ပြီးခဲ့သည့် ဒီဇင်ဘာလအတွင်း နိုင်ငံခြားရင်းနှီးမြှုပ်နှံမှု ဒေါ်လာ ၄၀၄ သန်းကျော် ဝင်ရောက်ခဲ့ပြီး ရေနံနှင့်သဘာဝဓာတ်ငွေ့သို့ အဆိုပါကာလအတွင်း ဝင်ရောက်မှု၏ ၈၈ ရာခိုင်နှုန်းကျော် ဝင်ရောက်ခဲ့

ဇန်နဝါရီ ၆

ပြီးခဲ့သည့် ဒီဇင်ဘာလအတွင်း မြန်မာနိုင်ငံသို့ နိုင်ငံခြားရင်းနှီးမြှုပ်နှံမှု ဒေါ်လာ ၄၀၄ ဒသမ ၂၀၂ သန်း ဝင်ရောက်ခဲ့ပြီး ရေနံနှင့်သဘာဝဓာတ်ငွေ့ကဏ္ဍသို့ အဆိုပါကာလအတွင်း ဝင်ရောက်မှု၏ ၈၈ ရာခိုင်နှုန်းကျော် ဝင်ရောက်ခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ သိရသည်။

၂၀၂၄ ခုနှစ်၊ ဒီဇင်ဘာလအတွင်း နိုင်ငံခြားရင်းနှီးမြှုပ်နှံမှု ဝင်ရောက်ခဲ့မှုသည် ရေနံနှင့်သဘာဓာတ်ငွေ့ ကဏ္ဍသို့ ဒေါ်လာ ၃၅၇ ဒသမ ၀၄၀ သန်း (ယခုဘဏ္ဍာနှစ်အတွင်း စတင်ဝင်ရောက်ခဲ့သလို ဒီဇင်ဘာလအတွင်း ဝင်ရောက်မှု၏ ၈၈ ရာခိုင်နှုန်းကျော်ရှိ)၊ ကုန်ထုတ်လုပ်မှုကဏ္ဍသို့ ‌ဒေါ်လာ ၄၅ ဒသမ ၅၉၃ သန်းနှင့် မွေးမြူရေးနှင့် ရေလုပ်ငန်းကဏ္ဍသို့ ဒေါ်လာ ၁ ဒသမ ၅၆၉ သန်း ဝင်ရောက်ခဲ့ခြင်းဖြစ်သည်။

၂၀၂၄-၂၀၂၅ ဘဏ္ဍာနှစ် ဧပြီလမှ ဒီဇင်ဘာလအထိ ၉ လအတွင်း မြန်မာနိုင်ငံ၏ စိုက်ပျိုးရေး၊ မွေးမြူရေးနှင့်ရေလုပ်ငန်း၊ ကုန်ထုတ်လုပ်မှု၊ လျှပ်စစ်၊ ရေနံနှင့်သဘာဝဓာတ်ငွေ့၊ ပို့ဆောင်ရေးနှင့် ဆက်သွယ်ရေး၊ ဝန်ဆောင်မှုလုပ်ငန်း စသည့်ကဏ္ဍ ၇ ခုသို့ နိုင်ငံခြားရင်းနှီးမြှုပ်နှံမှု ၆၃၉ ဒသမ ၉၁၁ သန်းသာ ဝင်ရောက်ထားသည်။ သို့သော် ဒီဇင်ဘာလအတွင်း ဝင်ရောက်မှုပမာဏသည် ယခုဘဏ္ဍာနှစ် ၉ လအတွင်း ဝင်ရောက်ထားမှု၏ ရာခိုင်နှုန်း ၆၀ ကျော်အထိရှိသည်။

နိုင်ငံရေးပဋိပက္ခများ စတင်ဖြစ်ပွားခဲ့သည့် ၂၀၂၁ ခုနှစ်မှစတင်၍ နိုင်ငံခြားရင်းနှီးမြှုပ်နှံမှုများ ပြန်လည်ထွက်ခွာခြင်းနှင့် စီးပွားရေးပိတ်ဆို့မှုများကြောင့် နိုင်ငံခြားရင်းနှီးမြှုပ်နှံမှု ဝင်ရောက်မှုများလည်း တုံ့ဆိုင်းခဲ့ခြင်းကြောင့် ၂၀၂၁ ခုနှစ်နောက်ပိုင်းတွင် ပျမ်းမျှတစ်နှစ်လျှင် နိုင်ငံခြားရင်းနှီးမြှုပ်နှံမှု ဒေါ်လာ ၁ ဘီလျံနီးပါးသာ ခွင့်ပြုနိုင်ခဲ့ခြင်းဖြစ်သည်။

၁၉၈၈-၁၉၈၉ ဘဏ္ဍာနှစ်မှ ၂၀၂၄ ခုနှစ် ဒီဇင်ဘာလကုန်အထိ အထူးစီးပွားရေးဇုန် ဥပဒေအရ ခွင့်ပြုပေးခဲ့သည့် သီလဝါအထူးစီးပွားရေးဇုန်အတွင်း ဝင်ရောက်ထားမှုအပါအဝင် စုစုပေါင်း နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၉၅ ဒသမ ၉၉၆ ဘီလျံဝင်ရောက်ထားကြောင်း DICA မှ သိရသည်။

#သတင်းဟင်းလေးအိုးကြီး