ရှေ့ပြေးလူဦးရေစာရင်းအရ မြန်မာနိုင်ငံတွင် လူဦးရေ (၅၁)သန်းကျော်သာရှိပြီး အမျိုးသမီးဦးရေက အမျိုးသားဦးရေထက် (၂)သန်းခန့် ပိုများနေ
နေပြည်တော်၊ ဒီဇင်ဘာ ၃၁
၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းမှ ရရှိသော ရှေ့ပြေးလူဦးရေစာရင်းအရ ၂၀၂၄ ခုနှစ် စက်တင်ဘာလ (၃၀)ရက်နေ့ ညတွင် မြန်မာနိုင်ငံအတွင်း၌ လူဦးရေ (၅၁၃၁၆၇၅၆)ဦး ရှိကြောင်း ဗဟိုသန်းခေါင်စာရင်းကော်မရှင်၏ ထုတ်ပြန်ချက်အရ သိရသည်။
အဆိုပါ စာရင်းတွင် သန်းခေါင်စာရင်း ကောက်ယူရရှိသည့် လူဦးရေ (၃၂၁၉၁၄၀၇) ဦးနှင့် စာရင်းမကောက်ယူနိုင်သည့် ဒေသများအတွက် ခန့်မှန်းလူဦးရေ (၁၉၁၂၅၃၄၉)ဦး ပါဝင်သည်။
ယင်းအပြင် ကောက်ယူရရှိသည့် စာရင်းအရ အမျိုးသား ဦးရေသည် (၁၅၁၀၅၂၁၅)ဦး ရှိပြီး အမျိုးသမီး ဦးရေသည် (၁၇၀၈၆၁၉၂)ဦးဖြစ်သဖြင့် အမျိုးသမီး ဦးရေက အမျိုးသား ဦးရေထက် (၂)သန်းခန့် ပိုများကြောင်းနှင့် အမျိုးသားဦးရေသည် (၄၆.၉) ရာခိုင်နှုန်းဖြစ်ပြီး အမျိုးသမီးဦးရေသည် (၅၃.၁)ရာခိုင်နှုန်း ဖြစ်သည်။
တိုင်းဒေသကြီး/ပြည်နယ်အလိုက် လူဦးရေအချိုးတွင် ရန်ကုန်တိုင်းဒေသကြီးက လူဦးရေအများဆုံးဖြစ်ပြီး (၁၄.၄) ရာခိုင်နှုန်းနှင့် ကယားပြည်နယ်က လူဦးရေအနည်းဆုံးဖြစ်ကာ (၀.၆) ရာခိုင်နှုန်း ဖြစ်သည်။
#သတင်းဟင်းလေးအိုးကြီး
