၂ဝ၂၅ ခုနှစ်အတွက် ပြည်ပမှမော်တော်ယာဉ်တင်သွင်းခြင်းတွင် ထုတ်လုပ်သည့်ခုနှစ် သတ်မှတ်ချက်သည် ယခင်နှစ်များအတိုင်း ပြောင်းလဲမှုမရှိသည့်အတွက် ကားဈေးနှုန်းများအပေါ် သက်ရောက်မှုမရှိနိုင်ဟုဆို
ဒီဇင်ဘာ ၂၈
၂ဝ၂၅ ခုနှစ်အတွက် ပြည်ပမှမော်တော်ယာဉ်တင်သွင်းခြင်းတွင် ထုတ်လုပ်သည့်ခုနှစ် သတ်မှတ်ချက်များအား ၂၀၂၄ ခုနှစ်၊ ဒီဇင်ဘာလ ၂၃ ရက်နေ့ ရက်စွဲပါ အမိန့်ကြော်ငြာစာအမှတ် (၁၀၀/၂ဝ၂၄) ဖြင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ အသိပေးထုတ်ပြန်ထားသည်။
အဆိုပါ အမိန့်ကြော်ငြာစာအရ ၂၀၂၅ ခုနှစ်အတွက် ပြည်ပမှမော်တော်ယာဉ်တင်သွင်းခြင်းတွင် ထုတ်လုပ်သည့် ခုနှစ်အား လူစီးမော်တော်ယာဉ်များအတွက် ၂၀၂၄ ခုနှစ်မှ ၂ဝ၂၅ ခုနှစ်အထိ၊ လုပ်ငန်းသုံးယာဉ်များ (ကုန်တင်ယာဉ်/ ခရီးသည်တင်ယာဉ်)များအတွက် ၂၀၂၁ ခုနှစ်မှ ၂ဝ၂၅ ခုနှစ်အထိ၊ မီးသတ်ယာဉ်/ လူနာတင်ယာဉ်များအတွက် ၂၀၁၆ ခုနှစ်မှ ၂ဝ၂၅ ခုနှစ်အထိ၊ ယန္တရားများအတွက် ၂၀၁၆ ခုနှစ်မှ ၂၀၂၅ ခုနှစ်အထိ သတ်မှတ်ထားသည်။
စက်ယန္တရားယာဉ်များမှအပ ကျန်ရှိမော်တော်ယာဉ်များ တင်သွင်းရာတွင် လက်ဝဲစတီယာရင် ယာဉ်များသာ တင်သွင်းခွင့်ပြုမည်ဖြစ်သည်။ အများပြည်သူသုံးလမ်းများပေါ်တွင် မောင်းနှင်အသုံးပြုခြင်းမရှိသည့် လုပ်ငန်းသုံးယန္တရားများအား လွန်ခဲ့သော (၁၅) နှစ်အတွင်း ထုတ်လုပ်သည့်ယာဉ် ( ၂၀၁၁ ခုနှစ်နှင့်အထက် ထုတ်လုပ်သောယာဉ်) များအဖြစ် တင်သွင်းခွင့်ပြုမည်ကြောင်း ဖော်ပြထားသည်။
ယခု အမိန့်ကြော်ငြာစာထုတ်ပြန်ချက်သည် လုပ်ထုံးလုပ်နည်းအရ ပြက္ခဒိန်နှစ်အလိုက် နှစ်စဉ်တင်သွင်းခွင့်ပြုသည့် မော်တော်ယာဉ်ထုတ်လုပ်ခုနှစ် သတ်မှတ်ချက်အား ပုံမှန်ထုတ်ပြန်ခြင်းသာဖြစ်ပြီး မော်တော်ယာဉ်တင်သွင်းမှုနှင့် စပ်လျဉ်း၍ လက်ရှိချမှတ်ဆောင်ရွက်နေသည့် မူဝါဒများ ပြောင်းလဲခြင်းမပြုဘဲ ဆက်လက်ကျင့်သုံးလျက်ရှိကြောင်း အသိပေးထုတ်ပြန်ထားသည်။
၂၀၂၅ ခုနှစ်အတွက် ကားတင်သွင်းရာတွင် ထုတ်လုပ်သည့်ခုနှစ် သတ်မှတ်ချက်သည် စီးပွားရေးနှင့် ကူးသန်းရောင်းဝယ် ရေးဝန်ကြီးဌာနမှ နှစ်အလိုက် ဒီဇင်ဘာလတွင် ထုတ်ပြန်ပေးနေကျအတိုင်း ထုတ်ပြန်ပေးခြင်းဖြစ်ပြီး လက်ရှိကျင့်သုံးနေသည့် မူဝါဒအတိုင်းပြောင်းလဲမှုမရှိဘဲ ဆက်လက်ကျင့်သုံးသွားမည်ဖြစ်သည့်အတွက် ကားဈေးနှုန်းများအပေါ် သက်ရောက်မှုရှိနိုင်ကြောင်း မြန်မာ့မော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချရေး လုပ်ငန်းရှင်များအသင်း (MAMDA)မှ သိရသည်။
“ICE က မပေးတဲ့အတွက်ကို ဆက်မပေးဘူးပေါ့။ ICE ကို SKD ပေးထားတဲ့ နဂိုရပြီးသား MIC ခွင့်ပြုချက် ရပြီးသားသူတွေကတော့ သူ့အချိုးကျအလိုက် ဆက်ရနေမယ်ဆိုတဲ့အတွက် သူတို့ Model တွေကတော့ ၂၀၂၄ နဲ့ ၂၀၂၅ ထုတ်တွေဖြစ်တဲ့အတွက် SKD သမားတွေအတွက် မထိခိုက်ဘူးပေါ့။ EV ကား CBU သွင်းတဲ့သူတွေအတွက်တော့ ၂၀၂၅ ရောက်ရင် ၂၀၂၄ ကိုပဲ သွင်းလို့ရမယ်။ ၂၀၂၃ ဆိုရင်တော့ သိမ်းဆည်းမှာပေါ့။ အဲဒီအတွက်ပဲ ထုတ်နေကျအတိုင်း ထုတ်ပေးလိုက်တာပေါ။ ဒီအပေါ်မှာ ကားဈေးသက်ရောက်စရာ ဘာအကြောင်းမှ မရှိပါဘူး” ဟု MAMDA အထွေထွေအတွင်းရေးမှူးချုပ် ဦးကျော်စွာထွန်းမြင့်က ပြောသည်။
Credit - MT News Agency
#centralnewsnaypyitaw
