မျှော်လင့်စရာရယ်လို့
မယ်မယ်ရရမကျန်တော့တဲ့အခါ
လူတွေ ဘာကိုဆုံးဖြတ်တတ်ကြပါသလဲ အစ်ကို.... ။
အစ်ကိုကတော့ပြောဦးတော့မယ်
တစ်ရက်ရက်ကျရင်
အသက်ဆက်ချင်တဲ့ အကြောင်းပြချက်
ရှာတွေ့သွားမှာပါလို့..... ။
တကယ်တော့
နေရာတစ်ခုခုကိုစွန့်လွှတ်ဖို့ဆိုတာဟာ
တစ်ထိုင်တည်းနဲ့တော့ လွယ်ပါ့မလား အစ်ကိုရဲ့ ..... ။
အကြိမ်ကြိမ် ဖက်တွယ်ကြည့်ပြီးမှ
အကြိမ်ကြိမ် တောင့်ခံကြည့်ပြီးမှ
အကြိမ်ကြိမ် ဆွဲထားပြီးကာမှပဲ
ဘယ်လိုမှ မတတ်နိုင်တော့တဲ့အခါ....
ဪ....
ဒါဟာ.... ငါ့အတွက်မဟုတ်ဘူးကိုး..... လို့
သဘောပေါက်ပြီး နောက်ဆုတ်ရတာမျိုးလေ.... ။
ခုတစ်လော
လက်လျှော့လိုက်ချင်တဲ့အရာတစ်ခု ရှိထားတယ်အစ်ကို
ကော်ဖီအပြင်းတွေနဲ့ ဖြေသိမ့်ကြည့်တယ်
ဆေးလိပ်အငွေ့တွေနဲ့ နေကြည့်ကြည့်တယ်
သက်ပြင်းတစ်ချချနဲ့
ဒီတစ်ဘဝတော့ တောင့်ခံကြည့်ရဦးမလားလည်းတွေးသလို
နောက်တစ်ဘဝမှပဲ အစကပြန်စရမလားလည်း တွေးကြည့်တယ်.... ။
တကယ်လို့များလေ....
တကယ်လို့များ....
အစကိုသာ ပြန်ရနိုင်ရင်
နည်းနည်းတော့နောက်ကျခဲ့ပြီဆိုပေမယ့်
ဘဝကိုသာပြန်စနိုင်ရင်.....
ဒီတစ်ခေါက်တော့
အစ်ကိုရှိမယ့်ကမ်းနဲ့
ဝေးသထက်ဝေးနိုင်အောင်ကူးမယ်
မျှော်လင့်ချက်တွေမရှိမယ့်လမ်းနဲ့
ခရီးမဆက်ဖြစ်ဖို့ ပြေးနိုင်သလောက်ဆက်ပြေးမယ်....တွေးထားတယ်။
အဲဒီအခါ
အဲဒီနေရာမှာ
အနည်းဆုံးတော့
သက်တောင့်သက်သာနဲ့ နေနိုင်သေနိုင်မလားပေါ့..... ။
#ညတာရာလင်း
