ရော်ဂျာကို ဗြိတိန်စံချိန်တင်ပြောင်းရွှေ့ကြေး ပေါင် ၁၁၇ သန်းဖြင့် ချဲလ်ဆီး ခေါ်ယူလာ
=====================
ချဲလ်ဆီးဟာ အက်စတွန်ဗီလာမှ အင်္ဂလန်အလယ်တန်းကစားသမားမော်ဂန်ရော်ဂျာကို ဗြိတိန်စံချိန်တင်ပြောင်းရွှေ့ကြေး ပေါင် ၁၁၇ သန်းဖြင့် ခေါ်ယူရေး အပြီးသတ်လာပြီ ဖြစ်ပါတယ်။
အင်္ဂလန်နှင့်အတူ ကမ္ဘာ့ဖလားတတိယကြေးတံဆိပ်ဆု ရရှိပြီးနောက် တနင်္လာနေ့တွင် လန်ဒန်သို့ ပြန်ရောက်လာတဲ့ ရော်ဂျာဟာ ဆေးစစ်ဆေးမှု ခံယူကာ ချဲလ်ဆီးသို့ ၁ နှစ်သက်တမ်းတိုးနိုင်မဲ့အချက်ပါ ၆ နှစ်စာချုပ်ဖြင့် ပြောင်းခဲ့တာပါ။
ချဲလ်ဆီးသို့ ပြောင်းပြီးနောက် ရော်ဂျာက "လန်ဒန်ရဲ့အကြီးမားဆုံးကလပ်သို့ ပြောင်းလာတာပါ။ ကလပ်သွားချင်တဲ့ လမ်းကြောင်းနဲ့ ရှေ့သားချင်တဲ့ အရာတွေက ကျွန်တော် ပါဝင်ချင်တဲ့ အစိတ်အပိုင်း တစ်ရပ် ဖြစ်နေပါတယ်။ ကျွန်တော့်အတွက် ပြီးပြည့်စုံတဲ့နေရာပါ။ ရှေ့ဆက်ဖို့ မစောင့်နိုင်တော့ပါဘူး"လို့ ပြောကြားသွားပါတယ်။
ချဲလ်ဆီးဟာ ရော်ဂျာကို ခေါ်ယူရေး ၂ နှစ်ကျော်ကြာ စောင့်ကြည့်လာခဲ့တာ ဖြစ်ပြီး ပြီးခဲ့တဲ့အပတ် ဗုဒ္ဓဟူးနေ့တုန်းက အာဂျင်တီးနားကို ကမ္ဘာ့ဖလားဆီမီးဖိုင်နယ်တွင် အင်္ဂလန် ရှုံးနိမ့်ပြီးနောက် ခေါ်ယူရေး သဘောတူညီမှု ရရှိခဲ့တာပါ။
ချဲလ်ဆီးရဲ့အားကစားဒါရိုက်တာများ၊ နည်းပြဇာဘီးအလွန်ဆို၊ ပူးတွဲပိုင်ရှင်ဘီဒက်အက်ဂ်ဘာလီတို့ဟာ အပြောင်းအရွှေ့ ဖြစ်မြောက်ရေး အလျှင်အမြန် လုပ်ဆောင်ခဲ့ကြတာလည်း ဖြစ်ပါတယ်။
တဖက်တွင် ချဲလ်ဆီးအသင်းခေါင်းဆောင်ရီစီဂျိမ်းစ်ကလည်း အင်္ဂလန်အသင်းနှင့်အတူ ရှိနေစဉ်အတွင်း ရော်ဂျာရဲ့ အပြောင်းအရွှေ့ အလျှင်အမြန် ဖြစ်လာအောင် နောက်ကွယ်မှ ကူညီပေးခဲ့ပါတယ်။
ဒါ့အပြင် ချဲလ်ဆီးပူးတွဲပိုင်ရှင်အက်ဂ်ဘာလီနှင့် ဗီလာပိုင်ရှင်နက်စ်ဆက်ဖ်ဆာဝီရစ်တို့အကြား ခိုင်မာတဲ့ ဆက်ဆံရေး ရှိနေမှုနှင့်အတူ အပြောင်းအရွှေ့က အလျှင်အမြန် ဖြစ်လာတာပါ။
ချဲလ်ဆီးနှင့် သဘောတူညီမှု ရရှိသွားချိန်တွင် အာဆင်နယ်အနေဖြင့် အပြိုင်ကမ်းလှမ်းနိုင်မယ့် အခွင့်အရေး ရရှိခဲ့ပေမဲ့လည်း ဗြိတိန်စံချိန်တင်ပြောင်းရွှေ့ကြေး မပေးလိုမှုနှင့်အတူ နောက်ဆုတ်သွားခဲ့ပါတယ်။
အာဆင်နယ်ဟာ ရော်ဂျာကို ခေါ်ယူရေး နောက်ဆုတ်ကာ ပီအက်စ်ဂျီမှ ဘရက်ဒလေဘာကိုလာ၊ ဘုန်းမောက်ရဲ့ ဂျူနီယာခရူပီတို့အား ခေါ်ယူရေး လုပ်ဆောင်လာပါတယ်။
ချဲလ်ဆီးနည်းပြသစ်အလွန်ဆိုဟာ ချဲလ်ဆီးအလယ်တန်းတိုက်စစ်တွင် ကိုးလ်ပါလ်မာနှင့် မော်ဂန်ရော်ဂျာတို့အား အသုံးပြုလာမှာ ဖြစ်ပြီး ကွင်းလယ်တွင် ကိုင်စီဒိနှင့် ဖာနန်ဒက်ဇ်တို့အား အထိုင်ချလာပါမယ်။ ညာတောင်ပံနေရာအတွက်ကိုတော့ အက်စ်တီဗာအိုဝီလီယမ်၊ ပီဒရို၊နီတို၊ ဂျီယိုဗန်နီကွင်ဒါတို့ တိုက်ပွဲဝင်လာရပါမယ်။
ရိုဂျာဟာ ပြီးခဲ့တဲ့ရာသီတုန်းက ဗီလာအတွက် ၅၅ ပွဲကစားခဲ့ရာမှာ ၁၄ ဂိုးသွင်းပြီး ၁၂ ကြိမ်ဖန်တီးကာ ယူရိုပါလိဂ်ဖလား ရရှိအောင် ကူညီပေးခဲ့ပါတယ်။
