သမ္ဗုဒ္ဓေဂါထာဖြင့် အပွင့်ဓါတ်ဖွင့်ခြင်းနည်းစနစ်
၁။ ယနေ့ခေတ်ကာလကြီးဟာ အနေအထားအမျိုးမျိုး အခြေအနေအမျိုးမျိုးကြောင့် လူတိုင်းနီးပါးဟာ အနည်းနဲ့အများ အတော်ဒုက္ခရောက်ကြပါတယ်။ အနေခက်၊ အသေကြပ်ပြီး ရှင်သန်ရပ်တည်ရတာ အတော်ခက်ခဲကြသည့် အချိန်ဖြစ်တာမို့ အနည်းနှင့် အများ အခက်အခဲတွေပြေပျောက်လွယ်ကူစေရန်အလို့ငှာ လူတိုင်းဆောင် ရွက်နိုင်လောက်သည့် နည်းစနစ်တစ်ခုကို မျှဝေကုသိုလ်ပြုပေးချင်တာပါ။
၂။ ဒီနည်းစနစ်ကို ညွှန်ပြခဲ့သည့် အရှင်မြတ်ဟာ ပြည်ဝေပုလ္လဆရာတော်အရှင်မြတ်ကြီးဖြစ်ပါတယ်။ ဆရာတော်ကြီး၏ တပည့်ရင်းလည်းဖြစ်ပြီး၊ သက်တော် ၃၀ မှာ ရဟန္တာဖြစ်တော်မူသည်ဟု ကျော်ကြားသည့် ဆားတောင်ဆရာတော်ဘုရားကြီး၏ တပည့်သာဝကတစ်ဦးလည်းဖြစ်ခဲ့သည့် ဓမ္မမိတ်ဆွေလည်းဖြစ်၊ အစ်ကိုကြီးတစ်ဦးလို လေးစားအတုယူရသည့် အစ်ကိုကြီးတစ်ဦးရဲ့အဆိုရ ဆရာတော်ကြီးဟာ အင်းဖြင့် ပေါက်မြောက်တော်မူသည့် အင်းဝိဇ္ဇာတစ်ဦးဖြစ်တယ်လို့ ဆိုပါတယ်။ ဒါ့ကြောင့် မဟာမြိုင်တောထဲမှာ ဆိုင်ရာကျင့်စဉ်စခန်းပြီးမြောက်ခဲ့တာမို့ ဆရာတော်ကြီးကို "မဟိဒ္ဓိမဟာဓမ္မအင်းဝိဇ္ဇာ၊ လောကနာနာနယ ပါရဂူ၊ လောကဝိဇ္ဇာဓရ နာနာနယပါရဂူ " ဆိုတဲ့ဘွဲ့ တွေကိုလည်း ပုဂ္ဂိုလ်တွေကိုယ်တိုင်ချီးမြှင့်ခြင်းခံခဲ့ရပါတယ်။
၃။ ဆရာတော်ထွက်တော်မမူခင်မှာ ဆုတောင်းပြည့်ဆားတောင်ဆရာတော်ကြီးကို သူ့ဆရာအကြောင်းလိုအပ်တာရှိက စောင့်ရှောက်ပေးဖို့ အနီးကပ်လျောက်ထားခဲ့စဉ်ကလည်း ကိစ္စပြီးစီးအောင်မြင် စောင့်ရှောက်ခဲ့ကြောင်းနှင့် အောင်မြင်ပေါက်ရောက်ခဲ့ကြောင်းပြန်လည်မိန့်ကြားခဲ့တာ နာကြားခဲ့ရသည်ဟုဆိုပါတယ်။ အဲလိုမိန့်ပြီး ၆နှစ်ခန့် ၂၅-၇-၂၀၁၂ခုနှစ်မှာ ပြည်ဆရာတော်ကြီးဟာ ထွက်တော်မူခဲ့ပါတယ်။ ဆရာတော်ကြီး သနားချီးမြှင့်ခဲ့သည့် ကျင့်စဉ်နည်းစနစ်ကတော့ဒီလိုပါ
၄။ ၂၈ ဆူကုန်သော မြတ်စွာဘုရားရှင်တို့အား ရည်စူးလျက် သပြေပန်း(၁၅)ခက်တိတိတွင် တစ်ခက်စီ၌ ရွှေပန်း(သို့)ငွေပန်း(သို့)ကံ့ကော်ပန်း(သို့) အင်ကြင်း ပန်း(သို့) ဂန္ဓမာအဖြူဖြစ်စေ၊ ရရာတစ်မျိုးမျိုးကို သားရေကွင်းနှင့် ကပ်စည်းပါ။
