မုံရွာ - မန္တလေးကားလမ်းမှာ ယာဥ်တိုက်မှုဖြစ်ပြီး လူ ၁၀ ယောက်သေ၊ ၃ ယောက်ဒဏ်ရာရ
စစ်ကိုင်းတိုင်း ၊ စစ်ကိုင်းမြို့နယ်၊ ကျောက်ဆည်ကျေးရွာနဲ့ ကုန်းကျေးရွာအနီး၊ မုံရွာ - မန္တလေးကားလမ်းမှာ ယာဥ်တိုက်မှုဖြစ်ပြီး ၁၀ ယောက်သေဆုံးကာ သုံးယောက်ဒဏ်ရာရရှိခဲ့တယ်လို့ သိရပါတယ်။
ဒီကနေ့ အောက်တိုဘာ ၅ ရက်နေ့ ၊ မနက် ၁၀ နာရီ ၄၀ လောက်မှာ မြောင်မြို့ကနေ မန္တလေးကိုမောင်းလာတဲ့ ခွေးဘီလူးကားဟာ မုံရွာ - မန္တလေးလမ်းဘေးမှာရပ်ထားတဲ့ ခြောက်ဘီးကုန်ကားကို မျက်နှာချင်းဆိုင် ဝင်တိုက်မိပြီး ခွေးဘီလူးကားပေါ်ပါသူတွေထဲက သေဆုံးနဲ့ ဒဏ်ရာရရှိခဲ့တာ ဖြစ်ပါတယ်။
သေဆုံးသူတွေဟာ ခွေးဘီလူးကားပေါ်က အမျိုးသမီးရှစ်ယောက်နဲ့ အမျိုးသား နှစ်ယောက်ဖြစ်ပြီး ဒဏ်ရာရသူက အမျိုးသမီးသုံးယောက် ဖြစ်တယ်လို့ သိရပါတယ်။
" ခွေးဘီလူးကားက ဝင်တိုက်တာ။ မြောင်ကိုသွားမယ့် ခြောက်ဘီးကား ဘိလပ်မြေတင်ပြီးရပ်ထားတာကို ဝင်တိုက်တာ ။အရှိန်က တော်တော်ပြင်းတော့ကား ခေါင်းကြေသွားတယ်။ ကားခေါင်းထဲက ယာဥ်မောင်းနဲ့ ယောင်္ကျားတယောက်ပါသေတယ်။ ခေါင်းထဲတော်တော်ကိုညပ်နေတာ။ သေတာတွေက အသက် ၄၀ ကျော်၊ ၅၀ ကျော် ၊ ၆၀ ကျော်တွေပါ ။ မန္တလေးကို ဆွမ်းကပ်သွားကြတာလို့ သိရတယ်။ " လို့ စစ်ကိုင်းမြို့နယ်မီးသတ်ဦးစီးမှူးက ပြောပါတယ်။
ခွေးဘီလူးကားဟာ မြောင်မြို့နယ်ထဲက ကျေးရွာဘက်က ဖြစ်ပြီး လက်ရှိမှာ သေဆုံးနဲ့ထိခိုက်ဒဏ်ရာရသူတွေကို စစ်ကိုင်းမြို့ဆေးရုံကိုပို့ဆောင်ထားကြောင်း ၊ မိသားစုဝင်တချို့ လည်း ဆေးရုံရောက်ရှိနေပြီလို့ သိရပါတယ်။
ဩဂုတ် ၁၇ ရက်နေ့ မနက်ပိုင်းကလည်း ပဲခူးတိုင်း ၊ ဝေါမြို့နယ်၊ ရန်ကုန်-မော်လမြိုင်လမ်း နဲ့ ရန်ကုန် - ဘားအံလမ်းပိုင်းမှာယာဥ်တိုက်မှုဖြစ်ပြီး လူနှစ်ယောက်သေဆုံးကာ သုံးယောက်ထိခိုက်ဒဏ်ရာရရှိခဲ့တယ်လို့ သိရပါတယ်။
ဇွန် ၂၂ ရက်နေ့ မနက်ပိုင်းကလည်း ရန်ကုန် - မန္တလေး အမြန်လမ်းမကြီး၊ မိုင်တိုင်အမှတ် ၁၁၇/၇ ဖာလုံမှာ ခရီးသည်တင် Express ကားနှစ်စီးတိုက်မိပြီး သုံးယောက်သေဆုံးကာ လေးယောက်ထိခိုက်ဒဏ်ရာရရှိခဲ့ပါတယ်။
၂၀၂၆ ခုနှစ်အတွင်း မြန်မာတနိုင်ငံလုံးမှာ ဇန်နဝါရီကနေ ဇွန်လအထိ ယာဥ်တိုက်မှုပေါင်း ၁၆၈၆ ခုဖြစ်ပွားခဲ့ပြီး လူ ၉၃၂ ယောက်သေဆုံးကာ ၂၃၇၁ ယောက်ထိခိုက်ဒဏ်ရာရရှိခဲ့ တယ်လို့ သိရပါတယ် ။
ဓာတ်ပုံ - မီးသတ်
