အမြန်လမ်းမှာ လမ်းလျှောက်သူနှစ်ယောက်ကို ကားနဲ့တိုက်ပြီး ထွက်ပြေးသွားတဲ့ ယာဉ်မောင်း အရေးယူခံရ

အမြန်လမ်းမှာ လမ်းလျှောက်သူနှစ်ယောက်ကို ကားနဲ့တိုက်ပြီး တာဝန်မဲ့ ထွက်ပြေးသွားတဲ့ ယာဉ်မောင်းကို ပုဒ်မ ၃၀၄(က)/၂၀၂ နဲ့ အမှုဖွင့်ထားတယ်လို့ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့မှ သိရပါတယ်။

ပြီးခဲ့တဲ့ စက်တင်ဘာလ ၂၉ ရက်၊ ည ၈ နာရီ ၃၅ မိနစ်ဝန်းကျင်က ဖြစ်ခဲ့တဲ့ ယာဉ်တိုက်မှုလို့ သိရပြီး ရန်ကုန် - မန္တလေး အမြန်လမ်း မိုင်တိုင်အမှတ် ၆၈/၄ နဲ့ ၆၈/၅ ကြား၊ နေပြည်တော်ကနေ ရန်ကုန်ကို ဦးတည်မောင်းနှင်တဲ့ အပြန်လမ်းပိုင်းမှာ Toyota Noah အနက်ရောင်ယာဉ်က လက်ယာဘက်ယာဉ်ကြောနဲ့ ကပ်လျက် မြေသားလမ်းပေါ်မှာ လမ်းလျှောက်နေသူ အမျိုးသားနှစ်ယောက်ကို နောက်ကနေ အရှိန်ပြင်းစွာ ဝင်ရောက်တိုက်မိခဲ့တာလို့ သိရပါတယ်။

လမ်းလျှောက်နေသူ နှစ်ယောက်လုံး နေရာမှာတင် သေဆုံးခဲ့ပြီး အခင်းဖြစ်ပြီးနောက် ယာဉ်မောင်းအနေနဲ့ ယာဉ်ကို စနစ်တကျ ရပ်တန့်ကာ နီးစပ်ရာ အမြန်လမ်းမကြီး ရဲတပ်ဖွဲ့ထံ အရေးပေါ် ဆက်သွယ်သတင်းပို့ အစစ်ဆေးခံရမှာ ဖြစ်ပေမယ့် အဲဒီလို ပြုလုပ်ခြင်းမရှိဘဲ ယာဉ်ကို အခင်းဖြစ်နေရာမှာ ထားရစ်ကာ ညတွင်းချင်း ထွက်ပြေး တိမ်းရှောင်ခဲ့တယ်လို့ သိရပါတယ်။

“အမြန်လမ်းဥပဒေနဲ့ ပတ်သက်လို့ မကြာခဏဆိုသလို အသိပေးမှုတွေ လုပ်ဆောင်နေတာလည်း တွေ့ကြမှာပါ။ ဒီလိုဖြစ်စဉ်တွေကြောင့် ယာဉ်မောင်းမှာ တာဝန် မရှိစေရလို့ ဥပဒေမှာ ပြဋ္ဌာန်းထားပြီးသားပါ။ ဒါပေမယ့် ယာဉ်မောင်းအနေနဲ့ကတော့ ယာဉ်ကို အခင်းဖြစ်နေရာမှာတင် ရပ်တန့်ပြီး သက်ဆိုင်ရာကို အကြောင်းကြားတာကတော့ လုပ်ကို လုပ်ရပါမယ်။ ဒါမှသာ ယာဉ်မောင်းကို ပြစ်ဒဏ်ကနေ ကာကွယ်ပေးနိုင်မှာပါ။ အကြောင်းမကြားဘူး ဆိုရင်တော့ အမြန်လမ်းဥပဒေနဲ့ ပတ်သက်ပြီး ဘယ်လို အကာအကွယ်ကိုမှ မရနိုင်တော့ပါဘူး” လို့ အမြန်လမ်းရဲတပ်ဖွဲ့နဲ့ နီးစပ်သူတယောက်က ပြောပါတယ်။

