ရန်ကုန်တိုင်းဒေသကြီးအတွင်း အိမ်ရာအဆောက်အအုံ ၃၁ လုံး တည်ဆောက်ရေးအတွက် အိတ်ဖွင့်တင်ဒါခေါ်ယူ

ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံ့ဖြိုးရေးဦးစီးဌာနက အကောင်အထည်ဖော်တည်ဆောက်လျက်ရှိသည့် ရန်ကုန်တိုင်းဒေသကြီးအတွင်းရှိ အိမ်ရာစီမံကိန်း ၃ ခုတွင် အိမ်ရာအဆောက်အအုံ ၃၁ လုံး တည်ဆောက်ရေးလုပ်ငန်းများ ဆောင်ရွက်ရန်အတွက် အိတ်ဖွင့်တင်ဒါ တင်သွင်းရန် မြန်မာနိုင်ငံသားလုပ်ငန်းရှင်များအား ဖိတ်ခေါ်ထားကြောင်း သိရသည်။
အဆိုပါ တင်ဒါခေါ်ယူသည့် စီမံကိန်းများမှာ လှိုင်သာယာမြို့နယ်ရှိ ကျန်စစ်မင်းအိမ်ရာ အပိုင်း(၂)၊ ဒဂုံမြို့သစ်(ဆိပ်ကမ်း)မြို့နယ်ရှိ ယုဇနအိမ်ရာစီမံကိန်း အပိုင်း(၃)နှင့် ဒဂုံမြို့သစ်(တောင်ပိုင်း)မြို့နယ်ရှိ အင်းဝအိမ်ရာစီမံကိန်းတို့ဖြစ်ပြီး အဆိုပါစီမံကိန်းများတွင် အိမ်ရာအဆောက်အအုံ စုစုပေါင်း ၃၁ လုံး တည်ဆောက်သွားမည်ဖြစ်သည်။
တင်ဒါလျှောက်လွှာပုံစံများကို စက်တင်ဘာ ၁၄ ရက်မှ စက်တင်ဘာ ၂၅ ရက်အထိ ရုံးချိန်အတွင်း ရောင်းချပေးသွားမည်ဖြစ်ပြီး တင်ဒါလျှောက်လွှာများကို အောက်တိုဘာ ၁ ရက်၊ ကြာသပတေးနေ့၊ မွန်းလွဲ ၃ နာရီ နောက်ဆုံးထား၍ တင်သွင်းရမည်ဖြစ်သည်။
တင်ဒါဖွင့်လှစ်မည့် ရက်နှင့်အချိန်ကို သက်ဆိုင်ရာလုပ်ငန်းရှင်များထံ ဆက်သွယ်အကြောင်းကြားပေးသွားမည်ဖြစ်ကြောင်း သိရသည်။
တင်ဒါလျှောက်လွှာပုံစံများကို မြို့ပြနှင့်အိမ်ရာဖွံ့ဖြိုးရေးဦးစီးဌာန၊ အိမ်ရာဖွံ့ဖြိုးရေးဌာနခွဲ၊ ရုံးအမှတ်(၄၀)၊ နေပြည်တော်တွင် ရောင်းချပေးမည်ဖြစ်ပြီး အသေးစိတ်သိရှိလိုသူများအနေဖြင့် ရုံးချိန်အတွင်း ဖုန်း ၀၆၇-၃၄၀၇၅၂၇ သို့ ဆက်သွယ်စုံစမ်းနိုင်ကြောင်း သိရသည်။