ကမ္ဘာ့ဖလားမှ ထွက်ခွာရပြီးနောက် ရက်အနည်းငယ်အကြာတွင် ဂျာမနီဘောလုံးအဖွဲ့ချုပ်ရုံးချုပ်ကို ရဲတပ်ဖွဲ့ဝင် ၁၅၀ ကျော် စီးနင်းရှာဖွေ
===================
ဂျာမန်ရဲတပ်ဖွဲ့ဝင် ၁၅၀ ကျော်တို့ဟာ ကမ္ဘာ့ဖလားမှ အံ့ဩသင့်ဖွယ် ထွက်ခွာခဲ့ရပြီးနောက် ရက်အနည်းငယ်အကြာတွင် ဂျာမန်ဘောလုံးအဖွဲ့ချုပ်ရုံးချုပ်အား စီးနင်းရှာဖွေမှု ပြုလုပ်ခဲ့ပါတယ်။
ဂျာမနီဟာ တနင်္လာနေ့တုန်းက ကမ္ဘာ့ဖလားတွင် ပထမဆုံးအကြိမ် ပင်နယ်တီတွင် ရှုံးနိမ့်ကာ ကမ္ဘာ့ဖလား ၃၂ သင်းအဆင့်မှ ထွက်ခွာခဲ့ရပါတယ်။
ယခုအပတ်မှာတော့ ဂျာမနီဘောလုံးအဖွဲ့ချုပ်အကြီးအကဲများအတွက် ဆိုးရွားမှုတွေ ပိုပြီးတော့ ဖြစ်နေပါတယ်။
ဂျာမနီအာဏာပိုင်တို့ဟာ ယူရို ၂၀၂၄ ပြိုင်ပွဲအိမ်ရှင်အဖြစ် ကျင်းပစဉ် ကာလဝန်းကျင်တုန်းက "ဦးစားပေးဆက်ဆံမှု'များအတွက် ဂျာမန်ဘောလုံးအဖွဲ့ချုပ်အား စစ်ဆေးမှုများ ပြုလုပ်ခဲ့ပါတယ်။
ဂျာမနီမီဒီယာများရဲ့ဖော်ပြမှုအရ ယူရို ၂၀၂၄ ပွဲလက်မှတ်များ၊ ဟိုတယ်ဘုတ်ကင်များအား ဦးစားပေးဧည့်သည်များအား ပေးခဲ့မှုအတွက် စစ်ဆေးခြင်းခံခဲ့ရကြောင်း သိရပါတယ်။
ဒါ့အပြင် အာဏာပိုင်တို့ဟာ ယူရို ၂၀၂၄ ပြိုင်ပွဲများ လက်ခံကျင်းပရာ နေရာများမှ မြို့နယ်အုပ်ချုပ်ရေးအဖွဲ့ဝင်များကိုလည်း စုံစမ်းစစ်ဆေးမှုများ ပြုလုပ်ခဲ့ကြောင်း သိရပါတယ်။
မြောက်ပိုင်းရိုင်း-ဝက်စ်ဖာလီယာပြည်နယ် ပြည်ထဲရေးဝန်ကြီး ဟာဘတ်ရူးလ်က "ဘောလုံးပွဲလက်မှတ်က လစာရဲ့အစိတ်အပိုင်း မဟုတ်ပါဘူး။ လာဘ်ငွေရဖို့ မျှော်လင့်ထားတဲ့ အစိုးရဝန်ထမ်းတိုင်း ကျွန်တော့်ဆီလာရောက်လည်ပတ်ကြလိမ့်မယ်။ ယူရိုချန်ပီယံရှစ်လို ပြိုင်ပွဲကြီးတွေမှာ လူထုရဲ့ ယုံကြည်မှုက အရမ်းအရေးကြီးတယ်။ အာဏာပိုင်တွေအနေနဲ့ မျှတမှုဖြစ်အောင် အကောင်းဆုံးလုပ်ရမယ်။ ဖိတ်စာအနည်းငယ်၊ လက်မှတ်အနည်းငယ်ကြောင့် လူထုယုံကြည်မှု ပျောက်ဆုံးသွားစေလို့ မရပါဘူး"လို့ ပြောကြားသွားပါတယ်။
ဂျာမနီအသင်းဟာ ၂၀၁၄ ကမ္ဘာ့ဖလားချန်ပီယံ ဖြစ်ပြီးနောက် ၂၀၁၈ ရုရှားကမ္ဘာ့ဖလားနှင့် ၂၀၂၂ ကာတာကမ္ဘာ့ဖလားတို့တွင် အုပ်စုအဆင့်အား မကျော်ဖြတ်နိုင်ခဲ့ပါဘူး။
