မလေးရှား ဆီအုန်းစိုက်ပျိုးရေး လုပ်ငန်းအတွက် မြန်မာလုပ်သားစေလွှတ်မှု တားမြစ်
နိုဝင်ဘာ ၂၆
မလေးရှားနိုင်ငံ၊ ဆားဘားကျွန်းက ဆီအုန်း စိုက်ပျိုးရေးလုပ်ငန်းအတွက် ခေါ်တဲ့ အလုပ်ခေါ်စာ (Demand Letter) တွေကို ခွင့်မပြုဖို့ နစက က တားမြစ်ထားတယ်လို့ ပြည်ပအလုပ်အကိုင် အေဂျင်စီတွေဆီက သိရပါတယ်။
ဆာဘားကျွန်းမှာ စိုက်ပျိုးရေးလုပ်ငန်း လုပ်ကိုင်ဖို့အတွက် လုပ်သားခေါ်ယူတဲ့ Demand Letter တွေကို အလုပ်သမားဝန်ကြီးဌာနထံ လိုင်စင်ရ အေဂျင်စီတွေက တင်ပြတာတွေရှိတဲ့ အတွက် အဲဒီ အလုပ်ခေါ်စာတွေကို ခွင့်မပြုကြောင်း အလုပ်သမားဝန်ကြီးဌာနက အေဂျင်စီတွေထံ အီးမေးလ်ပေးပို့ အကြောင်းကြားလာတာ ဖြစ်တယ်လို့ သိရပါတယ်။
“မလေးရှားအတွက် ပိတ်တာက ဆီအုန်းစိုက်ပျိုးရေးကိုပဲ ပိတ်တာ။ ကျန်တဲ့အလုပ်တွေ အတွက်ကတော့ အကြောင်းကြားစာထဲမှာ ဘာမှ ပြောမထားဘူး။ နောက်တခု ဘာ့ကြောင့် ပိတ်တာလဲ ဆိုတဲ့ အကြောင်းလည်း စာထဲမှာမပါဘူး။ အကြောင်းကြားစာက ပြီးခဲ့တဲ့တပတ်လောက်က ပို့တာ။ ကျွန်တော်တို့ အေဂျင်စီတွေဆီ အကြောင်းကြားသလို မလေးရှား၊ ကွာလာလမ်ပူမြို့က မြန်မာသံရုံးကိုလည်း အလုပ်သမားဝန်ကြီးဌာနက အကြောင်းကြားထားတယ်” လို့ ပြည်ပအလုပ်အကိုင် အေဂျင်စီလုပ်ငန်းရှင်တယောက်က ပြောပါတယ်။
ဒါအပြင် လက်ရှိမှာ မလေးရှားနိုင်ငံကို မြန်မာအလုပ်သမား စေလွှတ်မှုမှာလည်း အလွန်နည်းပါးနေပြီး အထူးသဖြင့် နှစ်နိုင်ငံ အစိုးရချင်းဆက်ဆံရေးလည်း ကောင်းမွန်မှုမရှိဘူးလို့ ဆိုပါတယ်။
မြန်မာနိုင်ငံက အလုပ်သမားတွေအပါအဝင် နိုင်ငံခြားသားလုပ်သား ခေါ်ယူခွင့်အားလုံးကို မလေးရှားအစိုးရက ၂၀၂၄ ခုနှစ်၊ ဇွန်လ ၁ ရက်နေ့ကစပြီး အခုအချိန်အထိ ရပ်ဆိုင်းထားပေမယ့် အရှေ့မလေးရှားဖြစ်တဲ့ ဆားဘားကျွန်းအတွက် နိုင်ငံခြားသားလုပ်သားခေါ်ယူတာကို ခွင့်ပြုပေးတာရှိနေပြီး လက်ရှိမှာတော့ မြန်မာဘက်က အလုပ်သမားစေလွှတ်မှု တားမြစ်လိုက်တာ ဖြစ်တယ်လို့ သိရပါတယ်။
“မလေးရှားက ဇွန်လကတည်းက နိုင်ငံခြားသားလုပ်သား ခေါ်ယူမှု ရပ်ဆိုင်းလိုက်ပေမယ့် မလေး အရှေ့ပိုင်းကတော့ ခေါ်နေတယ်။ မလေးရှား အရှေ့ပိုင်း ဆာရာဝပ်ဘက်ကနေ calling ချပေးနေတာရှိတယ်။ ဒါပေမယ့် အခုတော့ မြန်မာဘက်က ဆက်ခွင့်မပြုတော့တာပေါ့။ မြန်မာပြည်က အလုပ်သမား စေလွှတ်မှုနဲ့ ပတ်သက်လို့ နှစ်နိုင်ငံ ဝန်ကြီးဌာနချင်း ပူးပေါင်းဆောင်ရွက်မှုလည်း မရှိသလောက် ဖြစ်နေတာ ကြာပြီ။ ဆိုတော့ တခြား အသေးစိတ်အခြေအနေတွေကတော့ ပြောဖို့ခက်တယ်” လို့ နောက်ထပ် အေဂျင်စီလုပ်ငန်းရှင်တယောက်က ပြောပါတယ်။
