~~ အမှတ်တရ ~~~ { ၁ }
#ဂျူး
"အို ..... တစ်ယောက်တည်းလား" ဟုသာ သူမ နှုတ်ဆက်တတ်ဟန် ရှိသည်။ ကံကောင်းထောက်မစွာ အန်တီ၏အိမ်သည် ကျွန်မတို့ အိမ်ကလေး၏ တစ်ဘက်မှာ ရှိနေ၍ ကျွန်မ ခဏတော့ ရှောင်နေလို့ရသည်။
ကြည့်စမ်းပါဦး နှင်းဆီပင်များ အတော်ရှည်ထွက် ကိုင်းလျက်ရှိပြီ တစ်ပင် ၊ နှစ်ပင် ၊ သုံးပင် ၊ အို .... ဟိုဘက်က နှစ်ပင်က မိုးစက်များအောက်တွင် ခြောက်သွေ့လျက်ရှိသည်။
အင်းလေ .... ကျွန်မလက်နှင့် မထိရတာ ဘယ်လောက်ကြာပြီလဲ ။ တစ်နှစ် နီးပါးရှိရော့မည်။ ဒီလောက် ရှင်သန်နေသည်မှာ ပင်လျှင် အန်တီ၏ ကျေးဇူးပါပဲ။ သစ်သား လှေကားသုံးထစ်ကို တက်ပြီးသောအခါ ပျဉ်ခင်းကြမ်းပြင်ပေါ် ရောက်ရောက်ချင်းမိုးစက်မှ လွတ်သွား၏။ တံစက်မြိတ်မှ ရေတို့ စီးကျနေသည်။
"ကြည့်စမ်း မိုးရွာထဲမှာ
ဘယ်တော့မဆို ထီးမဆောင်းဘူး ။
အမြဲစိုရွှဲလို့ ၊ မြန်မြန်ဝင်စမ်းပါ"
ကျွန်မကြားနေကျ စကားသံတစ်ခုဖြင့် ကျွန်မကို ကြိုဆိုမည့်သူ မရှိပါ။
သော့ပိတ်ထားသော တံခါးဘေးတွင် ကျွန်မနာမည် ဆိုင်းဘုတ်ပြား တစ်ခုသာ ရှိတော့သည်။
မိုးသက်လေဖြင့် အနည်းငယ် ချမ်းစိမ့်စိမ့်ဖြစ်သွား၍ လက်ပွေ့အိတ်ထဲမှ သော့ကို ကပျာကသီ ထုတ်ယူလိုက်သည်။
ဤသော့ကို ဖွင့်မည့်သူဟူ၍ ကျွန်မ တစ်ဦးတည်းသာ ရှိတော့သည်။
အိမ်ထဲသို့ ဝင်လိုက်သောအခါ ထုံးစံအတိုင်း သစ်တော်သီးနံ့က သင်းမွှေးလျက် ရှိသည်။ မောင့်နည်းတူ ကျွန်မလည်း အံ့သြရလောက်အောင် ဤအိမ်ကလေးသည် သစ်တော်သီးနံ့ အမြဲသင်းမွှေး နေလေသည်။
မှောင်ပိတ်သော ဧည့်ခန်းကိုစမ်းတဝါးဝါး ဖြစ်မနေဘဲ နေသားတကျ ကျွန်မ လျှောက်သွားနိုင်၏။
ကျွန်မတို့ ဧည့်ခန်းမှာ စားပွဲကုလားထိုင် မရှိပါ။ ဟောသည်ဘက်မှာ သောက်ရေအိုးစင် ၊ သည်ဘက်က ထောင်ထားသော သင်ဖြူးဖျာလိပ်နှစ်ခု ၊ ကျွန်မမှတ်မိနေသည်။ နံရံတစ်ဘက်သို့ လျှောက်သွားပြီး မီးခလုတ်ကို ဆွဲချလိုက်သည်။
လင်းလက်သွားသော ဖန်မီးချောင်း မီးရောင်အောက်တွင် နံရံကပ်ကြည့်မှန်ထဲ၌ စိုကပ်နေသော ဆံပင်များနှင့် မျှော်လင့်ချက် ကင်းမဲ့နေသော မျက်နှာတစ်ခု ကို ရုတ်ခြည်းတွေ့ရသည်။ လက်ဆွဲသေတ္တာကို ကြမ်းပြင်ပေါ်သို့ အသာအယာ ချလိုက်ပြီး အိမ်၏ ဧည့်ခန်းတစ်လျှောက် ဟိုသည် စူးစမ်းကြည့်သည်။
ကျွန်မ မရှိသည့်အချိန်အတွင်း တစ်စုံတစ်ယောက် လာနေသွားသည့် အသွင်အပြင် မရှိပါ။ ယခင်တစ်ခေါက် ကျွန်မအပြန်တုန်းက မေ့လျော့ထားခဲ့သည့် သနပ်ခါး ၊ ပျိုးပင်ပေါက်ကလေး နှစ်ပင်မှာ ပန်းအိုးငယ် ကလေးများထဲတွင် အရွက်တို့ပင် မရှိတော့ဘဲ လိမ်ခြောက်သော အကိုင်းကလေးများသာ ကျန်တော့သည်။
သည်အိမ်ကို မောင် မရောက်လာတာ သေချာသွားပြီ။ မဟုတ်သေးပါဘူးလေ။ သည်အပင်ကလေးတွေ သည်နေရာမှာရှိနေရုံဖြင့် မောင်မလာဟု မပြောနိုင်ပါ။
#ဆက်ရန်ရှိ
