ချန်ပီယံလိဂ်ပွဲစဉ်(၁)မှာ သွင်းဂိုးစုစုပေါင်း (၆၉)ဂိုးရှိခဲ့ပြီး ဂိုးအများဆုံးအဖွင့်ပွဲစဉ်အဖြစ် စံချိန်တင်
ဒီရာသီ ချန်ပီယံလိဂ် League Phase အဆင့်ရဲ့ ပွဲစဉ်(၁)မှာ သွင်းဂိုးစုစုပေါင်း (၆၉)ဂိုး ရှိခဲ့တာကြောင့် ဂိုးအများဆုံးအဖွင့်ပွဲစဉ်အဖြစ် စံချိန်တင်ခဲ့ကြောင်း သိရပါတယ်။
ချန်ပီယံလိဂ်ပြိုင်ပွဲကို အခုလိုမျိုး League Phase အဆင့်နဲ့ ယှဉ်ပြိုင်မှုက ၂၀၂၄-၂၅ ရာသီမှာ စတင်ခဲ့တာဖြစ်ပြီး ပထမဆုံးရာသီရဲ့ ပွဲစဉ်(၁)မှာ သွင်းဂိုး(၅၇)ဂိုးသာရှိခဲ့သလို၊ ၂၀၂၅-၂၆ ရာသီ ပွဲစဉ်(၁)မှာလည်း သွင်းဂိုး(၆၇)ဂိုးသာ ရှိခဲ့ပါတယ်။
ဒါကြောင့် အခု ၂၀၂၆-၂၇ ရာသီ ပွဲစဉ်(၁)မှာ သွင်းဂိုး(၆၉)ဂိုး ရှိခဲ့ခြင်းက စံချိန်သစ် ဖြစ်ခဲ့တာပါ။
၂၀၂၆-၂၇ ရာသီ ချန်ပီယံလိဂ် League Phase အဆင့်မှာ ပွဲစဉ်(၁)ကို (၃)ရက်ခွဲကာ ယှဉ်ပြိုင်ကစားခဲ့တာဖြစ်ပြီး အင်္ဂါနေ့မှာ (၂၁)ဂိုး၊ ဗုဒ္ဓဟူးနေ့မှာ (၂၅)ဂိုး၊ ကြာသပတေးနေ့မှာ (၂၃)ဂိုး သွင်းယူခဲ့ခြင်းဖြစ်ပါတယ်။
ဂိုးအများဆုံးသွင်းခဲ့တဲ့အသင်းက (၆)ဂိုးသွင်းခဲ့တဲ့ PSG ဖြစ်ပြီး အသင်း(၃၆)သင်းထဲမှာ ဂိုးမသွင်းနိုင်တဲ့အသင်း (၅)သင်းသာ ရှိခဲ့ပါတယ်။
ဒါပေမဲ့ ပွဲစဉ်တစ်ခုချင်းအလိုက် သွင်းဂိုးအများဆုံးအဖြစ် စံချိန်တင်ထားတာကတော့ ၂၀၂၅-၂၆ ရာသီ ပွဲစဉ်(၃)ဖြစ်ပြီး စုစုပေါင်း(၇၁)ဂိုး သွင်းယူခဲ့ခြင်းဖြစ်ပါတယ်။
ဒီရာသီ ချန်ပီယံလိဂ်ပွဲစဉ်(၁)မှာ ဟက်ထရစ်သွင်းယူနိုင်တဲ့ကစားသမား (၂)ဦးရှိခဲ့ပြီး စတုဂတ်တိုက်စစ်မှူး ဒီမီရိုဗစ်နဲ့ PSG တိုက်စစ်ကစားသမား ဖယ်ရန်တောရက်စ်တို့ ဖြစ်ပါတယ်။
ပွဲစဉ်(၁)မှာ အမှတ်ပြည့်ရယူနိုင်တဲ့အသင်း (၁၆)သင်းရှိခဲ့ပြီး လက်ရှိချန်ပီယံ PSG အသင်းက အမှတ်ပေးဇယား ထိပ်ဆုံးနေရာမှာ ရပ်တည်နိုင်ခဲ့ပါတယ်။
