ဒူးနာ၊ ခါးနာ ၊ အဆစ်အမြစ်ကိုက်ခဲ သူများ သိထားသင့်သော ဗဟုသုတများ ( Osteoarthritis) (Degenerative arthritis)
မင်္ဂလာပါ ခင်ဗျာ
ကျွန်တော်ပြောပြပေးချင်တဲ့ အကြောင်းကတော့ ဒူးတွေနာတယ် ၊ ခါးတွေနာတယ် ၊ အဆစ်အမြစ်တွေ ဆံ့မရဘူး ၊ ကိုက်ခဲနေတယ် ၊ လမ်းကောင်းကောင်းမလျှောက်နိုင်ဘူး ၊ ဘာလုပ်ရမလဲ ???
အကြံပေးပါဦးဆိုတာ အတွက် နည်းလမ်းတစ်ချို့နဲ့ ရောဂါ အကြောင်း အခြေခံလေးတွေပြောပြပေးချင်ပါတယ်
အဆစ်အမြစ်တွေ ကိုက်တာ ဘာလို့လဲ
ခန္ဓာကိုယ်ရဲ့ အရိုးတစ်ခုနဲ့တစ်ခု အဆစ်အမြစ်တွေကြားမှာ အရိုးနု ( hyaline cartilage ) တွေ က လှုပ်ရှားမှုတစ်ခုပြုတဲ့အခါအရိုးတစ်ခုနဲ့ တစ်ခုကြား မှာ ကူရှင် ( cushion ) သဖွယ် အကာအကွယ်ပေးကာ အရိုးတွေ မပွတ်တိုက်မိအောင် ၊ မနာကျင်အောင် ကာကွယ်ပေးပါတယ်။
ဒါ့အပြင် လှုပ်ရှားရလွယ်ကူအောင်လည်း ချောဆီ သဖွယ် ဆောင်ရွက်ပေးပါသေးတယ်
သို့သော်
အချိန်ကြာလာတာနဲ့အမျှ အဆိုပါ အရိုးနု ဟာလည်း ပါးလာတတ်ပါတယ်
ထိုအခါ အရိုးချင်း ပွတ်တိုက်မှုတွေဖြစ်ပြီး နာမယ် ၊ ထုံကျင်နေမယ် ၊ အရင်လို လှုပ်လှုပ်ရှားရှား လုပ်ရတာ ခက်ခဲလာတာ မလွဲမသွေပါပဲ ။
အသက် ၆၀ အထက်ရှိသူ (old age)
ထိခိုက်ဒဏ်ရာ ရတဲ့သူ (traumatic history)
ဟော်မုန်းဆိုင်ရာ ရောဂါရှိတဲ့သူ( Endocrine diseases)
အဝလွန်သူများ ( obesity)
ကိုယ်လက်လှုပ်ရှားနည်းသူများ ( lack of physically activities)
ဗီဇပိုင်းဆိုင်ရာ ရောဂါရှိသူ ( genetic disorders ) တွေကတော့ အဆိုပါ ရောဂါ ခံစားရနိုင်ချေ သူများ ဖြစ်ပါတယ် ။
ကာကွယ် ၊ ကုသ နည်းလမ်းများ
Prevention is better than Cure ( ကာကွယ်ခြင်းဟာ ကုသခြင်းထက် ပိုမို ကောင်းမွန်ခြင်း) ဟာ ရောဂါတိုင်းအတွက် အခြေခံ အချက်ပါ ။
ကိုယ်လက် လှုပ်ရှားမှုအားကစားပြုလုပ်မယ်
အဝမလွန်အောင် မျှတတဲ့ အစားအစာတွေ စားသုံးမယ်
နီသော အသား ၊ သစ်ဥ သစ်ဖုများ ၊ မြေအောက်ထွက် သီးနှံများ အား ရှောင်ကြဉ်ခြင်း
ဆေးလိပ် နှင့် အရက်မသောက်ဘူး
ရောဂါအခံရှိလာလျှင်လည်း ဆရာဝန်ညွှန်ကြားချက်အတိုင်း သောက်ဆေးတွေ အချိန်မှန်မှန်သောက်သုံးမယ်
အဆိုပါ အချက်များဟာ ကာကွယ်ခြင်းပါပဲ
အကယ်၍ ဒူးနာ ၊ ခါးနာ ၊ အဆစ်အမြစ်ကိုက်ခဲခြင်းတွေခံစားရပြီဆိုပါကလည်း ဆရာဝန်နှင့်တိုင်ပင်ကာ
- အကိုက်အခဲပျောက်ဆေး ( NSAIDs) များသောက်သုံးခြင်း
- လူးဆေး ၊လိမ်းဆေး ( Topical cream ) များ အသုံးပြုခြင်း
- အဆစ်အမြစ်အတွင်းများသို့ စတီးရွိုက်များ တိုက်ရိုက် ထိုးထည့်ခြင်း ( Steroid injection )
- ရေခဲ ၊ ရေနွေးအိတ်များအလျင်းသင့်သလို ကပ်ထားနိုင်ခြင်း ( using hot and cold packs )
- အစားထိုးခွဲစိတ်ကုသခြင်း ( hips or knee replacement surgery) များကို မိမိ၏ သက်ဆိုင်ရာ ဆရာဝန်နှင့်ပြသကာ တိုင်ပင် ဆွေးနွေးသင့်ပါကြောင်း ကျန်းမာရေး အသိပညာပေးတင်ဆက်လိုက်ရပါတယ် ခင်ဗျာ
အားလုံးကျန်းမာချမ်းသာကြပါစေ