ငယ်ဘ၀ကလပ် ဆန်းတိုစ့်ဆီ ပြန်ရောက်ဖို့ နီးစပ်နေတဲ့ နေမာ
-----------------------------------------
ဆော်ဒီအာရေဗျကလပ် အယ်လ်ဟီလယ်အသင်းမှာ ကစားသမားဘ၀ဖြတ်သန်းနေတဲ့ နေမာကတော့ ယခုဇန်နဝါရီစျေးကွက်အတွင်းမှာပဲ သူ့ရဲ့ငယ်ဘ၀အသင်းဟောင်းဖြစ်တဲ့ ဘရာဇီးလ်ကလပ် ဆန်းတိုစ့်အသင်းဆီ ၆ လအငှားနဲ့ သွားရောက်ကစားဖို့ သဘောတူညီမှု ရရှိခဲ့ပြီလို့ ဘရာဇီးလ်သတင်းရင်းမြစ်တွေက ဖော်ပြခဲ့ကြပါတယ်။ ဆန်းတိုစ့်အသင်းဟာ နေမာကို အငှားနဲ့ခေါ်ယူနိုင်ရေးအတွက် ဆော်ဒီကလပ်ထံ ကမ်းလှမ်းခဲ့ပြီး ညှိနှိုင်းမှုတွေဟာလည်း တိုးတက်မှုရှိခဲ့တယ်လို့ သိရပါတယ်။
နေမာဟာ အသက် ၂၁ နှစ်အရွယ်မှာပဲ ဆန်းတိုစ့်အသင်းအတွက် ၂၂၅ ပွဲကစားခဲ့ကာ ၁၃၆ ဂိုးသွင်းပြီး ဖန်တီးမှု ၆၄ ကြိမ်အထိ ပြုလုပ်ပေးနိုင်ခဲ့တာပါ။ အဲဒီနောက်မှာတော့ ဘာစီလိုနာအသင်းထံ ပြောင်းသွားခဲ့တာပါ။ အခုတော့ နေမာကို မွေးရပ်မြေမှာ ပြန်မြင်ရမှာဖြစ်လို့ ပရိသတ်တွေကလည်း ပျော်ရွှင်နေကြပါတယ်။
