တိဘက်ရွှေ့ပြောင်းငါးများကို စောင့်ကြည့်ရန် တရုတ်က AI Facial ID သုံး
တရုတ်နိုင်ငံသည် တိဘက်၏ အကြီးဆုံးမြစ်ပေါ်ရှိ ရေအားလျှပ်စစ် ရေကာတာတွင် ငါးများဖြတ်သန်းသွားလာနိုင်ရန် ပြုလုပ်ထားသော လမ်းကြောင်း မှတစ်ဆင့် ကူးခတ်သွားလာနေသည့် ငါးမျိုးစိတ်များကို ၂၄ နာရီပတ်လုံး စောင့်ကြည့်ရန် ရာသီဥတုနှင့် ပတ်ဝန်းကျင်ဆိုင်ရာ AI နည်းပညာသုံး ငါးအမျိုးအစား ခွဲခြားမှုစနစ်ကို စတင်အသုံးပြုနေပြီ ဖြစ်သည်။
ယခင်က ယင်းလမ်းကြောင်းကို စောင့်ကြည့်ရန် လူအင်အားသုံး၍ ခက်ခဲစွာ ရေတွက်ခဲ့ရသော်လည်း ယခုအခါ တိဘက်ကိုယ်ပိုင်အုပ်ချုပ်ခွင့်ရ ဒေသ၌သာ တွေ့ရှိရသည့် ရှားပါးငါးမျိုးစိတ်များကို ခွဲခြားသိရှိနိုင်ရန် AI အခြေခံ ငါးမျက်နှာ မှတ်မိစနစ်ကို အသုံးပြုထားကြောင်း Global Times သတင်း၌ ဖော်ပြထားသည်။
ယာလောင်ဆန်ပိုမြစ် အလယ်ပိုင်းတွင် အမြင့် ၁၁၆ မီတာ (၃၈၁ ပေ) ရှိသော ဇန်မူ ရေအားလျှပ်စစ်စခန်း ကို ၂၀၁၅ ခုနှစ်၌ စတင်လည်ပတ်ခဲ့ချိန်မှစ၍ ငါးများ အထက်သို့ ဆန်တက်နိုင်ရန် ပြုလုပ်ပေးထားသော လှေကားထစ်လမ်းကြောင်းမှတစ်ဆင့် ရှားပါးငါးမျိုးစိတ်ပေါင်း ၅၇၀,၀၀၀ ခန့် ကူးခတ်နိုင်ခဲ့သည်။
“စောင့်ကြည့်လေ့လာမှု ရလဒ်တွေအရ ယာလောင်ဆန်ပိုမြစ် အလယ်ပိုင်းမှာရှိတဲ့ ငါးကောင်ရေ ပမာဏဟာ အလွန်တည်ငြိမ်နေပြီး ရေအားလျှပ်စစ်စခန်း တည်ဆောက်မှုကြောင့် လျော့နည်းသွားခြင်း မရှိပါဘူး။ ဆန့်ကျင်ဘက်အနေနဲ့ မြစ်ကြောင်းတစ်လျှောက် ရေထုဂေဟစနစ်နဲ့ အပင်၊ သတ္တဝါတွေရဲ့ သဘာဝပတ်ဝန်းကျင်ဟာ ပိုမိုကောင်းမွန်တဲ့ အပြောင်းအလဲတွေကို ပြသနေပါတယ်” ဟု ရေကာတာ၏ ဘေးအန္တရာယ်ကင်းရှင်းရေးနှင့် ပတ်ဝန်းကျင်ထိန်းသိမ်းရေးဆိုင်ရာ ဒါရိုက်တာ Yang Xiaocheng က ပြောကြားခဲ့သည်။
ရေအားလျှပ်စစ် စက်ရုံများသည် ရေကြီးရေလျှံမှုကို ကာကွယ်ပေးနိုင်ရုံမျှမက နေရောင်ခြည်နှင့် လေစွမ်းအင်ကဲ့သို့ မတည်ငြိမ်သော ပြန်လည်ပြည့်ဖြိုးမြဲ စွမ်းအင်များ၏ လိုအပ်ချက်ကို ဖြည့်ဆည်းပေးနိုင်သည့် စိတ်ချရသော စွမ်းအင်ရင်းမြစ်တစ်ခု ဖြစ်သည်။ သို့သော်လည်း သဘာဝရေထုကို ပြန်လည်ပြင်ဆင်လိုက်ရသည့်အတွက် ပတ်ဝန်းကျင်ဆိုင်ရာ စိန်ခေါ်မှုများလည်း ရှိနေဆဲဖြစ်သည်။
