မလေးရှားမှ ပြန်လည်ခေါ်ဆောင်လာသည့် မြန်မာနိုင်ငံသား ၁,၄၇၆ ဦး ရန်ကုန်သို့ ရောက်ရှိ
မလေးရှားနိုင်ငံရှိ လူဝင်မှုကြီးကြပ်ရေးထိန်းသိမ်းရေးစခန်းများမှ စိစစ်ပြီး မြန်မာနိုင်ငံသား ၁,၄၇၆ ဦးကို တပ်မတော်ရေယာဉ်များဖြင့် ပြန်လည်ခေါ်ဆောင်ခဲ့ရာ အောက်တိုဘာ ၄ ရက်တွင် ရန်ကုန်မြို့သို့ ဘေးကင်းစွာ ရောက်ရှိလာကြောင်း သိရသည်။
အဆိုပါ နေရပ်ပြန်မြန်မာနိုင်ငံသားများကို မလေးရှားနိုင်ငံမှ တပ်မတော်ရေယာဉ်များဖြင့် ပြန်လည်ခေါ်ဆောင်လာခဲ့ခြင်းဖြစ်ပြီး အောက်တိုဘာ ၁ ရက်တွင် မြန်မာ့ရေပိုင်နက်အတွင်းသို့ စတင်ဝင်ရောက်ခဲ့ကာ အောက်တိုဘာ ၄ ရက်တွင် ရန်ကုန်မြို့၊ သန်လျင်မြို့နယ်ရှိ အမှတ် (၃) သီလဝါဆိပ်ခံတံတားသို့ ဆိုက်ကပ်ရောက်ရှိခဲ့ခြင်းဖြစ်သည်။
သီလဝါဆိပ်ခံတံတားသို့ ရောက်ရှိလာသည့် မြန်မာနိုင်ငံသား ၁,၄၇၆ ဦးကို သက်ဆိုင်ရာတာဝန်ရှိသူများက စနစ်တကျ လွှဲပြောင်းလက်ခံခဲ့ပြီး ၎င်းတို့၏ မိခင်နေရပ်အသီးသီးသို့ ဘေးကင်းလုံခြုံစွာ ပြန်လည်ပို့ဆောင်နိုင်ရေးအတွက် လိုအပ်သည့် ကူညီထောက်ပံ့မှုများနှင့် ဆက်လက်ပို့ဆောင်ရေးအစီအစဉ်များ ဆောင်ရွက်ပေးလျက်ရှိကြောင်း သိရသည်။
