အဆင့်ကို မထိန်းထားနိုင်သေးကြောင်း အိုင်ရာအိုလာ ဝန်ခံလာ
=======================
အန်ဖီးလ်ကွင်းအပြင်ဘက်လမ်းမတွေပေါ်မှာ လီဗာပူးပရိသတ်များဟာ ပထမဆုံး အိမ်ကွင်းပွဲစဉ် ကြီးကြပ်လာမယ့် နည်းပြသစ်အန်ဒိုနီအိုင်ရာအိုလာကို ကြိုဆိုခဲ့ကြပါတယ်။
ကွင်းလုံးပြည့် လက်မှတ်ရောင်းချခဲ့ရပါတယ်။ နည်းပြသစ်လက်ထက် ခေတ်သစ် စတင်လာတော့မှာ ဖြစ်လို့ ကွင်းတွင်းမှာ စိတ်လှုပ်ရှားစရာတွေကလည်း ပြည့်နှက်နေပါတယ်။
ဒါပေမယ့် အိုင်ရာအိုလာရဲ့ လီဗာပူးဟာ ၂ ပွဲဆက်ဆိုသလို ၂ ဂိုးအသာနဲ့ ဦးဆောင်နိုင်ပြီးတော့မှ မိုနာကိုအား ၃-၂ ဖြင့် အရေးနိမ့်လာပါတယ်။
မိုနာကိုနှင့်ပွဲမတိုင်မီ အိုင်ရာအိုလာရဲ့လီဗာပူးဟာ ပရီးမီးယားလိဂ်ပြိုင်ဘက် လိဒ်နှင့် ခြေစမ်းပွဲမှာလည်း ၂ ဂိုးအသာဖြင့် ပထမပိုင်းမှာ အနိုင်ရနေပြီးမှ ဒုတိယပိုင်းမှာ ၄ ဂိုးပေးခဲ့ရာကာ ၄-၃ ဖြင့် ရှုံးနိမ့်ခဲ့ပါတယ်။
ပြောရရင် လီဗာပူးဟာ ဒုတိယပိုင်းမှာ လူစားလဲမှု ပြုလုပ်ပြီးချိန်မှာ အသင်းအရည်အသွေး လုံးဝ ကျဆင်းသွားပြီး ပြဿနာတွေ ကြုံလာရတာလည်း ဖြစ်ပါတယ်။
မိုနာကိုနှင့်ပွဲအပြီးတွင် အိုင်ရာအိုလာက "လိဒ်နှင့် ကစားတဲ့ ပွဲတုန်းကလိုပါပဲ။ ပထမပိုင်းမှာ ကျွန်တော်တို့ ကစားတာ ကောင်းတယ်။ အထူးသဖြင် မိနစ် ၃၀ အရမ်းကောင်းခဲ့တယ်။ အခု ကျွန်တော်တို့မှာ ဒီလို ကစားနိုင်တဲ့ လိုအပ်တဲ့ အဆင့်အတန်းမျိုး မရှိပါဘူး။ သူတို့ အလှည့်အပြောင်း ဖြစ်ဖို့ ထိုက်တန်ပါတယ်။ ကျွန်တော်တို့ ရာသီကြိုခြေစမ်းပွဲ ပထမနှစ်ပွဲ အနိုင်ရခဲ့တယ်။ ဒါပေမယ့် နောက်နှစ်ပွဲမှာ တစ်ပွဲလုံး ကျွန်တော်တို့ လိုချင်တဲ့ အဆင့်မျိုး မထိန်းထားနိုင်ဘူး။ အပြောင်းအလဲတချို့ လုပ်လိုက်တာနဲ့ ကစားသမားတွေ ပွဲပန်းလာကြတော့တယ်။ ကျွန်တော်တို့ ဒီအဆင့်ကို မထိန်းထားနိုင်ပါဘူး။ ဒီအတွက်ပဲ လုပ်ရမယ်"လို့ ပြောကြားသွားပါတယ်။
လီဗာပူးဟာ ပရီးမီးယားလိဂ်ရာသီသစ် မစတင်မီ နောက်ထပ် ခြေစမ်းပွဲ အဖြစ် ဩဂုတ်လ ၁၆ ရက်နေ့မှာ ဖာဘရီဂက်စ်ဦးဆောင်နေတဲ့ ကိုမိုနှင့် ခြေစမ်းပါဦးမယ်။
လီဗာပူးဟာ ရာသီသစ်စတင်ရန် နှစ်ပတ်တည်းသာ လိုတော့တဲ့အချိန်အထိ ဗဟိုခံစစ်တွင် အသင်းခေါင်းဆောင်ဗာဂယ်ဗန်ဒိုက်နှင့် ဘယ်သူ့ကို တွဲပေးလာမလဲဆိုတာ အတိအကျ မသိရသေးပါဘူး။
ဥရုဂွေးနောက်ခံလူရော်နယ်အရူဂျိုမှာ လီဗာပူးသို့ ပြောင်းရေး တနင်္ဂနွေနေ့တုန်းက ဆေးစစ်ဆေးမှု ခံယူခဲ့ပါတယ်။ သူဟာ လာမယ့်နှစ် နွေရာသီတွင် ပေါင် ၄၇.၂ သန်းဖြင့် အပြီးသတ်ပြောင်းရွှေ့နိုင်မယ့် အချက်ဖြင့် လီဗာပူးသို့ အငှားဖြင့် လာကစားလာမှာလည်း ဖြစ်ပါတယ်။
ဒါ့အပြင် ရန်းနက်စ်မှ ပြောင်းရွှေ့လာတဲ့ အသက် ၂၁ နှစ်ရှိ ဂျီရီမီဂျက်ကွက်မှာလည်း အသင်းနှင့်အတူ အပြည့်အဝ လေ့ကျင့်ခန်းဆင်းရခြင်း မရှိသေးပါဘူး။
