ရန်ကုန်လျှပ်စစ်မီး ၄ နာရီလာ ၈ နာရီပျက်မယ်ဆိုသော်ငြား လာချင်သလိုလာ ပျက်ချင်သလိုပျက်နေလို့ ပြည်သူတွေစိတ်ပျက်
ဇန်နဝါရီ ၅
ရန်ကုန်မြို့မှာ လျှပ်စစ်မီးကိုအလှည့်ကျအဆိုင်းနဲ့ ရရှိနေသော်လည်း ယခုအခါမှာအချိန်ထပ်တိုးပျက်တောက်မယ်ဆိုတဲ့ သတင်းတွေကြောင့် ပြည်သူလူထုတွေရဲ့ဝေဖန်မှုတွေဟာ မြင့်တက်လျက်ရှိနေတယ်လို့ သိရပါတယ်။
ဒါအပြင် ယခုအသစ်တဖန်ထပ်မံပြောင်းလဲလိုက်တယ်ဆိုပြီး သတင်းထွက်ပေါ်လာတဲ့
အလှည့်ကျအဆိုင်းနဲ့ မီးပေးစနစ်အချိန် ဇယားအရ ရန်ကုန်မြို့လျှပ်စစ်မီးဟာ(၄)နာရီ လာ(၈)နာရီပျက်မယ်ဆိုသော်ငြား လာချင်သလိုလာ၊ပျက်ချင်သလိုပျက်နေလို့ ပြည်သူတွေက စိတ်ပျက်လျက်ရှိနေကြတာလည်းဖြစ်ပါတယ်။
"လျှပ်စစ်မီးကအခုတလောဘာမှလုပ်လို့မရဘူးပေါ့။မီးပျက်မယ့်အချိန်တွေလည်းပိုတိုးလာတယ်။ပျက်တဲ့အချိန်မှာလည်းအပြည့်အဝပျက်တယ်။ လာရမယ့်အချိန်တွေဆိုလည်းနာရီဝက်၊ ၄၅ မိနစ်လောက်လာလိုက်ပြန်ပျက်သွားလိုက်နဲ့ လာရမယ့်အချိန်အတွင်းမှာ အဲလိုမျိုး ၃ ခါလောက်ဖြစ်တယ်။ တခါတလေ တနေ့လုံးမှအချိန် ၂ နာရီလောက်ပဲ မီးရတာမျိုးတွေလည်းရှိပါတယ်။ပြောရရင် လျှပ်စစ်မီးက ပေးချင်သလိုပေးပြီး လာချင်သလိုလာနေတာပါ။အချိန်တွေတောင်မှန်းလို့မရပါဘူး"လို့ ရန်ကုန်မြို့၊ဒဂုံဆိပ်ကမ်းမြို့နယ်အတွင်းမှာ နေထိုင်တဲ့ ပြည်သူတယောက်က ပြောပါတယ်။
ဒီလိုလျှပ်စစ်မီးအချိန်ကြာမြင့်စွာ ပြတ်တောက်မှုနဲ့ လျှပ်စစ်မီးပုံမှန်မရရှိမှုတို့ကြောင့် ရန်ကုန်အထပ်မြင့်တိုက်ခန်းနေထိုင်သူတွေနဲ့စုပေါင်းအိမ်ရာတွေမှာနေထိုင်ကြသူများစွာဟာ နေ့စဉ် လူမှု့ဒုက္ခတွေကိုကြုံတွေ့နေရပြီးထမင်း၊ဟင်းချက်ပြုတ်တာကအစ ရေမော်တာတင်တာကအဆုံး အခက်တွေ့နေရတယ်လို့ ဆိုပါတယ်။
ဒါအပြင် ရန်ကုန်မြို့မှာရှိနေတဲ့ SME လို့ ခေါ်ဆိုကြတဲ့ အသေးစား၊အလတ်စား တပိုင်တနိုင် အိမ်တွင်းစက်မှုလုပ်ငန်းတွေဟာလည်း လက်ရှိကာလမှာ လျှပ်စစ်မီးအခက်အခဲကြောင့် လုပ်ငန်းအရှုံးပေါ်တာတွေနဲ့ တချို့သောလုပ်ငန်းတွေကို ရပ်ဆိုင်းလိုက်ရမှုတွေများစွာရှိနေတာဖြစ်တယ်လို့ သိရပါတယ်။
"လျှပ်စစ်မီးက ကောင်းကောင်းမရတော့
တနေ့ကုန်မီးစက်မောင်းရတဲ့အခါ ဆီဖိုးနဲ့ကျ ထုတ်လုပ်မှုစရိတ်တွေကအများကြီးတက်သွားတာပေါ့။ဒီဘက်မှာထုတ်လုပ်မှုစရိတ်မြင့်လာပေမယ့် အမတို့ကိုအထည်အော်ဒါပေးတဲ့ အထည်ချပေးတဲ့ သူတွေကမူရင်းဈေးနဲ့ပဲ အထည်တွေကိုချပေးတယ်ဈေးလည်းတိုးတောင်းလို့မရဘူး။တဖက်မှာလျှပ်စစ်မီးအခက်အခဲကလည်းရှိတယ်။အဲတော့အမတို့က