၅။ ဖယောင်းတိုင်မီး(၁၅)တိုင်ထွန်းပါ။ မိမိအိမ် ဘုရားကျောင်းဆောင် (အဓိက)ဘုရားရှေ့တော်မှောက်မှာ ပြင်ဆင်ကပ်လှူပါ။
၆။ ဤနည်းစနစ်အတိုင်း သောမဂြိုဟ်များဖြစ်သည့်တနင်္လာနေ့ နံနက် ၉နာရီ ၁ကြိမ်၊ ဗုဒ္ဓဟူးနေ့ နံနက် ၉နာရီ ၁ ကြိမ်၊ ကြာသပတေးနေ့ နံနက် ၉နာရီ ၁ကြိမ်၊ သောကြာနေ့ နံနက် ၉နာရီ ၁ကြိမ် ကပ်လှူပူဇော် ကန်တော့ပါ။
(မနက်ပိုင်း ပြုလုပ်စေခြင်းဟာ လောကီမှာ မနက်ပိုင်းဟာ အဖြစ်၊ ညနေပိုင်းဟာ အပျက်လို့ယူဆကြပါတယ်။ ဆရာတော်ကြီး ညွှန်းတဲ့အချိန်လုပ်နိုင်ရင် အကောင်းဆုံးပေါ့ဗျာ)
၇။ ထိုသို့ တစ်ပတ် လေးကြိမ် ပူဇော်ကန်တော့သော လေးနေ့ စလုံးတွင် သမ္ဗုဒ္ဓေဂါထာတော်ကြီးအား (၇၂)ခေါက် တိတိ တစ်ထိုင်တည်းနှင့် အသံ မတိုးလွန်း မကျယ်လွန်း အနေတော် အသံမှန်ဖြင့် ရွတ်ဖတ်သရဇ္ဈာယ်ပေးပါ။
၈။ ကောင်းမှုကုသိုလ်များကိုလည်း သာသနာတော်စောင့်နတ်များ၊ သမ္မာဒေဝနတ်များ၊ သတ္တဝါများအား အမျှ ပေးဝေပါ။ မိမိအလိုချင်ဆုံး၊ အရချင်ဆုံး။ အဖြစ်ချင်ဆုံး လာဘ်လာဘကိစ္စကို ငါးခါဆို၍ ဆုတောင်းပါ။ ဆုတောင်းနည်းကတော့ ဒီလိုပါ
“အရပ်လေးမျက်နှာ၊ အရပ်ရှစ်မျက်နှာ၊ အရပ်ဆယ်မျက်နှာ တို့မှ ရစရာရှိသော ရွှေငွေရတနာဥစ္စာများ၊ ဝင်စရာရှိသော ရွှေငွေ ဥစ္စာရတနာများ၊ တိုးတက်စရာရှိသော ရွှေငွေဥစ္စာရတနာများ မြန်မြန် ထက်ထက် လျင်မြန်စွာ ဝင်လာမစဲ တသဲသဲလာရောက်ကြပါစေ။ ဝင်ရောက်ကြပါစေ”ဟု ငါးခါဆို၍ ဆုတောင်းမှုပြုပါ။
၉။ တစ်ပတ် လေးကြိမ်နှုန်း တစ်လ ပြုလုပ်ပါက အမှန်တကယ် လာဘ်ငွေများ ဝင်လာကြောင်းနှင့် ဤနည်းစနစ် ၏ အကျိုးပြမှာ မိမိကံရှိသည့်အတိုင်း ထီပေါက်ခြင်း၊ ဝင်ငွေအားကောင်းခြင်၊ အကြွေးငွေများရလွယ်ခြင်း၊ ဆုံးရှုံးနစ်နာမှုများ စီးပွားရေး အရောင်းအဝယ်များ၊ အလုပ်အကိုင်များ အထူးအဆင်ပြေ အောင်မြင်ပြီးစီးမည်ဟု ညွှန်းဆိုပါသည်။အခက်အခဲများမှလွတ်မြောက်ချမ်းသာ၍ စိတ်ရှိတိုင်း ပေးလှူနိုင်စွမ်းရှိကြပါစေကြောင်း မျှဝေဆန္ဒပြုပါသည်။