အာရှအားကစားပြိုင်ပွဲဝင် မြန်မာအားကစားအဖွဲ့အတွက် ပထမဆုံးရွှေတံဆိပ်ဆုကို ခင်နှင်းဝေက တက်ရှ်ဘောကနေ ရယူပေး
ဂျပန်နိုင်ငံမှာ ကျင်းပနေတဲ့ အကြိမ် (၂၀) မြောက် ၂၀၂၆ အာရှအားကစားပြိုင်ပွဲဝင် မြန်မာအားကစားအဖွဲ့အတွက် ပထမဆုံး ရွှေတံဆိပ်ဆုကို ခင်နှင်းဝေက တက်ရှ်ဘောအားကစားနည်းကနေ ရယူပေးခဲ့ကြောင်း သိရပါတယ်။
ခင်နှင်းဝေဟာ တက်ရှ်ဘောအားကစားနည်းရဲ့ အမျိုးသမီးတစ်ဦးချင်း (Women Single) ဗိုလ်လုပွဲအဖြစ် ဒီနေ့ အင်ဒိုနီးရှားကစားသမားနဲ့ ယှဥ်ပြိုင်ကစားခဲ့ရာ (၁၀-၁၂၊ ၁၂-၈၊ ၁၂-၉) ရမှတ်၊ (၂-၁) ပွဲနဲ့ အနိုင်ရပြီး ရွှေတံဆိပ်ဆု ရရှိခဲ့တာဖြစ်ပါတယ်။ ခင်နှင်းဝေဟာ အုပ်စုအဆင့်မှာ ကာဇက်စတန်၊ အင်ဒိုနီးရှား၊ လက်ဘနွန်ကစားသမားတွေကို နှစ်ပွဲပြတ်စီနဲ့ အနိုင်ရရှိခဲ့သလို ဆီမီးဖိုင်နယ်မှာလည်း လက်ဘနွန်ကစားသမားကို နှစ်ပွဲပြတ်နဲ့ အနိုင်ရယူပြီး ဗိုလ်လုပွဲကို တက်ရောက်ခဲ့တာဖြစ်ပါတယ်။ မြန်မာတက်ရှ်ဘောအားကစားအဖွဲ့ဟာ ၂၀၂၆ အာရှအားကစားပြိုင်ပွဲကို အမျိုးအစား (၃) မျိုးနဲ့ ဝင်ရောက်ယှဥ်ပြိုင်နေပြီး အမျိုးသားတစ်ဥိးချင်း (Men Single) မှာ စောဖရိုက်ဒေးက ကြေးတံဆိပ်ဆု ရယူပေးထားပါတယ်။ ဒါကြောင့် မြန်မာတက်ရှ်ဘောအားကစားအဖွဲ့ဟာ အခုဆိုရင် ၂၀၂၆ အာရှအားကစားပြိုင်ပွဲမှာ ရွှေတံဆိပ် (၁) ခု၊ ကြေးတံဆိပ် (၁) ခု ရယူပေးထားပြီဖြစ်ပါတယ်။
