ယူနိုက်တက်တိုက်စစ်မှူးဟောင်းကို တွမ်တီးအတွက် ခေါ်ယူပေးနိုင်ခဲ့လို့ အကြီးအကျယ် ဂုဏ်ယူနေတဲ့ အဲရစ်တန်ဟက်
=====================
တွမ်တီးဟာ အေဂျက်စ်မှ ထွက်ခွာလာခဲ့တဲ့ နယ်သာလန်တိုက်စစ်မှူးဝတ်ဝက်ဟော့စ်ကို ၂ နှစ်စာချုပ်ဖြင့် ခေါ်ယူလိုက်ပြီ ဖြစ်ပါတယ်။
တွမ်တီးဟာ ယူနိုက်တက်တွင် အငှားဖြင့် လာကစားဖူးတဲ့ ဝတ်ဟော့စ်ကို အလွတ်ပြောင်းရွှေ့ကြေးဖြင့် ခေါ်ယူနိုင်ခဲ့တာ ဖြစ်ပြီး တွမ်တီးအားကစားဒါရိုက်တာအဲရစ်တန်ဟက်က ယင်းအပြောင်းအရွှေ့ကို ဦးစီး လုပ်ဆောင်ခဲ့တာလည်း ဖြစ်ပါတယ်။
အဲရစ်တန်ဟက်ဟာ ယူနိုက်တက်ကို ကိုင်တွယ်တုန်းက နယ်သာလန်တိုက်စစ်မှူးကို အိုးထရက်ဖို့ဒ်သို့ ကာလတို အငှားဖြင့် ခေါ်ဆောင်ခဲ့ဖူးသူလည်း ဖြစ်ပါတယ်။
ဝတ်ဟော့စ်ကို ခေါ်ယူနိုင်ခဲ့ပြီးနောက် အဲရစ်တန်ဟက်က "အက်ဖ်စီတွမ်တီးအတွက် ဝတ်ဟော့စ်ကစားလာမှာ ဖြစ်လို့ ကျွန်တော်တို့ ဂုဏ်ယူပါတယ်။ ကိုယ့်ကလပ်အတွက် နိုင်ငံပွဲ ငါးဆယ်ကျော်ကစားထားတဲ့ နယ်သာလန်တိုက်စစ်မှူးကစားလာတာ ဝမ်းမသာပါဘူးလား။ ဒီအပြောင်းအရွှေ့က ကျွန်တော်တို့အတွက် တကယ့် ရွှေအခွင့်အရေးပါ။ သူက အားလုံး အိတ်သွန်ဖာမှောက် ကြိုးစားပေးတဲ့ အတုယူစရာကစားသမားဖြစ်သလို ထိပ်တန်းပရော်ဖက်ရှင်နယ်တစ်ဦး ဖြစ်ပါတယ်"လို့ ပြောကြားသွားပါတယ်။
နယ်သာလန်အတွက် ၅၁ ပွဲကစားထားရာမှာ ၁၄ ဂိုးသွင်းထားတဲ့ ဝတ်ဟော့စ်ဟာ အေဂျက်စ်တွင် ကစားတဲ့ နှစ်ရာသီအတွင်းတွင် ၆၅ ပွဲကစားထားရာမှာ ဂိုး ၂၀ သွင်းပေးခဲ့သူလည်း ဖြစ်ပါတယ်။
