ထိုင်းနိုင်ငံတွင် ဘိန်းစာရွက်ပြုတ်ရည်တမြမြနှင့် ဘိလိယက်ထိုးနေကြသည့် မြန်မာနိုင်ငံသားတစ်သိုက် ဖမ်းဆီးခံရ

ဇန်နဝါရီ ၂၁

ထိုင်းနိုင်ငံတွင် ဘိန်းစာရွက်ပြုတ်ရည်တမြမြနှင့် ဘိလိယက်ထိုးနေကြသည့် မြန်မာနိုင်ငံသားတစ်သိုက် ဇန်နဝါရီလ ၁၉ ရက်က အဖမ်းခံခဲ့ရကြောင်း ထိုင်းဒေသတွင်း သတင်းများအရ သိရသည်။

ဇန်နဝါရီလ ၁၉ ရက် ညပိုင်းက စမွတ်ဆာခွန်ခရိုင်၊ ကထုန့်ဘဲင်မြို့နယ်၊ အမှတ် (၆)၊ အောင့်နွဲ့ကျေးရွာတွင် ဘိလိယက်ခုံဖြင့် တွဲပြီးဖွင့်ထားသည့် ဈေးဆိုင်တစ်ဆိုင်တွင် မြန်မာနိုင်ငံသားများက ဘိန်းစာရွက်ပြုတ်ရည် (ခရမ်ရွက်ဖျော်ရည်နှင့် ဆေးစိမ်ထားသော ဆေးများ)တမြမြနှင့် ဘိလိယက်ထိုးနေကြကြောင်း ထိုင်းနိုင်ငံသားများ၏ သတင်းပို့ချက်အရ ရဲတပ်ဖွဲ့က သွားရောက် စစ်ဆေးဖမ်းဆီးခဲ့ခြင်းဖြစ်ကြောင်း သိရသည်။

စမွတ်ဆာခွန်ခရိုင် အုပ်ချုပ်ရေးမှူး ဦးဆောင်သည့် ပူးပေါင်းအဖွဲ့က သွားရောက်စစ်ဆေးချိန် ဘိန်းစာရွက်ပြုတ်ရည်တမြမြနှင့် ဘိလိယက်ထိုးနေကြသည့် မြန်မာနိုင်ငံသား (၃၀) ကျော်ကို ဖမ်းမိခဲ့ကြောင်း သိရသည်။

ယင်းဆိုင်တွင် ဘိန်းစာရွက်ပြုတ်ရည်(ခရမ်ရွက်ဖျော်ရည်နှင့် ဆေးစိမ်ထားသော ဆေးရည်များ) ကို ခွင့်ပြုချက်မဲ့ လျှို့ဝှက် ရောင်းချခြင်းဖြစ်ကြောင်း၊ ယင်းဆိုင်တွင် မြန်မာနိုင်ငံသားများ တရုန်းရုန်း လာရောက်ကြလေ့ရှိကြောင်း သိရသည်။

ရဲတပ်ဖွဲ့က ရှာဖွေရာတွင် ခွင့်ပြုချက်မရှိဘဲ ရောင်းချနေသော ဘိန်းစာရွက်ပြုတ်ရည် (၄၂) လုံး၊ ချောင်းဆိုးပျောက် ဆေးရည် (၇) လုံး၊ ယာဒေါင်အရက် (၂၂၄) လုံးကိုလည်း တွေ့ရှိခဲ့ကြောင်း သိရသည်။

ယခုအခါ အဆိုပါ ခေတ်မီဆေးဝါးရောင်းချခွင့်လိုင်စင်နှင့် ယစ်မျိုးရောင်းချခွင့်လိုင်စင် မရှိသည့် ဈေးဆိုင်ပိုင်ရှင် ၆ ဦးနှင့် မြန်မာနိုင်ငံသားများအား ဖမ်းဆီးထားပြီး ထိုင်းနိုင်ငံ ဥပဒေအရ အရေးယူထားကြောင်း သိရသည်။

Credit - Myanmar Transparency News Agency

#centralnewsnaypyitaw