ဒီဖြစ်စဉ်နဲ့ ပတ်သက်ပြီး သက်ဆိုင်ရာကို အကြောင်းမကြားဘဲ ထွက်ပြေး တိမ်းရှောင်ခဲ့တဲ့ ယာဉ်မောင်းကို အမြန်လမ်း ရဲတပ်ဖွဲ့ဝင်တွေက ပိတ်ဆို့ ရှာဖွေခဲ့တာမှာ မနေ့ စက်တင်ဘာ ၃၀ ရက်၊ မနက် ၁၂ နာရီခွဲဝန်းကျင် (ယာဉ်တိုက်မှုဖြစ်ပြီး ၄ နာရီလောက်အကြာ) မှာ မိုင်တိုင်အမှတ် (၆၉/၄) အနီး လမ်းဘေးမှာ ကားတားပြီး လွတ်မြောက်ဖို့ ကြိုးပမ်းနေတဲ့ ယာဉ်မောင်းကို အချိန်မီ ဖမ်းဆီးနိုင်ခဲ့တယ်လို့ သိရပါတယ်။

လက်ရှိမှာ ယာဉ်မောင်းကို ရာဇသတ်ကြီးပုဒ်မ ၃၀၄ (က) (ပေါ့လျော့မှုကြောင့် လူသေစေမှု) နဲ့ ပုဒ်မ ၂၀၂ (ပြစ်မှုဖြစ်ပွားကြောင်း သိလျက် တာဝန်အရ သတင်းပို့ရန် ပျက်ကွက်မှု) တို့နဲ့ အမှုဖွင့် တရားစွဲဆိုထားတယ်လို့ သိရပါတယ်။

ပြီးခဲ့တဲ့ စက်တင်ဘာလ ၁၅ ရက်နေ့ကလည်း ရန်ကုန် - မန္တလေး အမြန်လမ်း မိုင်တိုင် ၁၇၇/၇ - ၁၇၈/၀ ကြားမှာ လမ်းလျှောက်နေသူ အမျိုးသား တယောက်ကို ခရီးသည်တင် ကားတစီးက တိုက်မိမှုဖြစ်ခဲ့ပြီး အမြန်လမ်းမကြီး ရဲတပ်ဖွဲ့ထံ သတင်းပေး၊ အစစ်ဆေးခံဖို့ ပျက်ကွက်ခဲ့တဲ့အတွက် အဲဒီဖြစ်စဉ်က ယာဉ်မောင်းကိုလည်း ဥပဒေပုဒ်မ ၃၀၄(က)/၂၀၂ နဲ့ တရားစွဲဆိုထားတယ်လို့ သိရပါတယ်။

အမြန်လမ်းမကြီးများ ဥပဒေ အခန်း (၇)၊ ပုဒ်မ (၁၃) အရ “တည်ဆဲဥပဒေ တရပ်ရပ်တွင် မည်သို့ပင် ပါရှိစေကာမူ အမြန်လမ်းမကြီးပေါ်တွင် မောင်းနှင်ခွင့်မပြုသည့် မော်တော်ယာဉ်၊ လှည်းနှင့် ဖြတ်သန်းသွားလာခွင့် မပြုသည့် အခြားယာဉ်များ မောင်းနှင်ခြင်း (သို့မဟုတ်) ရပ်နားခြင်း၊ လူ၊ တိရစ္ဆာန်များ ဖြတ်သန်းသွားလာခြင်းကြောင့် လူနှင့် ပစ္စည်းထိခိုက်မှု (သို့မဟုတ်) သေဆုံးမှုဖြစ်ပေါ်ပါက ဥပဒေနှင့်အညီ ယာဉ်စည်းကမ်း၊ လမ်းစည်းကမ်းလိုက်နာ၍ မောင်းနှင်သည့် မော်တော်ယာဉ်၏ ယာဉ်မောင်းတွင် တာဝန်မရှိစေရ။” လို့ သတ်မှတ်ထားပါတယ်။

