ထရမ့်တာဝန်မယူမီ ဝင်ရောက်ခွင့်ရရေးအတွက် ရွှေ့ပြောင်းများ ကြိုးစားနေ
--------------------
ရွေးကောက်ခံသမ္မတဒေါ်နယ်ထရမ့် တာဝန်စတင်မယူခင်မှာ ရွှေ့ပြောင်းနေထိုင်သူတွေဟာ အမေရိကန်-မက္ကဆီ ကို နယ်စပ်ကိုရောက်ဖို့ အပြိုင်အဆိုင် ကြိုးပမ်းနေကြတယ်လို့ CNN သတင်းမှာ ဖော်ပြပါတယ်။ သမ္မတရာထူးကို ဒုတိယအကြိမ် တာဝန်ယူမယ့် ဒေါ်နယ်ထရမ့်ဟာ လာမယ့် ဇန်နဝါရီ ၂၀ ရက်မှာ ကျမ်းသစ္စာကျိန်ဆိုမှာဖြစ်ပြီး ထရမ့်အနေနဲ့ အိမ်ဖြူတော်ကို ပြန်ရောက်ရင် နယ်စပ်ဂိတ်တွေ လုံးဝပိတ်ပစ်လိုက်မှာကို ရွှေ့ပြောင်းတွေက စိုးရိမ် နေကြတာပါ။
အမေရိကန်မှာ ခိုလှုံခွင့်တောင်းခံဖို့ အမေရိကန်-မက္ကဆီကို နယ်စပ်ကို ဟွန်ဒူးရပ်စ်ကနေ ပြီးခဲ့တဲ့ လပေါင်းများစွာ ကတည်းက ထွက်ခွာလာတဲ့ အယ်လ်တာ ဂရာစီယာဟာ အမေရိကန်သမ္မတရွေးကောက်ပွဲမှာ ထရမ့်အနိုင်ရသွား တာကို သိလိုက်ရပြီးနောက် အမေရိကန်ထဲ ဝင်ခွင့်မရတော့မှာကို စိုးရိမ်လာတယ်လို့ CNN ကို ပြောပါတယ်။
အိမ်ဖြူတော်ကို ထရမ့် ပြန်ရောက်ချိန်မှာ အမေရိကန်ပြည်ထောင်စုထဲမှာရှိနေတဲ့ တရားမဝင်နေထိုင်သူတွေကို အစုလိုက်အပြုံလိုက်ပြည်နှင်တာနဲ့ နယ်စပ်ဂိတ်တွေ လုံးဝပိတ်လိုက်မှာကို ရွှေ့ပြောင်းတွေက စိုးရိမ်နေကြပါ တယ်။ အယ်လ်တာ ဂရာစီယာလိုပဲ ဗင်နီဇွဲလား၊ ကျူးဘားတို့က ရွှေ့ပြောင်းနေထိုင်သူတွေဟာလည်း ထရမ့် ကျမ်းသစ္စာ မကျိန်ဆိုမီမှာ အမေရိကန်ကို ဝင်ရောက်နိုင်ဖို့ ကြိုးစားနေကြတာပါ။
ကျူးဘားက ရွှေ့ပြောင်းနေထိုင်သူတစ်ယောက်ကတော့ သမ္မတသစ်ထရမ့်အနေနဲ့ သူတို့လို ရွှေ့ပြောင်းသူတွေမှာ လည်း အမေရိကန်အတွက် အကျိုးရှိစေနိုင်တဲ့ ဘွဲ့လက်မှတ်တွေရှိသလို တခြားပညာရပ်တွေ တတ်မြောက် ကြောင်း နားလည်စေချင်တယ်လို့ CNN ကို ပြောပါတယ်။
အမေရိကန် အမိမြေလုံခြုံရေးဌာနရဲ့ အချက်အလက်တွေအရ အမေရိကန်မှာ တရားမဝင်ရွှေ့ပြောင်းနေထိုင်သူ ၁၁ သန်းခန့်ရှိနေပြီး ပြီးခဲ့တဲ့ ၂၀၂၄ ခုနှစ်ထဲမှာ အမေရိကန်-မက္ကဆီကို နယ်စပ်ကို ရောက်လာတဲ့ ရွှေ့ပြောင်းဦးရေက ၂ ဒသမ ၁ သန်းအထိ ရှိပါတယ်။
