ပုဂ္ဂလိက-အစိုးရ ပူးပေါင်းဆောင်ရွက်မှုဖြင့် ပြည်တွင်းထုတ်လုပ်မှုနှင့် ပို့ကုန်မြှင့်တင်ကာ စီးပွားရေးတိုးတက်မှု ဖော်ဆောင်နိုင်မည်ဟု UMFCCI ဥက္ကဋ္ဌ ဦးအေးဝင်း ပြော

မြန်မာနိုင်ငံ၏ စီးပွားရေးဖွံ့ဖြိုးတိုးတက်မှုသည် ပြည်တွင်းထုတ်လုပ်မှု တိုးမြှင့်နိုင်စွမ်းနှင့် ပြည်ပပို့ကုန် တိုးတက်မှုအပေါ် အခြေခံနေသဖြင့် ပုဂ္ဂလိကနှင့် အစိုးရတို့ နီးနီးကပ်ကပ် ပူးပေါင်းဆောင်ရွက်ခြင်းဖြင့် လက်ရှိစီးပွားရေးစိန်ခေါ်မှုများကို ကျော်လွှားကာ ရည်မှန်းထားသည့် စီးပွားရေးတိုးတက်မှုလမ်းကြောင်းသို့ ရောက်ရှိနိုင်မည်ဖြစ်ကြောင်း မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) ဥက္ကဋ္ဌ ဦးအေးဝင်းက ပြောကြားသည်။
ယင်းကို ဇွန်လ ၂၃ ရက်က ကျင်းပသည့် UMFCCI အမှုဆောင်သက်တမ်းသစ် ဗဟိုအလုပ်အမှုဆောင်အဖွဲ့ အစည်းအဝေး (ဗ-၄/၂၀၂၅-၂၀၃၀) ဖွင့်ပွဲတွင် အဖွင့်အမှာစကား ပြောကြားရာ၌ ထည့်သွင်းပြောဆိုခဲ့ခြင်းဖြစ်သည်။
ဦးအေးဝင်းက UMFCCI သည် အိန္ဒိယစက်မှုလက်မှုလုပ်ငန်းရှင်များအသင်းချုပ် (CII) နှင့် ပူးပေါင်း၍ မေ ၃၁ ရက်က အိန္ဒိယနိုင်ငံ နယူးဒေလီမြို့၌ မြန်မာ-အိန္ဒိယ ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ ဆွေးနွေးပွဲကို အောင်မြင်စွာ ကျင်းပနိုင်ခဲ့ကြောင်း၊ အဆိုပါဆွေးနွေးပွဲတွင် စိုက်ပျိုးရေး၊ မွေးမြူရေး၊ ကုန်ထုတ်လုပ်မှု၊ ဆေးဝါး၊ ချည်မျှင်နှင့် အထည်အလိပ်၊ နည်းပညာ၊ ဒစ်ဂျစ်တယ်ဝန်ဆောင်မှုနှင့် ကျန်းမာရေးကဏ္ဍများ၌ အိန္ဒိယလုပ်ငန်းရှင်များ မြန်မာနိုင်ငံတွင် ရင်းနှီးမြှုပ်နှံနိုင်ရေး ဖိတ်ခေါ်ဆွေးနွေးခဲ့ကြောင်း ပြောကြားသည်။
ထို့ပြင် နိုင်ငံတကာစီးပွားရေးဆိုင်ရာ ဆွေးနွေးပွဲများတွင် UMFCCI ကိုယ်စားလှယ်အဖွဲ့များက တက်ကြွစွာ ပါဝင်ဆောင်ရွက်နိုင်ခဲ့ပြီး ကုန်သွယ်မှုမြှင့်တင်ရေးအတွက် သက်ဆိုင်ရာနိုင်ငံအလိုက် အထူးပြုလုပ်ငန်းအဖွဲ့များ ဖွဲ့စည်းဆောင်ရွက်ရန် လိုအပ်ကြောင်းလည်း အလေးပေးပြောကြားခဲ့သည်။
ထို့အပြင် နိုင်ငံတော်အဆင့် တရုတ်နိုင်ငံ ချစ်ကြည်ရေးခရီးစဉ်အတွင်း ကျင်းပခဲ့သည့် Myanmar–China Investment and Trade Networking Summit တွင် UMFCCI ကိုယ်စားလှယ်အဖွဲ့ ပါဝင်တက်ရောက်ခဲ့ပြီး အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSMEs) ဖွံ့ဖြိုးတိုးတက်ရေးအတွက် မူဝါဒပိုင်းဆိုင်ရာ အကြံပြုချက်များ တင်ပြခဲ့ကြောင်းလည်း ဦးအေးဝင်းက ပြောကြားခဲ့သည်။