အထောက်ထားမဲ့ မြန်မာ ၃၀ ကျော် ထိုင်းရဲဖမ်း

ဒီဇင်ဘာ ၂၈

ထိုင်းနိုင်ငံမြောက်ပိုင်း Phetchabun ဖက်ချဘွန်းခရိုင်ထဲမှာ အထောက်အထားမဲ့ မြန်မာတချို့ သယ်ဆောင်လာတဲ့ ကားနှစ်စီးဟာ ဒီလ ၂၆ ရက်နေ့က ရဲစစ်ဆေးရေးဂိတ်မှာ မရပ်ဘဲ မောင်းပြေးလို့ အမြန်လမ်းရဲတပ်ဖွဲ့ရဲ့ ပိတ်ဆို့ ဖမ်းဆီးတာ ခံခဲ့ရပါတယ်။

ကားပေါ်မှာ တရားဝင် အထောက်အထား မပါတဲ့ မြန်မာ ၃၆ ဦးနဲ့ သူတို့ကို လူကုန်ကူး သယ်ဆောင်လာတဲ့ တောင်ပေါ်တိုင်းရင်သား ၂ ဦးကို ဖမ်းဆီးခဲ့တာပါ။

ကားမောင်းသူကတော့ မြန်မာနိုင်ငံသား ၃၆ ယောက်ကို ဆလာဘူရီ ခရိုင်ကနေ ဘတ်ငွေ ၁ သောင်းရလို့ သယ်ဆောင်လာတာလို့ ထွက်ဆိုခဲ့ပြီး မြန်မာနိုင်ငံသားတွေဟာ တာ့ခ်ခရိုင်၊ မဲဆောက်မြို့ ကနေတဆင့် လာကြတာလို့ ပြောပါတယ်။

ခုလို လူကုန်ကူးသူတွေကို ငွေပေးပြီး မြန်မာတွေ အများအပြား ဝင်ရောက်လာနေတာနဲ့ ပတ်သက်လို့ တရားဥပဒေကြောင်းအရ တားဆီး ကာကွယ်တာ၊ ဖမ်းဆီး နေရပ် ပြန်ပို့တာတွေကို ထိုင်အစိုးရက အလေးပေး လုပ်ဆောင်နေတဲ့အကြောင်း ထိုင်း ဒုတိယ ကာကွယ်ရေးဝန်ကြီး Phumtham Vejjayachai − ပုန်ထန်ဝေ့ချရချိုင်က သောကြာနေ့မှာ ပြောပါတယ်။

"အခုလို တရားမဝင်နိင်ငံခြားသားတွေ အများအပြား ဝင်ရောက်လာနေမှုကြောင့် ထိုင်းတွေ နေစရာမရှိအောင် ဖြစ်သွားဖို့မရှိပါဘူး။ တရားဥပဒေကြောင်းအရ တာဆီးကာကွယ်တာ၊ ဖမ်းဆီးပြန်ပို့တာတွေကို အစိုးရအနေနဲ့ အထူးအလေးပေး လုပ်ဆောင်နေပါတယ်" လို့ ပြောပါတယ်။

ထိုင်းနိုင်ငံထဲကို တရားမဝင် လမ်းကြောင်းတွေက လာလို့ ဖမ်းဆီးခံရတဲ့ မြန်မာတွေ ဒီရက်ပိုင်း နေ့စဉ်လိုလို ရှိနေတယ်လို့ အလုပ်သမားရေး လှုပ်ရှားသူ ဦးရဲမင်းကလည်း ပြောပါတယ်။

"ထိုင်းမှာ မြန်မာနိုင်ငံသားတွေက တရားမဝင်လမ်းတွေကနေ ဝင်လာတဲ့သူတွေက နေ့တိုင်းနီးပါးကို ဖမ်းဆီးခံထိနိုင်တယ်။ အချိန်မရွေး၊ ဖမ်းဆီးတယ်။ လမ်းစရိတ်တွေဆုံး၊ အချုပ်တွေ ထောင်တွေကိုရောက်ပြီးရင် မြန်မာပြည်ထဲကိုပြန်ပို့ခံရ ဒါမျိုးတွေ အလုပ်သမားတွေကဖြစ်နေတယ်။"

#centralnewsnaypyitaw