ပွဲစီစဉ်သူများအကြား ပဋိပက္ခကြောင့် အန်သိုနီဂျိုရှူအာနဲ့ ထိုးသတ်မယ့်ပွဲ မရေမရာဖြစ်နေကြောင်း တိုင်ဆန်ဖျူရီ ဖွင့်ဟ
ပွဲစီစဉ်သူများအကြား ပဋိပက္ခအခြေအနေကြောင့် ဗြိတိန်တစ်နိုင်ငံတည်းသား အန်သိုနီဂျိုရှူအာနဲ့ထိုးသတ်မယ့်ပွဲမှာ မရေမရာဖြစ်နေကြောင်း တိုင်ဆန်ဖျူရီက ထုတ်ဖော်ဖွင့်ဟခဲ့ပါတယ်။
ဟဲဗီးဝိတ်တန်း ကမ္ဘာ့ချန်ပီယံဟောင်းနှစ်ဦးဖြစ်တဲ့ တိုင်ဆန်ဖျူရီနဲ့ အန်သိုနီဂျိုရှူအာတို့ရဲ့ပွဲကို ဒီဇင်ဘာ ၁၁ ရက်မှာကျင်းပမှာဖြစ်ပြီး ဝေးလ်စ်နိုင်ငံ၊ ကာဒစ်ဖ်မြို့ရှိ Principality Stadium မှာ ပြုလုပ်ဖို့စီစဉ်ထားတာပါ။ ဒါ့အပြင် Netflix ကနေ တိုက်ရိုက်ထုတ်လွှင့်ပြသမယ်လို့လည်း ပြီးခဲ့သည့်ရက်ပိုင်းအတွင်း အတည်ပြုထုတ်ပြန်ထားပါတယ်။
အဲဒီပွဲစဉ်ကို နာမည်ကြီး ဆော်ဒီအားကစားအာဏာပိုင် တာကီအယ် အာရှိတ်နဲ့ UFC ပြိုင်ပွဲဥက္ကဋ္ဌ ဒေနာဝိုက်ရဲ့ Zuffa Boxing ကုမ္ပဏီတို့ ပူးပေါင်းစီစဉ် ကျင်းပခြင်းဖြစ်ပါတယ်။
ဒါပေမဲ့ ဂျိုရှူအာရဲ့ ပွဲစီစဉ်သူ အက်ဒီဟန်းနဲ့ ဒေနာဝိုက်တို့အကြား မပြေလည်မှုများရှိနေပြီး သူ့အနေနဲ့ ယခုပွဲမှာ ပါဝင်ခွင့်မရှိကြောင်း အက်ဒီဟန်းက ပြောကြားထားပါတယ်။
အဲဒီအခြေအနေနဲ့ပတ်သက်ပြီး ဖျူရီက "အန်သိုနီဂျိုရှူအာနဲ့ အက်ဒီဟန်းတို့က ဒီပွဲကနေနုတ်ထွက်ဖို့ ကြိုးစားနေကြတယ်။ အခု သူတို့မထိုးတော့ဘူးလို့ ပြောနေကြတယ်။ ဒါက အဓိကအားဖြင့် အက်ဒီဟန်းရဲ့ အတ္တ ကြောင့်ပါပဲ။ သူက အကြောင်းပြချက်ပေါင်း မြောက်မြားစွာကို လုပ်ကြံဖန်တီးပြီး ကျွန်တော်တို့ ပွဲမထိုးဖြစ်တော့ဘူးလို့ ခြိမ်းခြောက်နေတာပါ။ အခုတော့ တာကီအယ်အာရှိတ်က ချက်ချင်းဝင်ထိုးပေးနိုင်မယ့်သူတွေကို အစားထိုးရှာဖွေနေရပါပြီ။ အက်ဒီဟန်းကြောင့် ကျွန်တော်တို့ရဲ့ အကြီးကျယ်ဆုံးသမိုင်းဝင်ပွဲက ထိခိုက်ခဲ့ရပါပြီ" လို့ ပြောကြားခဲ့ပါတယ်။
Photos: BBC & Sky Sports
