ကနေဒါသို့ ပြည်ဝင်ခွင့်မရမှုကြောင့် ဂါနာရဲ့ ကမ္ဘာ့ဖလားအဖွင့်ပွဲကို ပါတေး လွဲချော်လာမည်
=====================
ဂါနာကွင်းလယ်ကစားသမားသောမတ်စ်ပါတေးဟာ ကနေဒါပြည်ဝင်ခွင့် ငြင်းပယ်ခြင်းခံလာရပြီးနောက် ပနားမားနှင့် ကစားရမဲ့ ဂါနာရဲ့ ကမ္ဘာ့ဖလားအုပ်စုအဖွင့်ပွဲစဉ်ကို လွဲချော်လာတော့မှာ ဖြစ်ပါတယ်။
အသက် ၃၂ နှစ်ရှိ ပါတေးဟာ ၂၀၂၀ ခုနှစ်မှ ၂၀၂၂ ခုနှစ်အတွင်း ကွဲပြားတဲ့ အမျိုးသမီး ၄ ဦးအား ဗလက္ကာယပြုကျင့်မှု ၇ မှု၊ လိင်အကြမ်းဖက်မှု ၁ မှုတို့ဖြင့် အမှုရင်ဆိုင်နေရသူ ဖြစ်ပြီး ၎င်းတွင် အပြစ်မရှိကြောင်း ငြင်းဆိုထားပါတယ်။
သူဟာ ယင်းအမှုများအား လာမဲ့နှစ်တွင် တရားရင်ဆိုင်ရပါဦးမယ်။
ယခုအခါ ဖီဖာက ဗီလာရီးရဲလ်ကွင်းလယ်ကစားသမားအား ကနေဒါအစိုးရက ဗီဇာပေးရန် ငြင်းဆိုလာမှုနှင့်အတူ ဘော်စတွန်ရှိ ဂါနာရဲ့ လေ့ကျင့်ရေးစခန်းမှ တိုရွန်တိုသို့ သွားရောက်နိုင်မှာ မဟုတ်ကြောင်း အတည်ပြုကြေညာလာသလို ဖီဖာအနေဖြင့် ဗီလဇာအပါအဝင် လူဝင်မှုကြီးကြပ်ရေးဆိုင်ရာ လုပ်ငန်းများတွင် ပါဝင်စွက်ဖက်နိုင်ခြင်း မရှိကြောင်း ကြေညာထားပါတယ်။
သောမတ်စ်ပါတေးအနေဖြင့် ပနားမားနှင့် အဖွင့်ပွဲတွင် ပါဝင်လာနိုင်မှာ မဟုတ်ပေမဲ့လည်း ဇွန်လ ၂၃ ရက်နေ့တွင် ဘော်စတွန်ကွင်းတွင် အင်္ဂလန်နှင့် ရင်ဆိုင်ရမဲ့ အုပ်စုဒုတိယပွဲစဉ်နှင့် ဇွန်လ ၂၇ ရက်နေ့ ဖယ်လာဒယ်ဖီယာတွင် ခရိုအေးရှားနှင့် ရင်ဆိုင်ကစားရမဲ့ပွဲစဉ်တို့မှာတော့ ပါဝင်ကစားလာနိုင်ပါမယ်။
တဖက်တွင် ဂါနာဟာ ကမ္ဘာ့ဖလား ၃၂ သင်း ရှုံးထွက်အဆင့်သို့ အုပ်စုဒုတိယအနေဖြင့်သာ တက်ရောက်နိုင်ပါက ကနေဒါသို့ သွားရောက်ကစားရဖို့ ရှိနေပါသေးတယ်။
၎င်းတို့ဟာ အုပ်စုတတိယရရှိပြီး ၃၂ သင်းအဆင့်ကိုလည်း ကျော်ဖြတ်လာနိုင်ပါက ၁၆ သင်း ရှုံးထွက်အဆင့်ပွဲစဉ်ကိုလည်း ဗန်ကူးဗားတွင်ပင် ကစားလာရမှာ ဖြစ်လို့ ပါတေးအနေဖြင့် ပါဝင်လာနိုင်မှာ မဟုတ်ပါဘူး။
တဖက်တွင် ဂါနာအာဏာပိုင်တို့ကလည်း ပါတေးမှာ စွဲချက်တင်ခြင်းခံထားရဆဲသာ ဖြစ်ပြီး အပြစ်ရှိကြောင်း တွေ့ရှိရခြင်း မရှိသေးချိန်တွင် ကနေဒါဗီဇာ မရရှိမှုအပေါ် အံ့ဩသင့်ရကြောင်း ကြေညာထားပါတယ်။
အမေရိကန်၊ ကနေဒါ၊ မက္ကဆီတို့က ပူးတွဲအိမ်ရှင်အဖြစ် ကျင်းပနေတဲ့ ၂၀၂၆ ကမ္ဘာ့ဖလားပြိုင်ပွဲတွင် ဗီဇာပြဿနာ ကြုံတာ ပထမဆုံးအကြိမ် မဟုတ်ပါဘူး။
အီရတ်တိုက်စစ်မှူးအေမန်ဟူစိန်မှာ ချီကာဂိုလေဆိပ်တွင် နာရီအတန်ကြာ စစ်ဆေးမေးမြန်းခြင်းခံရပြီးမှ ပြည်ဝင်ခွင့်ဗီဇာ ရရှိခဲ့ပါတယ်။
ဆိုမာလီဒိုင်လူကြီးအိုမာအာတန်မှာလည်း အကြမ်းဖက်အဖွဲ့အစည်းများနှင့် အဆက်အသွယ်ရှိတယ်ဆိုပြီး မိုင်ယာမီနိုင်ငံတကာလေဆိပ်တွင် ၁၁ နာရီကြာ စစ်ဆေးမေးမြန်းခြင်းခံရခြင်း၊ နာရီအတန်ကြာ ထိန်းသိမ်းခြင်းခံရခြင်းတို့ ကြုံပြီးနောက် တူရကီသို့ သွားမဲ့ လေယာဉ်ပေါ်သို့ အတင်ခံရကာ ကမ္ဘာ့ဖလားနှင့် လွဲချော်ထားပါတယ်။