ထုတ်လုပ်မှုစရိတ်ကိုကာမိအောင် အလုပ်ကို နေ့ရော၊ညပါ တိုးလုပ်လာရတယ်။လျှပ် စစ်မီးလာတဲ့အချိန်တွေမှာတော့အလုပ်ကိုပိုလုပ်ရတာပေါ့။အဲလိုမှမလုပ်လည်း ကိုယ့်ဆီအပ်မယ့်အထည်တွေက သူများဆီရောက်သွားရော အခုနောက်ပိုင်းလျှပ်စစ်မီးက ပိုပျက်လာတော့ လုပ်ငန်းကနေအမြတ်အစွန်းရဖို့ထက် လုပ်ငန်းအရှုံးမပေါ်အောင်ပဲ ဒီကာ လတွေမှာကြိုးစားလုပ်ကိုင်နေရတဲ့သဘောရှိပါတယ်။နောက်ပိုင်းမခံနိုင်တဲ့ အဆုံးကျရင်တော့လုပ်ငန်းကိုရပ်ရင်လည်းရပ်လိုက်ရမှာပေါ့"လို့ ရန်ကုန်မြို့ရှိ တပိုင်တနိုင် အိမ်တွင်းအထည်ချုပ်လုပ်ငန်း လုပ်ကိုင်သူ လုပ်ငန်းရှင်တယောက်က ပြောပြပါတယ်။
ရန်ကုန်လျှပ်စစ်ဓါတ်အားပေးရေးအဖွဲ့နဲ့ နီးစပ်သူတွေကတော့ ယခုနှစ်(၅.၁. ၂ဝ၂၅) ရက်မှစတင်လို့ ဓာတ်အားပေးအုပ်စု(၃)ခုနဲ့ (၄)နာရီလာပြီး (၈)နာရီအလှည့် ကျဝန်အားလျော့မယ်လို့ ယမန်နေ့ညမှာ ပြည်သူတွေကို အသိပေးကြေညာထားတာ တွေ့ရပါတယ်။
ဒါဟာ ရန်ကုန်မြို့မှာ ၄ နာရီလျှပ်စစ်မီးရရှိပြီးပါက ၈ နာရီကြာအောင်လျှပ်စစ်မီးပျက်တောက်မယ့် အခြေအနေဖြစ်ပါတယ်။
"လျှပ်စစ်မီး မှန်၊မမှန်က ပြောမနေနဲ့ ကျွန်မတို့တိုက်က လင်မယားတောင် ထမင်းချက်တဲ့ ကိစ္စနဲ့ပတ်သက်ပြီး မနက်ကအတော်လေးရန်ဖြစ်စကားများနေတဲ့အသံကြားခဲ့ရတယ်။လျှပ်စစ်မီးကမမှန်တော့ ထမင်းဟင်းချက်တဲ့ အချိန်တွေလည်းအကုန် ကမောက်၊ကမဖြစ်ကုန်တာပေါ့"လို့ ရန်ကုန်မြို့နေ ပြည်သူတယောက်က လျှပ်စစ်မီးဒုက္ခအခက်အခဲကိုပြောပြခဲ့ပါတယ်။
ယခင်က ရန်ကုန်မြို့မှာရှိတဲ့ ခရိုင်လေးခုမှာ
၄ နာရီလာပျက်စနစ်နဲ့ တနေ့လေးခါလျှပ်စစ်ဓါတ်အားကိုဖြန့်ဖြူးပေးဝေနေတာဖြစ်ပါတယ်။အဲဒီစနစ်အရယခင်က အေအုပ်စုဆိုရင်မနက် ၅ နာရီကနေ ၉ နာရီကိုမီးပေးပြီးဘီအုပ်စုဆိုပါက မနက် ၉ နာရီကနေ မွန်းလွဲ ၁ နာရီကိုပေးကာ နောက် ၁ နာရီကနေ ညနေ ၅ နာရီအထိ အေအုပ်စုကိုအလှည့်ကျပြန်လာပေးတာ ဖြစ်ပါတယ်။
"၄ နာရီလာပျက်စနစ်နဲ့ ပေးပြီးရင် ညနေ ၅ နာရီကနေ မနက် ၉ နာရီဆိုရင်ဘီအုပ်စုအလှည့်ပေါ့၊တလှည့်စီပေါ့လေ၊ပြီးရင်ည ၉ နာရီနောက်ပိုင်းကနေစလို့ နောက် နေ့မနက် ၅ နာရီအထိမီးပေးပါတယ်"လို့ ရန်ကုန်လျှပ်စစ်ဓါတ်အားပေးရေးအဖွဲ့နဲ့ နီးစပ်သူတယောက်က ပြောပါတယ်။
သို့သော်လည်း ယခုပြောင်းလဲလိုက်တဲ့
ရန်ကုန်မြို့မှာ ၄ နာရီလျှပ်စစ်မီးရရှိပြီးပါက ၈ နာရီကြာအောင်လျှပ်စစ်မီးပျက်မယ်ဆိုတဲ့ အပေါ်မှာတော့ ပြည်သူလူထုတွေရဲ့ ဝေဖန်မှုက မြင့်တက်နေဆဲဖြစ်ပါတယ်။
Photo - CJ
Credit - VOM News Agency
#သတင်းဟင်လေးအိုးကြီး
