မလေးရှားဝန်ကြီးချုပ် ဆေးစစ်မှုခံယူ
မလေးရှားဝန်ကြီးချုပ် အန်ဝါ အီဘရာဟင်မ်သည် ၎င်း၏ ဆေးဘက်ဆိုင်ရာ အထူးကုအဖွဲ့က ညွှန်ကြားသည့်အတိုင်း ဆေးစစ်မှုများနှင့် ကုသမှုများကို ခံယူလျက်ရှိသည်။
ဝန်ကြီးချုပ်ရုံး၏ သြဂုတ်လ ၁၀ ရက်နေ့တွင် ထုတ်ပြန်သော ကြေညာချက်အရ အန်ဝါအနေဖြင့် ဆေးဘက်ဆိုင်ရာ စောင့်ကြည့်စစ်ဆေးမှု ကို နှစ်ရက်ကြာ ခံယူရဖွယ်ရှိကြောင်း သိရသည်။
“လက်ရှိမှာ ဝန်ကြီးချုပ်ဟာ ဆေးဘက်ဆိုင်ရာ အထူးကုအဖွဲ့က ဆုံးဖြတ်တဲ့ ဆေးစစ်မှုတွေနဲ့ ကုသမှုလုပ်ထုံးလုပ်နည်းတွေကို ခံယူနေပါတယ်” ဟု ၎င်း၏ အကြီးတန်း သတင်းပြန်ကြားရေးအတွင်းဝန် နာရှ်ရူလ် အဘိုင်ဒါက ပြောကြားခဲ့သည်။
ဆေးစစ်မှုများ သို့မဟုတ် လုပ်ဆောင်နေသော လုပ်ထုံးလုပ်နည်းများ၏ သဘောသဘာဝနှင့်ပတ်သက်သည့် အသေးစိတ်အချက်အလက်များကိုမူ ကြေညာချက်တွင် ဖော်ပြမထားပေ။
မလေးရှားနိုင်ငံသားများအနေဖြင့် အန်ဝါ၏ ဆေးဘက်ဆိုင်ရာ စစ်ဆေးမှုများနှင့် ကုသမှု လုပ်ထုံးလုပ်နည်းများ ကိုချောမွေ့စွာလုပ်ဆောင်နိုင်စေရန်နှင့် ကျန်းမာရေးကောင်းမွန်စွာဆက်ရှိနေစေရေး ဆုတောင်းပေးကြရန်လည်း တောင်းဆိုထားသည်။
“ဝန်ကြီးချုပ်ရဲ့ ဆေးစစ်မှုတွေနဲ့ လုပ်ထုံးလုပ်နည်းတွေနဲ့ သက်ဆိုင်တဲ့ ကိစ္စရပ်အားလုံး ချောချောမွေ့မွေ့ပြီးမြောက်ပြီး မကြာခင်မှာ သူ့ရဲ့ အလုပ်တာဝန်တွေကို ပြန်လည်ထမ်းဆောင်နိုင်စေဖို့ ကျန်းကျန်းမာမာ ဆက်ရှိနေစေဖို့ ကျွန်တော်တို့ ဆုတောင်းပါတယ်” ဟု နာရှ်ရူလ်က ပြောကြားခဲ့သည်။
