မြန်မာ့နိုင်ငံရေးအခြေအနေနှင့် လူသားချင်းစာနာမှုဆိုင်ရာ ပူးပေါင်းဆောင်ရွက်ရေး အတွက် ဒု-သမ္မတ ဦးညိုစောနှင့် UN အဆင့်မြင့်အရာရှိ တွေ့ဆုံ
မြန်မာနိုင်ငံ၏ သဘာဝဘေးအန္တရာယ်ဆိုင်ရာ စီမံခန့်ခွဲမှုများနှင့် လူသားချင်းစာနာထောက်ထားမှု အကူအညီများ ပေးအပ်ရေးအပါအဝင် လတ်တလော နိုင်ငံရေးဖြစ်ပေါ်တိုးတက်မှုများအား ပိုမိုနားလည်မှုရရှိရေးအတွက် ဒုတိယသမ္မတ ဦးညိုစောနှင့် ကုလသမဂ္ဂ (UN) ယာယီလက်ထောက်အတွင်းရေးမှူးချုပ် H.E. Mr. Indrika Ratwatte တို့ ယနေ့ ဇူလိုင်လ ၂၀ ရက်နေ့တွင် တွေ့ဆုံဆွေးနွေးခဲ့ကြကြောင်း သိရသည်။
တွေ့ဆုံဆွေးနွေးပွဲအတွင်း နှစ်ဖက်ကိုယ်စားလှယ်များသည် ငလျင်ဘေးအလွန် ပြန်လည်ထူထောင်ရေးလုပ်ငန်းများ ဆောင်ရွက်ထားရှိမှု အခြေအနေများကို ရင်းနှီးပွင့်လင်းစွာ အမြင်ချင်းဖလှယ်ခဲ့ကြပြီး၊ ပြည်သူများထံ လူသားချင်းစာနာမှု အကူအညီများ ပိုမိုထိရောက်စွာ ပေးအပ်နိုင်ရေးအတွက် ပူးပေါင်းဆောင်ရွက်နိုင်မည့် အလားအလာများကို ညှိနှိုင်းခဲ့ကြသည်။
ထို့ပြင် အစိုးရ၏ လူသားချင်းစာနာမှု ကူညီထောက်ပံ့ရေးဆိုင်ရာ ကြိုးပမ်းဆောင်ရွက်ချက်များအပြင် ၂၀၂၅ ခုနှစ် ပါတီစုံဒီမိုကရေစီ အထွေထွေရွေးကောက်ပွဲကြီးအား ပွင့်လင်းမြင်သာစွာဖြင့် အောင်မြင်စွာ ကျင်းပနိုင်ခဲ့မှုအပေါ် နောက်ဆက်တွဲ ဖြစ်ပေါ်တိုးတက်လာသည့် နိုင်ငံရေးဖြစ်စဉ်များကိုပါ အကျယ်တဝင့် ထည့်သွင်းဆွေးနွေးခဲ့ကြကြောင်း သတင်းရရှိသည်။
