ရန်ကုန်-မော်လမြိုင်သွားကားလမ်းပေါ်၌ရေကျော်နေ လမ်းမပိတ်စေရန်ကူညီပေးနေကြ
မွန်ပြည်နယ်၊ ပေါင်မြို့နယ်တွင် ယနေ့ ဇူလိုင် ၁၂ ရက်နံနက်ပိုင်းက မိုးသည်းထန်စွာရွာသွန်းမှုကြောင့် ရန်ကုန် -မော်လမြိုင်သွားကားလမ်းပေါ်၌ ရေကျော်လျက်ရှိကြောင်း သိရသည်။
မိုးသည်းထန်စွာရွာသွန်းမှုကြောင့် နံနက် ၉ နာရီ ၁၅ မိနစ်ခန့်မှစတင်ကာ ပေါင်မြို့နယ်၊ ဥတ္တားကျေးရွာရှိ ရန်ကုန်-မော်လမြိုင်ကားလမ်း၏ မိုင်တိုင်အမှတ် ၁၀၉/၄ နှင့် ၁၀၉/၅ ကြားကားလမ်းပေါ်သို့ရေကျော်ခဲ့ကြောင်း သိရသည်။
ထို့ကြောင့် ဖြတ်သန်းသွားလာသူများအဆင်ပြေစေရေးနှင့် လမ်းပိတ်ဆို့မှုမဖြစ်စေရေးတို့အတွက် ပေါင်မြို့နယ်မီးသတ်စခန်းမှတပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ သက်ဆိုင်ရာအဖွဲ့အစည်းနှင့် လူမှုကူညီရေးအသင်းဝင်များကကူညီပေးခဲ့ကြကြောင်း သိရသည်။
ထို့ပြင် လက်ရှိအချိန်၌ ရေကြီးရေလျှံမှုဖြစ်ပေါ်နေသော ဘီးလင်းမြို့တွင်လည်း ယနေ့ ဇူလိုင် ၁၂ ရက်နံနက်ပိုင်းကတိုင်းထွာချက်များအရ ဘီးလင်းမြစ်ရေသည် မြို့၏စိုးရိမ်ရေမှတ်အထက် (၁)လက်မခန့်တွင် ရောက်ရှိနေရာမှ ၂၄ နာရီအတွင် ပေဝက်ခန့်ထပ်မံမြင့်တက်လာနိုင်ကြောင်း သိရသည်။
