ကမ္ဘာ့စစ်တုရင်အိုလံပစ်ပြိုင်ပွဲမှာ မြန်မာ့စစ်တုရင်သမိုင်းတစ်လျှောက် အသက်အငယ်ဆုံး WFM Title စံချိန်တင်နိုင်ခဲ့တဲ့ မင်းအမရာဝတီ
ဥဇဘက်ကစ္စတန်နိုင်ငံ၊ ဆမာခန်မြို့မှာ ကျင်းပလျက်ရှိတဲ့ (၄၆) ကြိမ်မြောက် ကမ္ဘာ့စစ်တုရင်အိုလံပစ် (46th FIDE Chess Olympiad 2026) ပြိုင်ပွဲမှာ (၁၅)နှစ်အရွယ် မြန်မာ့လက်ရွေးစင် စစ်တုရင်ကစားသမား မင်းအမရာဝတီအနေနဲ့ မြန်မာ့စစ်တုရင်သမိုင်းတစ်လျှောက် အသက်အငယ်ဆုံး WFM (Woman FIDE Master) စံချိန်သစ်ကို ရရှိခဲ့ပါတယ်။
အဲဒီပြိုင်ပွဲမှာ မင်းအမရာဝတီဟာ WCM (Woman Candidate Master) စံချိန်သစ်ကိုရယူနိုင်ခဲ့သလို၊ ပွဲစဉ် (၉)ပွဲ ကစားအပြီးမှာ (၆)မှတ်ရယူနိုင်ခဲ့ပြီး FIDE (ကမ္ဘာ့စစ်တုရင်အဖွဲ့ချုပ်)ကနေ တရားဝင် အသိအမှတ်ပြုတစ်သက်တာ ဘွဲ့တံဆိပ်ဖြစ်တဲ့ WFM Title ကို ဆက်လက် ဆွတ်ခူးနိုင်ခဲ့ပါတယ်။
၂၀၂၄ ခုနှစ်အတွင်း မလေးရှားနိုင်ငံမှာကျင်းပခဲ့တဲ့ အရှေ့အာရှလူငယ်စစ်တုရင်ပြိုင်ပွဲမှာ အာဆီယံနံပါတ် (၁)နေရာကို အဲဒီအချိန်က (၁၃)နှစ်အရွယ်သာရှိသေးတဲ့ မင်းအမရာဝတီအနေနဲ့ ဆွတ်ခူးခဲ့ဖူးပါတယ်။
ဒီအချိန်မှာတော့ အသက် (၁၅)နှစ်အရွယ်နဲ့ သမိုင်းဝင် စံချိန်သစ်တင်နိုင်ခဲ့ပြီး WGM (Woman Grandmaster) အဆင့်အထိ တက်လှမ်းနိုင်မယ့် အခြေအနေကောင်းတွေကိုလည်း ပိုင်ဆိုင်ထားပါတယ်။
