မြန်မာနိုင်ငံသားတွေကို တရားမဝင် မှတ်ပုံတင်ကတ်တွေ ထုတ်ပေးနေတဲ့ဂိုဏ်းကို ထိုင်းရဲဖမ်းဆီး
ထိုင်းနိုင်ငံ၊ တာ့ခ်ခရိုင်ထဲမှာ မြန်မာနိုင်ငံသားတွေကို တရားမဝင် မှတ်ပုံတင်ကတ်တွေ ထုတ်ပေးနေတဲ့ ကွန်ရက်တစ်ခုကို ထိုင်းအာဏာပိုင်တွေက လိုက်လံနှိမ်နင်းခဲ့ပြီး အစိုးရဝန်ထမ်း ၃ ဦး အပါအဝင် သံသယရှိသူ ၁၇ ဦးကို ဖမ်းဆီးလိုက်ပါတယ်။
ရဲနဲ့ တာဝန်ရှိသူတွေဟာ မဲဆောက်မြို့က နေရာ ၂၅ ခုကို ဝင်ရောက်ရှာဖွေခဲ့ကြပြီး နိုင်ငံခြားသားတွေကို တစ်ယောက်ကို ဘတ် ၄ သောင်းကနေ ၁ သိန်းအထိ ယူပြီး "ဇီရိုးကတ် (zero-registration card)" လို့ ခေါ်တဲ့ ကတ်တွေ တရားမဝင် ထုတ်ပေးနေတဲ့ ဂိုဏ်းကို ဖော်ထုတ်နိုင်ခဲ့တာပါ။ ဒီလိုကတ်မျိုး ၇၀၀ ကျော် မသမာတဲ့နည်းနဲ့ ထုတ်ပေးထားပြီးပြီလို့ စုံစမ်းစစ်ဆေးသူတွေက ယူဆထားကြပါတယ်။
အဖမ်းခံရသူတွေထဲမှာ အစိုးရဝန်ထမ်းတွေ၊ ဒေသခံ အာမခံပေးသူတွေနဲ့ မဟုတ်မမှန် အချက်အလက်တွေ သုံးပြီး ကတ်လုပ်ထားတဲ့ မြန်မာနိုင်ငံသားတွေ ပါဝင်ပါတယ်။ ထိုင်းနိုင်ငံရဲ့ လူဦးရေစာရင်း စနစ်ကို အလွဲသုံးစားလုပ်နေတဲ့ ကွန်ရက်တွေကို ဖြိုခွဲဖို့ ဆောင်ရွက်တာဖြစ်ပြီး ဒီစုံစမ်းစစ်ဆေးမှုကိုလည်း ဆက်လက် ဆောင်ရွက်သွားမယ်လို့ အာဏာပိုင်တွေက ပြောပါတယ်။