လူ၊ စက်ဘီး၊ ထော်လာဂျီ၊ လှည်း အစရှိတာတွေကို တိုက်မိပါက အတိုက်ခံရသူတွေဟာ အမြန်လမ်းမကြီးများဥပဒေကို ဖောက်ဖျက်သူ မှန်/မမှန်၊ ယာဥ်မောင်းအနေနဲ့ ဥပဒေနဲ့အညီ ယာဥ်စည်းကမ်း၊ လမ်းစည်းကမ်း လိုက်နာပြီး မောင်းနှင်သူ ဟုတ်/မဟုတ်တို့ကို အမြန်လမ်းမကြီးရဲတပ်ဖွဲ့က စစ်ဆေးအတည်ပြုမယ်လို့ သိရပါတယ်။

ယာဥ်မောင်းတွေအနေနဲ့ ယာဥ်တိုက်မှုကို တိမ်းရှောင် ထွက်ပြေးပါက အမြန်လမ်းမကြီးများဥပဒေရဲ့ အကာအကွယ်ကို မရရှိတော့ဘဲ တခြားသောလမ်းတွေမှာ ဖြစ်ပွားတဲ့ ယာဥ်တိုက်မှုတွေအတိုင်း ပြစ်မှု၊ ပြစ်ဒဏ်တွေ ကျခံရမယ်လို့ သိရပါတယ်။

ပြီးခဲ့တဲ့ စက်တင်ဘာ ၁ ရက်နေ့ကလည်း အမြန်လမ်းမကြီးအတိုင်း ရန်ကုန်မှ နေပြည်တော်ဘက်ကို မောင်းနှင်လာတဲ့ ခရီးသည်တင်ယာဉ် တစီး၊ မိုင်တိုင်မှတ် ၃၂ မိုင် ၅ ဖာလုံနဲ့ ၆ ဖာလုံကြားအရောက်မှာ လမ်းဖြတ်ကူးလာတဲ့ အမျိုးသမီးတယောက်ကို တိုက်မိခဲ့ပြီး လမ်းဖြတ်ကူးသူ နေရာမှာတင် ပွဲချင်းပြီးသေဆုံးမှု ဖြစ်ခဲ့ပါသေးတယ်။

ဒါအပြင် မေလ ၂ ရက်နေ့ကလည်း ရန်ကုန်ကနေ နေပြည်တော် အသွားလမ်းအတိုင်း မောင်းနှင်လာတဲ့ ခရီးသည်တင်ယာဉ်တစီးဟာ မိုင်တိုင်အမှတ် ၁၃၆/ ၅ - ၁၃၆/၆ ကြားအရောက်မှာ လမ်းလယ်ကျွန်းကိုဖြတ်ပြီး နောက်ကနေ ရှေ့ကို မောင်းနှင်လာတဲ့ ကျွဲလှည်းကို တိုက်မိခဲ့တာကြောင့် လှည်းမောင်းသူ ဒဏ်ရာရခဲ့ပြီး ကျွဲနှစ်ကောင် သေဆုံးသွားတယ်လို့ သိရပါတယ်။

မတ်လ ၁၈ ရက်နေ့ကလည်း ရန်ကုန်မှ နေပြည်တော်ကို အသွားလမ်း၊ မိုင်တိုင်အမှတ် (၀/၃-၄) ကြားမှာ အမျိုးသား သုံးယောက် စီးနင်းလိုက်ပါလာတဲ့ နံပတ်မပါ မော်တော်ဆိုင်ကယ်တစီး၊ အရှိန်ပြင်းစွာ လမ်းပြောင်းပြန် မောင်းနှင်လာရာကနေ လမ်းရဲ့ ယာဘက်အစွန်ဆုံး ယာဉ်ကြောမှာ ရပ်တန့်ထားတဲ့ ခြောက်ဘီးယာဉ်ရဲ့ ရှေ့ဦးပိုင်းကို ဝင်ရောက် တိုက်မိခဲ့တာကြောင့် နှစ်ယောက် သေဆုံးကာ တယောက် ဒဏ်ရာရခဲ့တယ်လို့ သိရပါတယ်။

ဓာတ်ပုံ - အမြန်လမ်း ထိန်း/ပြင်/ကြီးကြပ်ရေးအဖွဲ့