ရီးယဲလ်မက်ဒရစ်ကြယ်ပွင့် ဗီနီစီးယပ်စ် တံကောက်ကြောဒဏ်ရာကြောင့် လီဗာပူးလ်နဲ့ပွဲကို လွဲချော်
AFP
ရီးယလ်မက်ဒရစ် တိုက်စစ်ကစားသမား ဗီနီစီးယပ်စ် ဂျူနီယာဟာ တံကောက်ကြောဒဏ်ရာ ရရှိထားခဲ့လို့ လီဗာပူးလ်နဲ့ ကစားရမယ့် ချန်ပီယံလိဂ်ပွဲစဉ်ကို လွဲချော်ခဲ့ရပြီဖြစ်ကြောင်း စပိန်ကလပ်က တနင်္လာနေ့မှာ ထုတ်ပြန်ခဲ့ပါတယ်။
"ဒီနေ့ပြုလုပ်ခဲ့တဲ့ ဆေးစစ်မှုတွေအပြီးမှာ ကျွန်တော်တို့ရဲ့ ကစားသမား ဗီနီစီးယပ်စ် ဂျူနီယာဟာ ဘယ်ဘက်ခြေထောက်မှာ တံကောက်ကြော ကြွက်သားဒဏ်ရာ ရရှိထားတယ်လို့ ရီးယဲလ်မက်ဒရစ်ရဲ့ ဆေးဘက်ဆိုင်ရာအဖွဲ့က တွေ့ရှိခဲ့ပါတယ်"လို့ ကလပ်က ကြေညာချက်မှာ ဖော်ပြထားပါတယ်။
စပိန်မီဒီယာတွေရဲ့ ဖော်ပြချက်တွေအရ ဘရာဇီးလ်တောင်ပံကစားသမားဟာ တလနီးပါးခန့် အနားယူရမယ်လို့ ခန့်မှန်းခဲ့ပြီး ဒီဇင်ဘာ ၁၀ ရက်နေ့မှာ အတ္တလန်တာနဲ့ ကစားမယ့် ချန်ပီယံလိဂ်ပွဲအပြင် ဗုဒ္ဓဟူးနေ့ အန်ဖီးလ်မှာ ကစားမယ့်ပွဲကိုလည်း လွဲချော်မှာဖြစ်ပါတယ်။
ဗီနီစီးယပ်စ်ဟာ တနင်္ဂနွေနေ့က လာလီဂါမှာ လီဂါနက်စ်ကို ၃-၀ နဲ့ အနိုင်ရခဲ့တဲ့ပွဲမှာ မိနစ် ၉၀ ပြည့်အထိ ပါဝင်ကစားခဲ့ပြီး အဖွင့်ဂိုးအတွက် အမ်ဘာပေကို ဖန်တီးပေးခဲ့ပါတယ်။
အသက် ၂၄ နှစ်အရွယ် ကစားသမားဟာ ရာသီအစမှာ ပြောင်းရွှေ့လာတဲ့ အမ်ဘာပေထက်ပင် ပိုမိုတောက်ပတဲ့ ပုံစံကောင်းဖြင့် ရာသီကို စတင်ခဲ့တာဖြစ်ပါတယ်။
ဘလွန်းဒီအောအတွက် မဲပေးမှုမှာ ဒုတိယရရှိခဲ့တဲ့ ဗီနီစီးယပ်စ်ဟာ ဒီရာသီ ချန်ပီယံလိဂ် လေးပွဲမှာ လေးဂိုးရထားတဲ့အပြင် လာလီဂါ ၁၃ ပွဲမှာလည်း ရှစ်ဂိုး သွင်းထားပါတယ်။
လက်ရှိ ချန်ပီယံလိဂ် ချန်ပီယံ မက်ဒရစ်တို့ဟာ ဥရောပပြိုင်ပွဲကို မတည်ငြိမ်တဲ့ ပုံစံဖြင့် စတင်ခဲ့ပြီး သူတို့ရဲ့ ပထမ လေးပွဲမှာ နှစ်ပွဲရှုံးထားပါတယ်။
သူတို့ဟာ လိုင်လီကို ၁-၀ ရှုံးခဲ့သလို ပြိုင်ပွဲ နောက်ဆုံးပွဲမှာ အေစီမီလန်ကိုလည်း အိမ်ကွင်းမှာ ၃-၁ နဲ့ အရှုံးပေးခဲ့ရတာကြောင့် အသင်းအရေအတွက်တိုးချဲ့ထားတဲ့ အုပ်စုဇယားမှာ အဆင့် ၁၈ နေရာကို ရောက်သွားပါတယ်။
နည်းပြသစ် အာနီစလော့လက်အောက်က လီဗာပူးလ်ဟာ ချန်ပီယံလိဂ်နဲ့ ပရီးမီးယားလိဂ် ဇယားနှစ်ခုလုံးမှာ ထိပ်ကနေ ဦးဆောင်နေပါတယ်။
(Photo: EPA)
