသားတွေကိုလက်ခံမှာဖြစ်ပေမဲ့ ရာဇဝတ်သားအဖြစ်သုံးနှုန်းလက်ထိတ်ခတ်ပြီး ပြန်ပို့တာကို လက်မခံဘူးလို့ ဆိုပါတယ်။
ကိုလံဘီယာမှာ တရားမဝင်နေထိုင်နေတဲ့ အမေရိကန်နိုင်ငံသား (၁၅,၆၆၀) ရှိပေမဲ့ အဲ့လိုဝင်ဖမ်းလက်ထိတ်ခတ်ပြီး ပြန်မပို့ပါဘူးတဲ့။
"ငါတို့က နာဇီတွေမဟုတ်ဘူး" လို့ သမ္မတပီထရိုကဆိုလိုက်ပါတယ်။
ဒီလိုပြဿနာတက်ချိန်မှာ အမေရိကန်နိုင်ငံ ရှီကာဂိုမြို့မှာ တရားမဝင်နေထိုင်သူတွေကို ဝင်ဖမ်းမှုတွေလုပ်နေတယ်လို့ ဆိုပါတယ်။
အမေရိကန်က ဘရာဇီး (၈၈) ယောက်ကို လက်ထိတ်ခတ်ပြီး အမေရိကန်လုံခြုံရေးအေးဂျင့် (၁၆) ယောက်ပါလေယာဉ်နဲ့ ပြန်ပို့ခဲ့ပါတယ်။
လေယာဉ်က စက်ပိုင်းဆိုင်ရာပြဿနာကြောင့် Manaus မြို့မှာဆင်းစဉ်မှာ ဘရာဇီးအရာရှိတွေက လက်ထိတ်ဖြုတ်ဖို့အမိန့်ပေးခဲ့ပါတယ်။ ဒါ့အပြင် ဘရာဇီးလေတပ်တိုက်လေယာဉ်တွေခြံရံပြီး လိုက်ပို့ဖို့ ဘရာဇီးသမ္မတကအမိန့်ပေးခဲ့ပါတယ်။
ထရမ့်သမ္မတပြန်ဖြစ်လာတာနဲ့ တရားမဝင်နေထိုင်သူတွေကို ဖမ်းဆီးပြန်ပို့ရေးနဲ့ လက်မခံတဲ့နိုင်ငံတွေကို ကုန်သွယ်ရေးဒဏ်ခတ်အရေးယူမှုပြုလုပ်ရေးကို အရှိန်အဟုန်တိုးမြှင့်လာတာကို တွေ့ရပါတယ်။