တောင်ဝိုင်းတောင်ကို ဘုရားဖူးထွက်လာတဲ့ယာဉ် ဘရိတ်ပေါက်ကာ ချောက်ထဲထိုးကျပြီး ယာဉ်ပေါ်ပါ လူ ၁၁ ဦး ဒဏ်ရာရ

ဇန်နဝါရီ ၂

မွန်ပြည်နယ်ရှိ တောင်ဝိုင်းတောင်အဆင်းကားလမ်းမှာ အလည်အပတ်လာရောက်တဲ့ ကားတစ်စီးချောက်ထဲထိုးကျခဲ့တဲ့အတွက် ယာဉ်ပေါ်ပါ လူ ၁၁ ဦး ဒဏ်ရာရရှိမှုဖြစ်ပွားခဲ့တဲ့ ဖြစ်စဉ် ဒီနေ့ ဇန်နဝါရီ ၁ ရက်နေ့ နေ့လယ် ၃ နာရီဝန်းကျင်က ဖြစ်ပွားခဲ့တယ်လို့ မြေပြင်အကူအညီသွား‌ရောက်ခဲ့တဲ့ဘိုဘိုဝင်းလူမှုကူညီ‌‌ရေးအသင်းထံကနေ သိရပါတယ်။

ဖြစ်စဉ်က မော်လမြိုင်မြို့၊ တောင်ဝိုင်းတောင်ပေါ်အဆင်း ကားလမ်းအကွေ့အရောက်မှာ လူ ၁၆ ဦးတင်ဆောင်လာတဲ့ အဆိုပါ Light Truck ယာဉ်က ဘရိတ်ပေါက်ကာ ပေ ၄၀ ခန့် နက်တဲ့ တောင်အောက်ကို ထိုးကျသွားတာလို့ သိရပါတယ်။

မြေပြင်အကူအညီသွားရောက်ခဲ့တဲ့ ဘိုဘိုဝင်းလူမှုကူညီရေးအသင်းမှ တာဝန်ရှိသူက “ထိုးကျပြီး သစ်ပင်နဲ့ခံနေလို့ ကံကောင်းကြတာ။ သူတို့က မော်လမြိုင် ကျောက်တန်းဘက်က ဝဥထုတ်တဲ့ စက်ရုံလာတည်နေတဲ့ ပန်းရံဆရာနဲ့ အဖွဲ့လို့ သိရတယ်။ ဘုရားဖူးအလည်အပတ်လာရင်းဖြစ်တာပါ။ ပြင်းထန်စိုးရိမ်ရတာမျိုးတော့မဖြစ်ပါဘူး။ သာမာန်ပေါက်ပြဲသွေးထွက်လောက်ပဲ။ ကားကတော့ မနက်မှ ဆွဲတင်လို့ရမယ်” လို့ ပြောပါတယ်။

ယာဉ်ပေါ်ပါသူ ကျား/မ ၁၅ ဦး၊ ကလေးငယ် ၁ ဦး၊စုပေါင်း ၁၆ ဦးအနက် ကျား/ မ ၁၁ ဦးထိခိုက်ဒဏ်ရာရရှိခဲ့ပြီး ဒဏ်ရာရရှိသူတွေကို ဘိုဘိုဝင်း Rescue အရေးပေါ်ကယ်ဆယ်ရေးအဖွဲ့မှ လိုအပ်တဲ့ မြေပြင်ပြုစုမှု ပြုလုပ်ပေးပြီး မော်လမြိုင်ဆေးရုံကြီးဆီလူနာတင်ယာဉ် ၂ စီးနဲ့ ကူညီပို့ဆောင်ပေးခဲ့တယ်လို့ သိရပါတယ်။

#centralnewsnayptitaw