မလေးရှားက ပြန်ရောက်လာတဲ့ထဲ စစ်ကိုင်းက (၉၃)ဦးအတွက် တိုင်းအစိုးရကူညီ
မလေးရှားနိုင်ငံက ပြန်ရောက်လာတဲ့ မြန်မာနိုင်ငံသား ၁၅၀၀နီးပါးထဲကနေ စစ်ကိုင်းတိုင်းသား(၉၃)ဦးဟာ အောက်တိုဘာလ ၅ရက်နေ့မှာ စစ်ကိုင်းမြို့ကိုရောက်ရှိလာပါတယ်။
စစ်ကိုင်းတိုင်း နေရာဒေသ အသီးသီးကနေ မလေးရှားနိုင်ငံကို အကြောင်းအမျိုးမျိုးနဲ့ရောက်ရှိပြီး မြန်မာနိုင်ငံကို ပြန်ဖို့ ခက်ခဲနေကြတဲ့ မြန်မာနိုင်ငံသားတွေကို နိုင်ငံတော်အစိုးရက ပြန်လည်ခေါ်ဆောင်ခဲ့ပြီး သက်ဆိုင်ရာဒေသ အသီးသီးကို တာဝန်ရှိသူတွေနဲ့ ချိတ်ဆက် ပို့ဆောင် ပေးနေပါတယ်။
စစ်ကိုင်းမြို့ကို ရောက်လာတဲ့ မြန်မာနိုင်ငံသားတွေကို စစ်ကိုင်းခရိုင်စီမံခန့်ခွဲရေးနဲ့ အုပ်ချုပ်ရေးကော်မတီဥက္ကဋ္ဌ ဦးအောင်မျိုးသိန်းနဲ့ အဖွဲ့ဝင်တွေ၊ စစ်ကိုင်းမြို့နယ်စီမံခန့်ခွဲရေးနဲ့ အုပ်ချုပ်ရေး ကော်မတီဥက္ကဋ္ဌ ဦးထွန်းထွန်းလင်းနဲ့ အဖွဲ့ဝင်တွေက စည်းခုံကြီးဘုရား သာသနာ့ဗိမာန်မှာ တွေ့ဆုံအားပေးစကားပြောကြားခဲ့ပါတယ်။
မလေးရှားနိုင်ငံမှ ပြန်လည်ရောက်လာတဲ့ ၁၅၀၀ဝန်းကျင်ထဲ မှာ စစ်ကိုင်းတိုင်းကအမျိုးသား(၈၅)ဦး၊ အမျိုးသမီး (၈)ဦး၊ စုစုပေါင်း (၉၃)ဦးကို အထွေထွေအုပ်ချုပ်ရေးဦးစီးဌာနက အစားအသောက်ကျွေးမွေးတာ၊ နေရာထိုင်ခင်း စီစဉ်ပေးတာ၊ မြို့နယ်လူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာနက UID ( မည်သူမည်ဝါဖြစ်ကြောင်း သက်သေခံ)ကဒ်
တွေလုပ်ပေးတာ၊ ကျန်းမာရေးဦးစီးဌာနက ကျန်းမာရေးစောင့်ရှောက်မှုပေးတာတွေဆောင်ရွက်ပေးခဲ့ပါတယ်။
