ချင်းမိုင် ရေကြီးမှုတွင် ဆင်များကိုကယ်ဆယ်
----------------
ထိုင်းနိုင်ငံ မြောက်ပိုင်း ချင်းမိုင်ခရိုင်က ရေကြီးရေလျှံမှုမှာ ဆင်တွေ၊ ဝက်တွေနဲ့ ကျွဲတွေကို အာဏာပိုင်တွေနဲ့ ထိန်းသိမ်းစောင့်ရှောက်ရေး ပညာရှင်တွေက အလျင်အမြန် ကယ်ဆယ်ဖို့ ကြိုးပမ်းနေကြောင်း အကြီးတန်းအရာရှိတစ်ဦးက အောက်တိုဘာ ၅ ရက်မှာ ပြောပါတယ်။
ဆင်စောင့်ရှောက်ရေး သဘာဝဥယျာဉ်ကနေ ဆင်ကောင်ရေ ၁၁၇ ကောင်ကို ကယ်တင်နိုင်ခဲ့ပြီး အကူအညီလိုနေတဲ့ နောက်ထပ် ဆင် ၉ ကောင် ကျန်နေ သေးတယ်လို့ ဒုတိယဝန်ကြီးချုပ် ဖွမ်သမ် ဝိချာရာချိုင်က ပြောပါတယ်။
အနည်းဆုံး ဆင်နှစ်ကောင် ရေနစ်သေဆုံးခဲ့ကြောင်း ဒေသတွင်းသတင်းတွေက ပုံနဲ့တကွ ဖော်ပြခဲ့ပါတယ်။
ထိုင်းနိုင်ငံ မြောက်ပိုင်း ဒေသမှာ သြဂုတ်လက စတင်တဲ့ ရေကြီးရေလျှံမှုတွေကြောင့် လူပေါင်း ၄၉ ဦး သေဆုံးပြီး ထောင်ချီတဲ့ မိသားစုတွေ အိုးမဲ့အိမ်မဲ့ ဖြစ်ခဲ့ရပါတယ်။
အခုလို ရေကြီးရေလျှံမှုတွေ ဖြစ်ရတဲ့ အဓိကအကြောင်းရင်းတွေအထဲမှာ စိုက်ပျိုးရေးအတွက် မြေယာအသုံးပြုမှု ပြောင်းလဲတာ၊ ရပ်ရွာတိုးချဲ့တာနဲ့ တောမီးတွေ ပိုမိုပြင်းထန်လာတာ တွေပါဝင်ပါတယ်။
သစ်တောဧရိယာတွေ ကျုံ့သွားတာနဲ့အမျှ ဒေသရဲ့ ရေစုပ်ယူနိုင်စွမ်းကျဆင်းပြီး လျှပ်တစ်ပြက်ရေကြီးမှုကို သိသိသာသာ အထောက်အကူဖြစ်စေပါတယ်။
ဒါ့အပြင် သင့်တော်တဲ့ မြို့ပြစီမံကိန်းမရှိဘဲ မြို့ပြချဲ့ထွင်တာကလည်း ရေနုတ်မြောင်းစနစ်တွေကို အနှောင့်အယှက်ဖြစ်စေပြီး ရေကြီးမှုကို ပိုမိုဆိုးရွားစေတယ်လို့ ပညာရှင်တွေက ထောက်ပြကြပါတယ်။
