မန္တလေးပြည်သူ့ဆေးရုံကြီး ဦးနှောက်နှင့် အာရုံကြောဌာန၌ နေ့စဉ် ပြင်ပလူနာ ၅၀ ကျော် ကုသပေးနေ
မန္တလေးပြည်သူ့ဆေးရုံကြီး၊ ဦးနှောက်နှင့် အာရုံကြောဆေးပညာ အထူးကုဌာနတွင် အတွင်းလူနာများအပြင် ပြင်ပလူနာဌာန၌လည်း ရုံးပိတ်ရက်များမှလွဲ၍ နေ့စဉ် လူနာ ၅၀ ကျော်အား ကျန်းမာရေးစောင့်ရှောက်မှုများ ပေးအပ်လျက်ရှိကြောင်း သိရသည်။
အဆိုပါ ဦးနှောက်နှင့် အာရုံကြော ဆေးပညာဌာနတွင် လေဖြတ်ခြင်း၊ အတက်ရောဂါ၊ ကြွက်သားအားနည်းသည့် ရောဂါများ၊ ဦးနှောက်နှင့် အာရုံကြော ရောင်ရမ်းသည့် ရောဂါများ (Multiple sclerosis, Guillain-Barré, Meningitis, Encephalitis) စသည့် ဝေဒနာရှင်များကို အဓိကထား ကုသပေးလျက်ရှိကြောင်း သိရသည်။
လက်ရှိတွင် အတွင်းလူနာ ၄၀ မှ ၅၀ ကြား ပုံမှန် လက်ခံကုသပေးနေပြီး ပြင်ပလူနာများကိုမူ ရုံးပိတ်ရက်မှအပ နံနက် ၈ နာရီမှ ညနေ ၄ နာရီအထိ ကြည့်ရှုကုသပေးနေခြင်း ဖြစ်သည်။
ထို့ပြင် ခွဲစိတ်ကုသမှု လိုအပ်သည့် လူနာများကိုလည်း ဦးနှောက်နှင့် အာရုံကြော ခွဲစိတ်ကုသဌာနသို့ လွှဲပြောင်း၍ စနစ်တကျ ကုသပေးလျက်ရှိကြောင်း သိရသည်။
