၁၁ နာရီကြာ အင်တာဗျူးပြုလုပ်ပြီး သက်သေအထောက်အထားအခိုင်အလုံပြသခဲ့ပေမဲ့ အမေရိကန်ပြည်ဝင်ခွင့်ဗီဇာငြင်းဆိုခံခဲ့ရကြောင်း အာဖရိကရဲ့အကောင်းဆုံးဒိုင်လူကြီးဖွင့်ဟလာ
========================
ဆိုမာလီဒိုင်လူကြီးအိုမာအာတန်က အမေရိကန်ပြည်ဝင်ခွင့်ရရှိရေး လူဝင်မှုကြီးကြပ်ရေးတွင် ၁၁ နာရီကြာ အင်တာဗျူးပြုလုပ်ခံခဲ့ရပြီး မှန်ကန်တဲ့ စာရွက်စာတမ်းနှင့် ဗီဇာများ ကိုင်ဆောင်ထားပေမဲ့ အမေရိကန်ပြည်ဝင်ခွင့် ငြင်းပယ်ခြင်းခံခဲ့ရကြောင်း ဖွင့်ဟပြောကြားလာပါတယ်။

အာတန်ဟာ ကမ္ဘာ့ဖလားပြိုင်ပွဲအတွက် ဒိုင်လူကြီးများစာရင်းတွင် ရွေးချယ်ခြင်းခံရပြီးနောက် ကမ္ဘာ့ဖလားကြီးကြပ်ခွင့်ရလာမဲ့ ပထမဆုံးဆိုမာလီဒိုင်အဖြစ် မှတ်တမ်းဝင်နိုင်မဲ့ အခွင့်အရေး ရခဲ့ပေမဲ့လည်း မိုင်ယာမီနိုင်ငံတကာလေဆိပ်တွင် ပြည်ဝင်ခွင့် ငြင်းပယ်ခြင်းခံရပြီးနောက် ဖီဖာရဲ့ ကမ္ဘာဖ့လားဒိုင်လူကြီးစာရင်းမှ ဖယ်ရှားခြင်းခံလာခဲ့ရပါတယ်။

အမေရိကန်လူဝင်မှုကြီးကြပ်ရေးက အာတန်ကို ဘယ်လိုအကြောင်းပြချက်ကြောင့် ပြည်ဝင်ခွင့်မပေးသလဲဆိုတာ ထုတ်ပြန်ကြေညာထားခြင်း မရှိပါဘူး။ ဒါပေမဲ့ အာတန်ရဲ့ ဆိုမာလီက ဒေါ်နယ်ထရမ့်ရဲ့ ပြည်ဝင်ခွင့်ပိတ်ပင်ခြင်းခံထားရတဲ့ နိုင်ငံများထဲမှ တစ်ခု ဖြစ်နေပါတယ်။

အာတန်က "အရမ်း အရမ်းကို စိတ်ပျက်ရတယ်။ ကျွန်တော်က အိပ်မက်ကို အကောင်အထည်ဖော်ဖို့ ကြိုးစားနေတဲ့ သာမန်ဒိုင်လူကြီးတစ်ဦးသာ ဖြစ်ပါတယ်။ ကျွန်တော့်ဘဝရဲ့အကြီးမားဆုံးအိပ်မက်၊ ကမ္ဘာ့ဖလားသို့ ရောက်လာပြီးမှ ပျက်ခဲ့ရတယ်"လို့ New York Times သို့‌ ပြောကြားသွားပါတယ်။

ဖီဖာကမူ ယင်းအဖြစ်အပျက်တွင် ကြားဝင်ပါဝင်နိုင်ခြင်း မရှိဘဲ အမေရိကန်ရဲ့ လူဝင်မှုကြီးကြပ်ရေးဌာနအပေါ်တွင်သာ မူတည်ခဲ့ကြောင်း ဆိုထားပါတယ်။

နိုင်ရိုဘီရှိ ဆိုမာလီသံရုံးက အာတန်ကို ခရီးသွားလာရေး အဆင်ပြေချောမွေ့မှု ရှိစေရန်အတွက် သံတမန်ပတ်စ်ပို့ ထုတ်ပေးထားတဲ့ကြားမှ ယခုကဲ့သို့ ကြုံလာခြင်းဖြစ်ကြောင်း ဆိုထားပါတယ်။

ဆက်လက်ပြီး အာတန်က "ကျွန်တော့်မှာ မှန်ကန်တဲ့စာရွက်စာတမ်းတွေ ရှိတယ်။ အားလုံးလည်း ရှိတယ်။ ဗီဇာလည်း ရှိတယ်"လို့ ဆိုသွားပါတယ်။

အာတန်ဟာ လူဝင်မှုကြီးကြပ်ရေးရဲ့ ၁၁ နာရီကြာ အင်တာဗျူးခံခဲ့ရသလို နာရီအတန်ကြာ ထိန်းသိမ်းခြင်းလည်း ခံခဲ့ရပြီးနောက် တူရကီနိုင်ငံ၊ အစ္စတန်ဘူလ်လေကြောင်းလိုင်းပေါ် တင်ခြင်းခံခဲ့ရပါတယ်။

တဖက်တွင် အာတန်အနေဖြင့် အမေရိကန်ပြည်ပတွင် နေထိုင်ကာ ကနေဒါ (သို့မဟုတ်) မက္ကဆီကိုတို့တွင် ကျင်းပတဲ့ ပွဲများကို ကြီးကြပ်ရန်လည်း မဖြစ်နိုင်ပါဘူး။

ကမ္ဘာဖ့လားပြိုင်ပွဲတွင် ကြီးကြပ်မဲ့ ဒိုင်လူကြီး ၅၂ ဦးနှင့် စည်းကြပ်ဒိုင် ၈၈ ဦးတို့ဟာ မိုင်ယာမီတွင် ပြိုင်ပွဲအတွက် လေ့ကျင့်မှုများ ပြုလုပ်နေကြပါတယ်။

ကွင်းအတွင်း တာဝန်ထမ်းဆောင်ရမဲ့ တာဝန်ရှိသူများအားလုံးဟာ လေ့ကျင့်ရေး၊ ပြင်ဆင်ရေးနှင့် လုံခြုံရေးတို့အတွက် ဖလိုရီဒါတွင် အခြေစိုက်ရပါတယ်။

ဒီဇင်ဘာတုန်းက ဒေါ်နယ်ထရမ့်က အမေရိကန်တွင် ဆိုမာလီနိုင်ငံသားတစ်ဦးမျှ အလိုမရှိကြောင်း ဆိုခဲ့ဖူးပါတယ်။

ကမ္ဘာဖ့လားပြိုင်ပွဲကို ဇွန်လ ၁၁ ရက်နေ့မှ ဇူလိုင်လ ၁၉ ရက်နေ့အထိ ကျင်းပလာပါမယ်။

အာတန်ကဲ့သို့ပင် အီရန်အသင်းပရိသတ်များဟာလည်း ကမ္ဘာ့ဖလားပြိုင်ပွဲအတွက် လက်မှတ်များ ဖယ်ရှားခြင်းခံခဲ့ရသလို ကွင်းအတွင်း အီရန်အလံကိုင်ဆောင်ခွင့် ပိတ်ပင်ခြင်းခံထားရပါသေးတယ်။