👁️မျက်လုံးကျန်းမာရေးအတွက် ဒါတွေသိထားသင့်တယ်နော် 👁️
လူအတော်များများက ရောဂါလို့ဆိုလိုက်ရင် နှလုံးတို့၊ သွေးတိုးတို့လို တကယ့်အကြီးကြီးတွေကို အရင်ပြေးမြင်မိတတ်ကြမှာပါ။ တကယ်တော နေ့တိုင်းမရှိမဖြစ်အသုံးပြုနေရတဲ့ မျက်လုံး လိုအစိတ်အပိုင်းတွေလည်း ပြဿနာပေါ်တတ်တာမေ့နေတတ်ကြပါတယ်။ ဒါ့ကြောင့် အခုတစ်ခေါက်တော့ ကျွန်တော်တို့ အမြဲတမ်းသုံးနေရပြီး ဂရုစိုက်ဖို့မေ့နေတတ်တဲ့ မျက်လုံးတစ်စုံအတွက် ဂရုစိုက်ရမှာလေးတွေ ပြောပြပေးချင်ပါတယ်။
အသက် ၄၀ ကျော်သူတိုင်း ကိုယ့်မျက်လုံးကို တစ်နှစ်တစ်ခါတော့ မှန်မှန်စစ်ဆေးသင့်ပါတယ်။ ဒါမှရေတိမ်စွဲတာလို အန္တရာယ်များတဲ့မျက်လုံး ရောဂါတချို့ကို အချိန်မီတားဆီးနိုင်မှာဖြစ်ပြီး မိသားစုမျိုးရိုးမှာ မျက်လုံးပြဿနာရှိသူတွေဆို ပိုတောင်ဂရုစိုက်စစ်ဆေးသင့်ပါသေးတယ်။
မျက်လုံးကဘာကြောင့်မှန်းမသိဘဲ ခဏခဏယားနေတာ၊ နီရဲလာတာ၊ ပူစပ်ပူလောင်ခံစားရတာတွေက မျက်လုံးပြဿနာတစ်မျိုးမျိုးရဲ့ ရှေ့ပြေးလက္ခဏာတွေဖြစ်နိုင်ပြီး မျက်လုံးက အလင်းရောင်ဒဏ်မခံနိုင်တာ၊ မျက်တောင်ခတ်ရင် ခိုးလို့ခုလုဖြစ်နေတာ၊ မျက်ဝတ်ခဏခဏထွက်တာတွေကလည်း မျက်စိဆရာဝန်နဲ့ သေချာပြသပြီးလိုအပ်သလို ကုသမှုခံယူသင့်တဲ့အခြေအနေတွေပါ။
မျက်လုံးထိခိုက်မိရင် ဘယ်လောက်သေးတဲ့ထိခိုက်မှုပဲဖြစ်ဖြစ် မပေါ့ဆဖို့ မှာပါရစေ။ ဘာမှမဖြစ်လောက်ပါဘူးကွာဆိုပြီး ပေါ့သေးသေးထားလိုက်ရင် အချိန်လွန်မှ အမြင်အာရုံဆုံးရှုံးသွားတဲ့အထိ ခံစားသွားရနိုင်လို့ပါ။ အထူးသဖြင့် ထိမိခိုက်မိပြီး မျက်လုံးကကြည့်ရတာသိပ်မကောင်းဘူးဖြစ်နေမယ်၊ မျက်လုံးကောင်းကောင်းဖွင့်လို့မရဘူး၊ မျက်လုံးရဲ့အဖြူကွက်တွေထဲမှာ သွေးစလေးတွေမြင်နေရမယ်၊ မျက်လုံးကလှုပ်ရှားလို့သိပ်မကောင်းဘူး၊ မျက်စိသားငယ်အိမ်က တစ်ဖက်နဲ့တစ်ဖက် မညီဘူးဖြစ်နေမယ် စတာတွေထဲက တစ်မျိုးမျိုးခံစားရမယ်ဆို မျက်စိဆရာဝန်နဲ့ ပြကိုပြသရပါမယ်။
