Passport အရောင်များနဲ့ သူတို့ရဲ့ အဓိပ္ပါယ်များ
ကမ္ဘာမှာ Blue, Red (Burgundy), Green နဲ့ Black ဆိုပြီး Passport အရောင် ၄ ခု ရှိပါတယ်။ Passport အရောင်တွေ ဘာကြောင့် ကွဲပြားနေသလဲ ဆိုတာကို အောက်မှာ ရှင်းပြချင်ပါတယ်။
၁။ Red/ Burgundy
အဲဒီအရောင်ကို လက်ရှိနဲ့ ယခင်က ကွန်မြူနစ် နိုင်ငံတွေက အသုံးပြုကြပါတယ်။ ဥပမာ အနေနဲ့ တရုတ်၊ ဆားဘီးယား၊ လက်ဗီးယား၊ စလိုဗေးနီးယား၊ ရိုမေးနီးယား၊ ရုရှားနဲ့ ဂျော်ဂျီယာတို့ဟာ အဲဒီ အရောင်ကို အသုံးပြုကြပါတယ်။ Burgundy နဲ့ တခြား အနီရောင်တွေကို ဥရောပ သမဂ္ဂနိုင်ငံတွေက အသုံးပြုကြပါတယ်။
တူရကီနဲ့ အယ်ဘေးနီးယား အပါအဝင် ဥရောပ သမဂ္ဂကို ဝင်ရောက်ချင်တဲ့ နိုင်ငံတွေက ပြီးခဲ့တဲ့နှစ်တွေအတွင်း အနီရောင်ကို ပြောင်းလဲလာကြပါတယ်။ အနီရောင် အသုံးပြုတဲ့ နိုင်ငံဟာ ၆၈ နိုင်ငံ ရှိပါတယ်။
၂။ Green
မော်ရိုကို၊ ဆော်ဒီအာရေးဗီးယားနဲ့ ပါကစ္စတန် တို့လို မွတ်စလင် နိုင်ငံအများစုဟာ အစိမ်းရောင် Passport ကို အသုံးပြုကြပါတယ်။ တမန်တော် မိုဟာမက် နှစ်သက်တဲ့ အရောင် ဖြစ်တဲ့အတွက် အစိမ်းကို အသုံးပြုကြတာပါ။ သဘာဝတရားနဲ့ လူနေမှုဘဝရဲ့ သင်္ကတ ဖြစ်တဲ့ အရောင်လို့လည်း ယူဆကြပါတယ်။ နိုင်ဂျီးရီးယား၊ နီဂျာနဲ့ ဆီနီဂေါ အပါအဝင် အနောက် အာဖရိက နိုင်ငံများစွာမှာလည်း အစိမ်းရောင်မျိုးစုံကို အသုံးပြုကြပါတယ်။ အစိမ်းရောင် အသုံးပြုတဲ့ နိုင်ငံဟာ ၄၀ ရှိပါတယ်။
၃။ Black
Passport ထဲမှာ အနက်ရောင်က အရှားပါးဆုံး ဖြစ်ပါတယ်။ ဘော့ဆွာနာ၊ ဇမ်ဘီယာ၊ ဘူရွန်ဒီ၊ ဂါဘွန်၊ အန်ဂိုလာ၊ ချတ်၊ ကွန်ဂိုနဲ့ မာလာဝီ လို အာဖရိက နိုင်ငံတွေက အနက်ရောင်ကို အသုံးပြုကြပါတယ်။ နယူးဇီလန်ကလည်း နိုင်ငံတော် အရောင်ဖြစ်တဲ့အတွက် အနက်ကို အသုံးပြုပါတယ်။ အနက်ရောင် အသုံးပြုတဲ့ နိုင်ငံဟာ ၇ နိုင်ငံ ရှိပါတယ်။
၄။ Blue
Blue or Dark Blue အရောင်ဟာ ဒုတိယ အများဆုံး အသုံးပြုတဲ့ Passport အရောင် ဖြစ်ပါတယ်။ New World လို့ သတ်မှတ်ကြတဲ့ နိုင်ငံတွေမှာ အပြာရောင်ကို အသုံးပြုကြပါတယ်။ အဲဒီ နိုင်ငံတွေထဲမှာ အိန္ဒိယ၊ မြောက်အမေရိက၊ တောင်အမေရိကနဲ့ ဩစတြေးလျ တို့ ပါဝင်ပါတယ်။ ဘရာဇီး၊ အာဂျင်တီးနားနဲ့ ပါရာဂွေး လို တောင်အမေရိက နိုင်ငံတွေကလည်း အပြာရောင်ကို အသုံးပြုကြပါတယ်။ ကာရေဘီယန် နိုင်ငံ ၁၅ ခုကလည်း အပြာကို အသုံးပြုကြပြီး အမေရိကန် နိုင်ငံသားတွေဟာ ၁၉၇၆ ခုနှစ်မှာ အပြာရင့်ရောင်ကို ပြောင်းလဲခဲ့ပါတယ်။ အပြာရောင် Passport အသုံးပြုတဲ့ နိုင်ငံဟာ ၈၄ နိုင်ငံ ရှိပါတယ်။
Ref : travellersclub , kayak