ဘရူနိုဖာနန်ဒက်စ်အား ဝေဖန်တိုက်ခိုက်မှုအပေါ် ခရစ္စတီယာနိုရော်နယ်ဒိုရဲ့အစ်မက ထောက်ခံလာမှုနှင့်အတူ ပေါ်တူဂီအသင်းအတွင်း အက်ကွဲကြောင်းဖြစ်ပေါ်လာ
====================
ခရစ္စတီယာနိုရော်နယ်ဒိုရဲ့အစ်မဟာ ဘရူနိုဖာနန်ဒက်စ်အား ဝေဖန်တိုက်ခိုက်ထားတဲ့ အင်စတာဂရမ်ပို့စ်အား Like ပေးလာမှုနှင့်အတူ ပေါ်တူဂီအသင်းအတွင်း အက်ကွဲကြောင်း ဖြစ်ပေါ်လာပါတယ်။
ပေါ်တူဂီစတားနှစ်ဦးတို့ဟာ ဒီမိုကရက်တစ်ကွန်ဂိုနှင့် တစ်ဂိုးစီသရေကျတဲ့ ကမ္ဘာ့ဖလားအုပ်စုအဖွင့်ပွဲတွင် ပေါ်တူဂီအတွက် ပွဲထွက်ကစားခဲ့ကြပါတယ်။
ရောဘတ်တိုမာတီနက်ဇ်ရဲ့ ပေါ်တူဂီဟာ ပွဲအစ ၆ မိနစ်မှာပင် ဂျာအိုနီဗက်စ်ရဲ့ ခေါင်းတိုက်ဂိုးဖြင့် ပွဲကို စောစောစီးစီး ဦးဆောင်နိုင်ခဲ့ပေမဲ့ ယိုအာနီဝစ်ဆာရဲ့ ခေါင်းတိုက်ချေပဂိုးကြောင့် တစ်ဂိုးတည်းဖြင့် ကျေနပ်ခဲ့ရပါတယ်။
ယူနိုက်တက်အသင်းခေါင်းဆောင်ဘရူနိုဖာနန်ဒက်စ်ဟာ ယင်းပွဲ ဒုတိယပိုင်းတွင် ခရစ္ဏတီယာနိုရော်နယ်ဒို အပိုင်အခွင့်အရေး ဖြုန်းတီးပစ်ချိန်တွင် အကြီးအကျယ်စိတ်ပျက်နေခဲ့တာလည်း တွေ့ရပါတယ်။
ပေါ်တူဂီဟာ စိတ်ပျက်ဖွယ်ရာ ရလဒ်ကြောင့် ပရိသတ်များရဲ့ ဝေဖန်ခြင်းခံနေရပါတယ်။
အင်စတာဂရမ်ပို့စ်တစ်ခုတွင် "ဘရူနိုဖာနန်ဒက်စ်က နိုင်ငံအသင်းအင်္ကျီဝတ်ဆင်လိုက်တဲ့အချိန်မှာ ကွဲပြားတဲ့ ကစားသမားတစ်ဦး ဖြစ်သွားတယ်။ ပေါ်တူဂီအသင်း ခေါင်းဆောင်အလိုအပ်ဆုံးအချိန်မှာ သူ ပျောက်ကွယ်သွားတယ်။ အခြားသူတွေကို ပုခုံးလွဲပေးလိုက်တယ်။ ပါရမီအများကြီးရှိပြီး မီဒီယာအာရုံစိုက်မှုလည်း ခံရတယ်။ ဒါပေမဲ့ ကြီးမားတဲ့ အခိုက်အတန့်တွေမှာ အဆုံးအဖြတ်ဖြစ်အောင်လုပ်တာ ဘယ်မှာလဲ။ ဖိအားတွေ အများကြီး ရှိနေချိန်မှာ စတားတစ်ဦး ရှေ့ထွက်လာတာ ပရိသတ်တွေ မျှော်လင့်ကြတယ်။ အခက်အခဲတွေ ကြုံနေရတဲ့အချိန်မှာ ပျောက်ကွယ်သွားတာမျိုး လိုချင်ကြတာ မဟုတ်ဘူး"လို့ ရေးသားထားပါတယ်။
ယင်းပို့စ်ကို ဖော်လိုဝါ ၁.၆ သန်းပိုင်ဆိုင်ထားတဲ့ ခရစ္စတီယာနိုရော်နယ်ဒိုရဲ့ အစ်မ ကေတီယာအဗီရိုက Like ပေးထားခဲ့တာပါ။
ခရစ္စတီယာနိုရော်နယ်ဒိုရဲ့ အခြားအစ်မတစ်ဦးဖြစ်တဲ့ အယ်မာအဗီရိုကလည်း ပေါ်တူဂီအသင်းမှာ နိုင်ပွဲ အခိုးခံခဲ့ရတယ်လို့ ရယ်စရာကောင်းတဲ့ ပို့စ် ရေးသားခဲ့ပါသေးတယ်။
ခရစ္စတီယာနိုရော်နယ်ဒိုဟာ ကွန်ဂိုနှင့်ပွဲတွင် အသက် ၄၁ နှစ်၊ ၁၃၂ ရက်ဖြင့် ပွဲထွက်ကစားကာ ကမ္ဘာ့ဖလားပွဲထွက်ကစားခွင့်ရ အသက်အကြီးဆုံးကစားသမားအဖြစ် မှတ်တမ်းဝင်ခဲ့ပါတယ်။
ကမ္ယာ့ဖလား ၆ ကြိမ်မြောက်ကစားခွင့်ရသူအဖြစ် အထူးအမှတ်တံဆိပ်ပါ အင်္ကျီကို ဝတ်ဆင်ကစားခွင့်ရခဲ့တဲ့ ခရစ္စတီယာနိုရော်နယ်ဒိုဟာ ကွန်ဂိုနှင့်ပွဲတွင် ဂိုးပေါက်တည့်ကန်ချက် ပြုလုပ်နိုင်ခဲ့ခြင်း မရှိဘဲ နိုင်ငံတကာပြိုင်ပွဲကြီး ၁၀ ပွဲဆက် ဂိုးပေါက်ပျောက်ထားပါတယ်။