ကျွန်တော်တို့ လက်တွေက အရာဝတ္ထုမျိုးစုံကို တစ်ချိန်လုံး ကိုင်တွယ်အသုံးပြုနေတာဖြစ်လို့ ပိုးမွှားမျိုးစုံကပ်တွယ်နေပါတယ်။ ဒါ့ကြောင့် လက်နဲ့ပွတ်ရင်မျက်လုံးထဲကို ပိုးမွှားမျိုးစုံဝင်သွားနိုင်ရုံတင်မကပဲ မျက်လုံးသွေးကြောမျှင်လေးတွေ ကိုလည်းပျက်စီးစေနိုင်ပါသေးတယ်။ ဒါ့ကြောင့် မျက်လုံးကို မဖြစ်မနေ ထိတွေ့ဖို့လိုလာရင်တောင် လက်ကိုသေသေချာချာအရင်ဆေးကြောဖို့ သတိရပါ။
အီလက်ထရောနစ်မျက်နှာပြင်တွေကို အချိန်ကြာကြာကြည့်တာက မျက်လုံးကိုအားနည်းလာစေပြီး ခေါင်းကိုက်ဝေဒနာတွေကိုတောင် ဖြစ်စေနိုင်ပါတယ်။ အလုပ်ကြောင့် မဖြစ်မနေသုံးနေရတယ်ဆိုရင်တောင် ၂၀/၂၀/၂၀ ဆိုတဲ့စာလုံးလေးကိုသတိရပါ။ အဓိပ္ပါယ်ကတော့ တီဗီမျက်နှာပြင်တွေကို မိနစ် ၂၀ ကြာအောင်ကြည့်ပြီးတိုင်း ပေ ၂၀ အကွာက မြင်ကွင်းတွေကို စက္ကန့် ၂၀ ကြာအောင် ကြည့်ပေးဖို့ပါ။
အိမ်သန့်ရှင်းရေးလုပ်ရင်ပဲဖြစ်ဖြစ် အားသွန်ခွန်စိုက်ကစားရတဲ့အားကစားတွေလုပ်ရင်ပဲဖြစ်ဖြစ် မျက်လုံးထိခိုက်မိနိုင်တဲ့ အခြေအနေရှိပါတယ်။ ဒါ့ကြောင့် အခြေအနေပေါ်မူတည်ပြီး safety glass၊ safety shield၊ eye guards တွေ ဝတ်ဆင်ပေးပါ။ မျက်လုံးဆိုတာ အရေးကြီးတဲ့အစိတ်အပိုင်းတစ်ခုဖြစ်ပြီး တအားလည်းနူးညံ့တာမို့ အမြဲသတိနဲ့ ကာကွယ်ဖို့မမေ့ပါနဲ့။
ဆေးလိပ်သောက်လေ့ရှိသူတွေမှာ မျက်လုံးတိမ်စွဲခြင်း၊ မျက်လုံးအာရုံကြောများ ပျက်စီးခြင်း၊ အမြင်အာရုံတဖြည်းဖြည်းယိုယွင်းပျက်စီးခြင်းတွေ ကြုံရပြီး အချိန်ကြာလာတာနဲ့အမျှ မျက်စိကွယ်သွားနိုင်ပါတယ်။
အနီးမှုန်ဖြစ်ဖြစ် အဝေးမှုန်ဖြစ်ဖြစ် မျက်စိပါဝါ ရှိလာရင် မျက်မှန်တပ်သင့်ပါတယ်။ ပါဝါရှိတာကို မျက်မှန်မတပ်ဘဲ နေလိုက်ရင် အချိန်နဲ့အမျှ မျက်စိမှုန်တာပိုဆိုးလာတော့မှာပါ။
ကဲ ..မိမိတို့မျက်လုံးလေး ကျန်းမာနေဖို့ အထက်ပါအချက်များနဲ့ကြိုတင်ကာကွယ်ကြပါစို့။
#ကျန်းမာရေးဗဟုသုတများ