ညောင်ဦးမြို့နယ်မီးသတ်က လက်တလောဖြစ်ပေါ်နေသော ရာသီဥတုသတိပေးချက်များအရကြိုတင်ပြင်ဆင်
မိုးလေဝသနှင့် ဇလဗေဒညွှန်ကြားမှုဦးစီးဌာန၏ လက်တလောဖြစ်ပေါ်နေသော ရာသီဥတုသတိပေးချက်များအရ မန္တလေးတိုင်း၊ ညောင်ဦးမြို့နယ်၏ မြို့နယ်မီးသတ်တပ်ဖွဲ့က ရှာဖွေကယ်ဆယ်ရေးလုပ်ငန်းများကိုအချိန်နှင့်တပြေးညီတုန့်ပြန်ဆောင်ရွက်နိုင်စေရန်အတွက် ကြိုတင်ပြင်ဆင်ခြင်းများကိုဆောင်ရွက်လျက်ရှိကြောင်း သိရသည်။
မြို့နယ်မီးသတ်တပ်ဖွဲ့ဝင်များက ယနေ့ စက်တင်ဘာ ၂၈ ရက်နံနက် ၉ နာရီမှစတင်ကာ ရှာဖွေကယ်ဆယ်ရေးလုပ်ငန်းသုံးစက်ပစ္စည်းကိရိယာများ၊ ရေစုပ်စက်များနှင့် ရေပြင်ရှာဖွေကယ်ဆယ်ရေးလုပ်ငန်းသုံး Assault Boat များရေပြင်အသင့်ချထားခြင်း၊ စက်နှိုးစမ်းသပ်ခြင်း၊ အသင့်စုဖွဲ့လေ့ကျင့်ခြင်းတို့ကိုပြုလုပ်ခဲ့ကြကြောင်း သိရသည်။
မြို့နယ်အတွင်း၌ ဘေးအန္တရာယ်တစ်စုံတစ်ရာကျရောက်လာပါက ညောင်ဦးမြို့နယ်မီးသတ်ဦးစီးဌာန၏ အရေးပေါ် ဖုန်း ၁၉၁ နှင့် ရုံးဖုန်း ၀၆၁ ၂၄၆၀၁၉၁ တို့သို့ ဆက်သွယ်အကူအညီတောင်းခံနိုင်သည်ဟု အသိပေးနှိုးဆော်ထားကြောင်း သိရသည်။