ဒါအပြင် ဆာဘားကျွန်းဟာ သီးခြား ကျွန်းဆွယ်တခုလို ဖြစ်နေပြီး သွားရေးလာရေး အလှမ်းဝေးနေတာကြောင့်လည်း အလုပ်ရှင်၊ အလုပ်သမား ပြဿနာဖြစ်ပါက ဖြေရှင်းပေးနိုင်ဖို့ မလွယ်ကူဘူးလို့ သူက ပြောပါတယ်။
“အလုပ်သမားအနေနဲ့ တခုခု ဖြစ်ရင်တောင် သွားလာရေးက အလှမ်းဝေးတော့ အလုပ်ရှင်၊ အလုပ်သမား ပြဿနာဖြစ်ရင် လုပ်သားအတွက် နစ်နာတာတွေ ဖြစ်နိုင်တယ်။ ဆားဘားကျွန်း ဆိုတာက မလေးရှားကနေ လေယာဉ်နဲ့ ထပ်သွားရတဲ့နေရာ။ လေယာဉ်နဲ့ သွားတာတောင် ၂ နာရီကျော်လောက် ကြာတယ်” လို့ သူက ပြောပါတယ်။
ဆီအုန်းစိုက်ပျိုးရေး လုပ်ငန်းတွေမှာ တလကို ရင်းဂစ် ၁၅၀၀ (မြန်မာကျပ်ငွေ ၁၀ သိန်းကျော်) လောက်သာ ရရှိတာကြောင့် အလုပ်သမားတွေအနေနဲ့ တွက်ခြေမကိုက်ဖြစ်နေတယ်လို့ သိရပါတယ်။
မြန်မာနိုင်ငံက အလုပ်သမားတွေအနေနဲ့ ထိုင်းနိုင်ငံပြီးရင် မလေးရှားနိုင်ငံကို ဒုတိယအများဆုံး သွားရောက် အလုပ် လုပ်ကိုင်နေကြတာဖြစ်ပြီး မလေးရှားနိုင်ငံသားတွေရဲ့ အလုပ်အကိုင် လိုအပ်ချက်အတွက် ပြည်ပအလုပ်သမားတွေကို ကန့်သတ်ဖို့ မလေးရှားအသိုင်းအဝန်းထဲမှာ ဖိအားပေးမှုတွေလည်း ရှိနေတယ်လို့ သိရပါတယ်။
၂၀၁၇ ခုနှစ်၊ ဇန်နဝါရီလမှ ၂၀၂၄ ခုနှစ်၊ ဧပြီလအထိ မလေးရှားနိုင်ငံကို အစိုးရချင်း နှစ်နိုင်ငံသဘောတူစာချုပ် (MoU) စနစ်နဲ့ မြန်မာအလုပ်သမား နှစ်သိန်းကျော် စေလွှတ်ခဲ့တယ်လို့ သိရပြီး ကုန်ထုတ်လုပ်ငန်း၊ ဆောက်လုပ်ရေးလုပ်ငန်း၊ ဝန်ဆောင်မှုလုပ်ငန်း၊ စိုက်ပျိုးရေးနဲ့ မွေးမြူရေးလုပ်ငန်းတို့မှာ အများဆုံး လုပ်ကိုင်ရတယ်လို့ ဆိုပါတယ်။
MoU နဲ့သွားရောက်ခဲ့တဲ့ အလုပ်သမားတွေဟာ စာရင်းအရ လူဦးရေ နှစ်သိန်းတထောင်လေးဆယ်ဝန်းကျင် ရှိပေမယ့် ဆေးမအောင်ခြင်းနဲ့ တခြား အကြောင်းအမျိုးမျိုးကြောင့် မလေးရှားနိုင်ငံကို မရောက်ရှိတာတွေလည်း ရှိတယ်လို့ သိရပါတယ်။
ခုနစ်နှစ်အတွင်း တရားဝင် သွားရောက် လုပ်ကိုင်သူ နှစ်သိန်းကျော်သာရှိပေမယ့် တရားမဝင် သွားရောက်သူတွေလည်း များစွာရှိတယ်လို့ သိရပါတယ်။
Photo:CJ
#centralnewsnaypyitaw
