၂၀၂၃-၂၀၂၄ ပညာသင်နှစ်မှစ၍ပိတ်ထားရသော အ.ထ.က(ခါမ်းပါတ်)ပြန်လည်ဖွင့်လှစ်
နယ်မြေလုံခြုံရေးအခြေအနေကြောင့် ၂၀၂၃-၂၀၂၄ ပညာသင်နှစ်မှစ၍ပိတ်ထားရသော စစ်ကိုင်းတိုင်း၊ တမူးမြို့နယ်၊ ခါမ်းပါတ်မြို့မှ အ.ထ.က(ခါမ်းပါတ်)အား ယနေ့ အောက်တိုဘာ ၁၃ ရက်နံနက် ၉ နာရီတွင်ပြန်လည်ဖွင့်လှစ်ခဲ့ကြောင်း သိရသည်။
အဆိုပါ အ.ထ.က(ခါမ်းပတ်)ကို ဒေသလုံခြုံရေးအခြေအ နေပြန်လည်ကောင်းမွန်လာသဖြင့် ကျောင်းသား/သူများစာသင်ကြားမှုနောက်မကျစေရေးအတွက် ပြန်လည်ဖွင့်လှစ်ခဲ့ခြင်းဖြစ်ကြောင်း သိရသည်။
လက်ရှိအချိန်၌ ကျောင်းသား/သူ(၁၇၆)ဦးအား ကျောင်းအုပ်ဆရာမကြီးအပါအဝင် ဆရာ/ဆရာမ(၁၃) ဦးတို့က ပညာရေးဝန်ကြီးဌာန၏ လုပ်ထုံးလုပ်နည်းများနှင့်အညီသင်ကြားပေးလျက်ရှိပြီး အသက်အရွယ်အရ Placement Test ဖြင့် ကျောင်းတက်ရန် သတ်မှတ်လျှောက်လွှာပုံစံဖြင့်လက်ခံထားသော ကျောင်းသား/သူ(၄၃၆)ဦးအားဝင်ခွင့်ဖြေဆို၍ ကျောင်းတက်ရောက်နိုင်ရေးအတွက်ဆက်လက်ဆောင်ရွက်လျက်ရှိကြောင်း သိရသည်။
ထို့ပြင် ထပ်မံကျောင်းအပ်မည့် ကျောင်းသား/သူများကိုလည်း ကျောင်းအပ်လက်ခံခြင်းကို သက်ဆိုင်ရာ ဆရာ/ဆရာမများက လက်ခံဆောင်ရွက်ပေးလျက်ရှိကာ ကျောင်းသား/သူများ စိတ်အေးချမ်းသာစွာ ပညာ သင်ကြားနိုင်ရေး၊ ကျောင်းနေအရွယ်ကလေးများအား လုံးကျောင်းနေနိုင်ရေးတို့အတွက် ခါမ်းပါတ်မြို့အုပ်ချုပ်ရေးမှူးနှင့် ဌာနတာဝန်ရှိသူများ၊ လုံခြုံရေးအဖွဲ့ဝင်များ၊ ရပ်ကွက်အုပ်ချုပ်ရေးမှူးများနှင့် ရပ်မိရပ်ဖများကပူးပေါင်းဆောင်ရွက်ပေးလျက်ရှိကြောင်း သိရသည်။
ထို့အတူ လက်ရှိတက်ရောက်နေသော ကျောင်းသား/သူ များကိုလည်း ပညာရေးဝန်ကြီးဌာနမှ ကျောင်းသုံးပုံနှိပ် KG တန်းမှ Grade-12အထိ အတန်းတစ်တန်းလျှင် (၃၀) စုံနှုန်းဖြင့် (၃၉၀)စုံ၊ ဗလာစာအုပ်(၄၀၀)ဒါဇင်၊ ခဲတံဒါ ဇင်(၄၀၀)၊ ဘောပင်(၄၀၀)ချောင်း၊ ကျောင်းဝတ်စုံ(မူ လတန်းအဆင့်) အစုံ(၅၀၀)တို့အားထောက်ပံ့ပေးအပ်ထားကြောင်း သိရသည်။
