ယခင်နည်းပြဆောက်ဂိတ်ရဲ့ ပင်နယ်တီအစီအစဉ်ကို ဆက်လက် သုံးလာမဲ့ တူချယ်
====================
အင်္ဂလန်နည်းပြသောမတ်စ်တူချယ်က ကမ္ဘာ့ဖလားပြိုင်ပွဲတွင် ယခင်နည်းပြဂါရတ်ဆောက်ဂိတ်ရဲ့ ပင်နယ်တီ အစီအစဉ်အတိုင်း ဆက်လက် အသုံးပြုလာမည်ဖြစ်ကြောင်း ပြောကြားလာပါတယ်။
တူချယ်ဦးဆောင်တဲ့ အင်္ဂလန်အသင်းဟာ ဗုဒ္ဓဟူးနေ့တွင် ကမ္ဘာ့ဖလား ၃၂ သင်း ရှုံးထွက်အဆင့်ပွဲစဉ်အဖြစ် ဒီမိုကရက်တစ်ကွန်ဂိုနှင့်ရင်ဆိုင်ကစားရမှာ ဖြစ်ပြီး ပင်နယ်တီ အဆုံးအဖြတ် ကန်လာရနိုင်ပါတယ်။
ဆောက်ဂိတ်ဟာ ၂၀၁၆ ခုနှစ်တွင် အင်္ဂလန်အသင်းကို ကိုင်တွယ်ပြီးနောက် နိုင်ငံတကာပြိုင်ပွဲကြီးများတွင် ပင်နယ်တီ အဆုံးအဖြတ် ၇ ကြိမ်ကန်ခဲ့ရာမှာ ၁ ကြိမ်တည်းသာ အနိုင်ရခဲ့ပါတယ်။
ဒါပေမဲ့ ဆောက်ဂိတ်လက်ထက်တွင် အင်္ဂလန်အသင်းဟာ ပင်နယ်တီအတွက် ပြင်ဆင်မှု အလွန်ကောင်းမွန်ခဲ့ပြီး ၂၀၁၈ ခုနှစ်မှ ၂၀၂၄ ခုနှစ်အတွင်း ပင်နယ်တီ အဆုံးအဖြတ် ၄ ကြိမ်တွင် ၃ ကြိမ် အနိုင်ရခဲ့ပါတယ်။
တူချယ်က "အက်ဖ်အေဟာ ပင်နယ်တီအတွက် အစီအစဉ်က နှစ်များစွာကတည်းက ရှိပြီးသားပါ။ ကျွန်တော်တို့ ဒီအစီအစဉ်တိုင်း ဆက်လုပ်သွားမယ်။ ကျွန်တော်တို့ ပြင်ဆင်ထားတယ်။ ကျွန်တော်တို့မှာ လုပ်ငန်းစဉ် ရှိသလို ကစားသမားတွေမှာလည်း လုပ်ငန်းစဉ် ရှိတယ်"လို့ ပြောကြားသွားပါတယ်။
ယင်းသို့ အစီအစဉ်ရှိပေမဲ့လည်း တူချယ်က ပင်နယ်တီနှင့်ပတ်သက်ပြီး သတိပေးမှု ပြုလုပ်သွားပါတယ်။
၎င်းက "ပင်နယ်တီကန်တဲ့အခါ တုပဖို့တော့ ခက်တယ်။ သီယာရီဟင်နရီ ပြောတာ ကြားဖူးတယ်။ ပြင်သစ်အတွက် ပထမဆုံးအကြိမ် ပင်နယ်တီကန်တုန်းက ကွင်းလယ်တစ်ဝက်ကနေ ပင်နယ်တီကန်တဲ့နေရာကို သားတာကို မမှတ်မိတော့ဘူးလို့ ပြောတယ်။ ဒါကိုတော့ လေ့ကျင့်လို့ မရဘူး"လို့ ပြောကြားသွားပါတယ်။
ပင်နယ်တီကန်ရေး ကစားသမားများအား ရွေးချယ်ခွင့်ပေးလာမှာလားလို့ မေးမြန်းလာချိန်တွင် တူချယ်က "ဘယ်သူတွေ ကန်တယ်၊ဆိုတာ ကျွန်တော်တို့ သိတယ်။ ဘယ်သူတွေကို ကန်စေရမယ်ဆိုတာ သိတယ်။ ဒါပေမဲ့ ပွဲမှာ ဘယ်သူတွေနဲ့ အဆုံးသတ်မယ်ဆိုတာ မသိပါဘူး"လို့ ပြောကြားသွားပါတယ်။
